VOV4.M'nông: Nar 1/6, Quốc hội hŏ rgum hop lĕ rngôch ta hội trường, rgum tâm nchră mpeh uănh năl kơi ntop lôch jêh tĭng ƀư trong nchrăp hun hao wăng sa- rêh jêng kon nuĭh n'hanh ngân sách ngih dak. Ăp đại biểu rnê âk ăp nău dơi uĕh tâm pah kan njrăng n'gang nuh srê Covid-19. Yơn lah, âk đại biểu mpơl nău "đôl đal mô đêt" rnôk "geh prăk ma mô dơi n'gluh dŏng". Nkre dăn đă Chính phủ êng ŭanh khlay tât mât rnoh khlay pring xăng n'hanh ndơ sa. Ta năp măt an ƀư lor đăp mpăn wăng sa têh, mât kân hao khlay ndơ, đăp mpăn rêh jêng kon nuĭh. Ăp đại biểu ndơ̆ luh âk trong nkra gay ntrŭt ntrôl hun hao wăng sa tâm let năp tay lơn lah gay tât rnoh wăng sa dak he hao 6-6,5%, mât kân bah hao khlay ndơ 4% tâm năm aơ. Tâm nê dăn đă Chính phủ ân rdâk njêng lam trong kan ăp kôp, ntơm bah glêh nar, jong dah găp n'hanh jong năm, bên di đah ăp trong tor gĭt lor; lơn lah ân uănh khlay tât n'gâng kan tuch tăm mât rong, du n'gâng kan geh n'gâng ndăl khlay tâm rơh neh dak mâp âk jêr jŏt./.  

Nuĭh rblang: Điểu Thân