Lơ 28/11, ta nkuăl ƀon têh Đà Lạt, N’gâng kan tuch tăm ndrel hun hao ƀon lan tâm rgop nsum đah UBND n’gor Lâm Đồng ƀư rƀŭn lôch nau ƀư tĭng nau ntrŭnh 22/NQ-CP bah Chính phủ mpeh nau đăp mpăn ntŭk gŭ âm ndrel ntrŭnh ƀư Bôk nau kan pă ntŭk gŭ tĭng nau ntrŭnh 590 bah Thủ tướng Chính phủ. Ntơm năm 2013 tât rnôk aơ, lam dak pă, dăp rgum đăp mpăn ƀon lan ân rlau 112 rbăn rnăk. Dĭng lĕ ăp ntŭk gŭ mhe geh nau dơi ntŭk ntu gŭ âm, văng sa ueh lơn ntŭk gŭ ơm.

Ndrel đah ăp nau kơl an tâm nau rêh jêng geh ntrŭnh ƀư tâm ban, nau rêh drăp ndơ ndrel nuih n’hâm bah ƀon lan nar lơn geh rgâl, đăp mpăn ndrel ăp nhoat hao prêh. Yơn lah, rnôk aơ hôm rlau 16 rbăn rnăk ntrơn gŭ dah rŏng yor ê geh pă ntŭk gŭ đăp mpăn, dôl tâm nkhah tâm âk nkuăl, tâm nê ngăn lah ăp n’gor Tây Nguyên.

Gay dơi ƀư geh nau săk tam Bôk nau kan pă ntŭk gŭ ân ƀon lan tĭng nau ntrŭnh 590 bah Thủ tướng Chính phủ, đăp mpăn geh nkô̆ nau tât năm 2025 mra pă đăp mpăn ntŭk gŭ ân bơi tât 64.300 rnăk, tâm nê geh 10.500 rnăk ntrơn gŭ dah rŏng, rơh rƀŭn rgum nchră, leo luh ăp ntrong kan. Tâm nê, uănh kơl âk ngăn lah nau ƀư ăp nau ntrŭnh bah nkuăl mpeh nau pă ngih gŭ, neh gŭ, neh tuch tăm, ntuh kơl ndâk nkra ntŭk dŏng kan tơm, kơl an hun hao tuch tăm, nti kan pah ndrel pă kan pah./.