Lễ hội sầu riêng đah nkô̆ “Sầu riêng Krông Pắc – Hun hao n’hanh lăp rgum” ƀư ntơm bah măng nar 31/8 tât nar 2/9 ta Nklang thị trấn Phước An n’hanh du đêt xã ta nkuâl Krông Pắc, n’gor Dak Lak. Ndrel đah lễ ntơm pơk, lễ mpôch dŭt đah măng pănh pháo kao rup uĕh, tâm rnôk ƀư lễ hội mbra ƀư ăp nău kan kơt: Tâm rlong ƀon lan kan lŏ mir ngăch prăk mât chăm sầu riêng jăp blău; Hội chợ nkơnh n’hơ ndơ geh ƀư OCOP; Nar hội văn hóa ndơ ngêt sa ăp rnoi mpôl đê̆; rlong sa kah sầu riêng ta mir… 

Hăn ndrel nkuâl tâm pah kan ƀư lễ hội sầu riêng ta Krông Păk, Điện lực Dak Lak hŏ lôch jêh ăp trong ƀư tŏng ăp điện đăp mpăn. N’gâng kan điện hŏ ra uănh tay, ôp uănh lam lĕ rngôch trong rse n’hanh trạm biến áp ta nkuâl; nkre tĭng ƀư rdâk trong rse điện, trạm biến áp hăn tĭng ntŭk  n’hanh tâm pă máy mpoh điện rnă lor rhŏ dŏng ăp nău kan lễ hội ta Quảng trường Tân An.