VOV4.M’nông:   Ăp nar bah năp, ăp nuĭh ŭch Đà Lạt, ŭch uĕh nđĭr bah ăp lôk bri n’ho ndrăt da dê rnôk gĭt geh rhiăng tơm n’ho ta bri nchăng n’gang phŭt sial geh nuĭh kăl ntŭng nsiang. N’ăp kruanh n’gâng kan ƀon lan n’hanh ăp ngih pah kan dơi kan bah n’gor Lâm Đồng dŭt ndăt n’hanh yô̆ ta năp nu nău. Aơ dơi uănh lah nău phah bri têh ngăn bah sa ơm tât aƀaơ geh ta nkual ƀon têh Đà Lạt. Nuĭh ƀư tih phah bri dŭt janh, nŏng n’hanh uănh nsâm luật pháp.

Bah quốc lộ 27C, hăn rlău bri tĭng trong mpeh bah lơ nklăp 3 km mư tât ntŭk geh phah bri hô aơ lah lô A, Lô B, khoảnh 15, tiểu khu 144B, phường 8, nkual ƀon têh Đà Lạt (Lâm Đồng). Aơ lah lôk bri nchăng n’gang phŭt sial geh ta nkual kâng n’har đah nkuăl Lạc Dương n’hanh Đà Lạt, neh bri yor Mpôl mât uănh Lâm Viên mât njrăng. Rhiăng tơm n’ho 3 n’ha geh kăl chôt lêng lang ta du nkô yôk prêh, kiău ma dơi geh bri uĕh nđĭr bah ăp lôk bri n’ho nđĭr n’hanh dŭt uĕh ta aơ, rlău ma kăl âk tĭng kơt ƀư kloh ăp tơm n’ho têh-jêt, nuĭh hôm kăl tĭng rlô n’ho jêt chah chrai ta lam hvi.

Trung tá Phạm Thị Thu Hiền, Đội CSĐT nău tih mpeh kinh tế, chức vụ Công an nkual ƀon têh Đà Lạt, nuĭh bah mpôl hăn uănh ta ntŭk phah bri aơ lĕ an lah, nău tih kăl si aơ dŭt janh, bu dŏng măy ot ty gay kăl âk si. Đah rnoh tơm si 400 tơm n’ho geh ot chôt kơt aơ ri mô dơi knŭng geh tâm du nar.

Ntŭk ot kăl n’ho chôt lir lar ta tiểu khu 144B, phường 8, nkual ƀon têh Đà Lạt (Lâm Đồng).

“Bah dâng ri mhe ot nar nđaơ, nar ri, hôm ta aơ ot jŏ đêt yor n’ha n’ho lĕ kro êr. Jêng lah ot dŭt âk nar, ƀư na nao ta aơ, ƀah 2-3 nar ot du tơ̆ dơm”.

Rlău ma nău janh, nŏng êng n’hanh uănh mô jăp luật pháp, ăp nuĭh ƀư phah bri hôm ăp nuĭh way kan, geh âk nău blău tâm nău ot si kăl bri. An saơ nău aơ, nĕ lah ta ăp ntŭk têl tơm n’ho dơi kăl tăch lôch, kăl phat n’hanh sŏng tâm ban; n’ho chôt bah âk trong dăp tâm ntŭn yơn mô geh kê̆ng nkăng, dŭt sŏng kơt nuĭh ƀon lan ƀư mir.

Bah meng nĕ, ntŭk tơm bri geh ot kăl di ta n’har bah nkual kâng mpeh tâm neh bri yor Mpôl mât uănh bri Lâm Viên mât njrăng. Nău aơ knŭng geh ăp nuĭh dŭt gĭt ntŭk aơ, mô lah geh nău nuĭh mpôn, ntĭm bah ăp nuĭh tâm nău kan mât tăm bri mư dơi gĭt.

Ntŭk ot kăl n’ho chôt lir lar ta tiểu khu 144B, phường 8, nkual ƀon têh Đà Lạt (Lâm Đồng).

Yor ntŭk ntô bri ngai ƀon lan gŭ n’hanh ta neh têh hvi, tât ôi 18/5, ăp ngih pah kan dơi kan hôm e dôl uănh tay ta ntŭk, kơp lĕ tơm si geh kăl mô lah khuch. Tĭng wa Lê Thái Sơn, quyền Hạt trưởng Hạt kiểm lâm nkual ƀon têh Đà Lạt, ntŭk bri geh phah ta jru tâm bri, nău hăn gay nkra njêng n’hanh rdêng si lah dŭt nău jêr, yor rĭ nău ŭch phah bri dŭt jêr gay dơi năl.

“Ntŭk geh phah lah ntŭk dŭt jêr, geh ta n’gul bri, mô geh trong hăn, mô êp mir ba. Jêh rnôk saơ ntŭk bri geh phah, rmôt kan dơi kan bah nkual ƀon têh Đà Lạt nsrôih uănh nđôi, joi nuĭh”.

Tâm rnôk nĕ, wa Nguyễn Văn Sơn, Groi kruanh UBND nkual ƀon têh Đà Lạt an lah, aơ lah nău kăl si n’ho têh ngăn bah sa ơm tât aƀaơ geh ta ntŭk. Nkual aơ yôk prêh, hăn jêr jŏt, dơi uănh lah nkual đêt geh nău khuch tât bri. Yor rĭ rnôk phah bri lĕ ƀư kruanh n’gâng kan ƀon lan dŭt ndrăt. N’hanh aơ lah nkô̆ nău jêng tât nău dơi saơ mbrơi, mô ngăch. Tĭng wa Sơn đŏng, rlău ma rnoh tơm si geh ot chôt hôm geh rlău 100 tơm n’ho êng tâm nkual geh lôk, nkhŭt dak si an tơm si khĭt mbrơi mbrơi. Aƀaơ nu nău dôl dơi ngih pah kan dơi kan ndăn uănh nđôi ƀư kloh.

“Năl bôk năp lah nkual mô geh âk ri rnoh uănh nđôi mbra hŭch đêt. Yor mô năl nĕ lah nkual têh jêng mư saơ mbrơi. Hôm nău ŭch phah bri ri way tât ta ntŭk lah năl dâl, yơn đah nău phah bri aơ ri mô dơi năl. Nkual ƀon têh dôl ntĭm rđău ngih pah kan công an n’hanh ăp nău kan rgum uănh nđôi, an joi saơ nuĭh phah bri aơ gay rmal rjăp. Nkre an năl nău ŭch bah nău phah bri”.

Ntŭk ot kăl n’ho chôt lir lar ta tiểu khu 144B, phường 8, nkual ƀon têh Đà Lạt (Lâm Đồng).

Ta năp nău jru khlay bah nu nău, nar 17/5, UBND n’gor Lâm Đồng geh sam ƀŭt ntĭm rđău ăp ngih pah kan dơi kan ndăn uănh nđôi, rmal rjăp n’hanh kloh rah wah nău phah bri mô tâm di aơ. Ndrel đah nĕ, rlău ma nău đă ntŭk kan tơm bri ndăn ƀư trong nchrăp tăm bri, rdâk hao tay bri ta rnoh neh geh phah, UBND n’gor Lâm Đồng hôm ntĭm rđău kruanh UBND nkual ƀon têh Đà Lạt ƀư uănh nđôi ƀư kloh nău kan bah ăp ngih pah kan, ntŭk kan n’hanh êng nuĭh geh tât gay rmal tĭng nău ntrŭnh.

                    Nuĭh rblang: Y Sưng Phê Ja