VOV4.M'nông: Ôi aơ, ta Hà Nội, Ntơm pơk rơh hop tâl 7 bah Ủy ban Thường vụ Quốc hội. Ta rơh hop dja, Ủy ban Thường vụ Quốc hội mbra an nău rgop tâm nkô̆ khlay. Mpeh pah kan rdâk njêng pháp luật, ta rơh hop dja, Ủy ban Thường vụ Quốc hội an nău rgop mpeh: Nău rblang, djăt nău rgop, rgâl di trong nchrăp Luật tâm rlong nkhôm rnê (rgâl nkra); nkô̆ nău kơi ntop trong nchrăp Nghị quyết bah Quốc hội ntĭt leo trong ƀư nuĭh kan, rƀŏng joi nău kan, ntĭm nti nău kan an nuĭh tih bah dih ndrung krŭng tâm Bôk nău kan rdâk njêng luật, pháp lệnh năm 2022; mĭn uănh, n'glêh an nău tĭng  ƀư ndơ nsoh nkra rmal bah Hội thẩm nhân dân.  Mpeh nkô̆ nău wăng sa- rêh jêng kon nuĭh, Ủy ban Thường vụ Quốc hội an nău rgop nău kơi ntop trong nchrăp ntuh kơl tơm prăk dak bah dih bah rnoh tơm prăk mô hŏ tâm pă n'hanh rgâl di, trong nchrăp ntuh kơl ngih dak jong dah găp tơm prăk ngân sách Trung ương lvang năm 2021-2025 an trong nchrăp bah ăp bộ, nhih pah kan Trung ương n'hanh n'gor (rơh 2). Ndrel đah nê, ta rơh hop dja, Ủy ban Thường vụ Quốc hội mbra mĭn uănh nău mbơh pah kan ƀon lan sơch kan khay 12-2021 bah Quốc hội; Đề án dăp rgum tay nău kan tâm trôm n'hanh biên chế bah Văn phòng Quốc hội an nău rgop mpeh n'glôch jêh rơh hop ndal lor bôk năp, Quốc hội khóa 15./.

Nuĭh rblang: Điểu Thân