Nău mbơh bah N’gâng kan ntĭm rđău Pôih tahen n’gor Dak Nông ôi 29/11, ăp ntŭk kan nău kan Tahen n’har bri Dak Nông lĕ nhŭp kân du hê dŏng ndeh công nông rdêng rlău 4 tạ pháo ntŭng ta nkual n’har bri ta xă Dak Lao, nkuăl Dak Mil.

Nuĭh Nguyễn Hữu Ngọc geh nhŭp kân n’hanh ndơ rlău 4 tạ pháo nkao.

Nuĭh geh nhŭng kân lah Nguyễn Hữu Ngọc, 45 năm deh, gŭ thôn Đức Đoài, xă Đức Minh, nkuăl Dak Mil, n’gor Dak Nông. Bah năp nĕ, ƀư tĭng trong nchrăp khay kan ndal mpeh njrăng n’gang nău tih, Pôih tahen n’har bri Dak Lao tâm rgop đah rmôt way kan mpeh tâm Tahen pôih n’har bri Dak Nông ƀư uănh nđôi, groi uănh ta nkual n’gâng ntăm 48/25, ta thôn Đức Kim, xă n’har bri Dak Lao, nkuăl Dak Mil. Ta aơ, rmôt tahen n’har bri lĕ băn Ngọc dôl ƀĭt ndeh công nông rdêng âk thùng cát tông tâm trôm geh ndơ ntôn lah ndơ mô an. Uănh nđôi ngăch ăp thùng ndơ, rmôt tahen n’har bri saơ rlău 400kg pháo nkao mpôn tâm trôm 14 thùng cát tông. Jênh sroh ôp, Ngọc mbơh rwăt pháo aơ bah du hê mô gĭt saơ n’hanh ntŭk gŭ, dôl rdêng sĭt mpôn gay tăch tâm rơh tết tât. Nu nău lĕ dơi rmôt tahen n’har bri Dak Nông ƀư jêh samƀŭt rhăch nău, jao an nuĭh n’hanh ndơ an Công an nkuăl Dak Mil, n’gor Dak Nông pơk hvi uănh nđôi, rmal tĭng nău dơi.