Nar 13/6, mpôl pah kan bah Trung ương Đoàn Thanh niên Cộng sản Hồ Chí Minh lĕ hăn khâl, an n’hanh an huy hiệu “Druh ndăm janh dăng” an 5 cán bộ, tahen công an geh sôt rmanh n’hanh khĭt tâm nău geh ta nkuăl Cư Kuin, n’gor Dak Lak nar 11/6 mhe rlău.

Tĭng nĕ, mpôl pah kan bah Trung ương Đoàn lĕ tât ngih dak si đa khoa nkual Tây Nguyên gay chop khâl săk soan n’hanh an Huy hiệu “Druh ndăm janh dăng” an 2 cán bộ, tahen dôl săm sôt geh: thượng úy Đàm Đình Bốp n’hanh đại úy Lê Kiên Cường, pah kan ta Công an xă Ea Ktur, nkuăl Cư Kuin.

Ndrel đah nĕ, rmôt kan lĕ tât chop khâl, ntrŭt nsôr rnăk wâl n’hanh an huy hiệu “Druh ndăm janh dăng” an 3 hê êng geh: đại úy Nguyễn Đăng Nhân, pah kan ta Công an xă Ea Ktur; thiếu tá Trần Quốc Thắng n’hanh đại úy Hà Tuấn Anh, pah kan ta Công an xă Ea Tiêu. Aơ lah ăp cán bộ tahen lĕ sôt rmanh n’hanh khĭt tâm rnôk pah kan mât njrăng rnă njrăng, đăp mpăn ta nkuăl Cư Kuin, n’gor Dak Lak tâm nar 11/6 mhe rlău.