Lŏ tâm bôk nau kan bah rơh rƀŭn tal 4, Quốc hội gưl 15, ôi 7/11, ăp ntoh măt tâm nchră ta ngih rƀŭn bah 2 nau nchrăp nau ntrŭnh mpeh: “Rlong ƀư du đê̆ nau kan, nau kơl an ân du trong hun hao nkuăl ƀon têh Buôn Ma Thuột, n’gor Dak Lak” ndrel “Rlong ƀư nau pă nau dơi săch dŏng biển số ndreh ô tô bah trong leo tăch rvăt”; djăt nau mbơh ndel nau geh uănh bah bôk nau nchrăp luật Đấu thầu (rgâl nkra). Tâm nchră mpeh nau ntrŭnh mpeh nau rlong du đê̆ nau kan, nau ntrŭnh kơl ân hun hao nkuăl ƀon têh Buôn Ma Thuột, n’gor Dak Lak.

Ăp ntoh măt Quốc hội kŏ lah rjăp, aơ lah nau kan khlay gay ma ndâk, hun hao nkuăl ƀon têh Buôn Ma Thuột jêng ntŭk nklang tơm, geh hun hao ngăn bah nkuăl Tây Nguyên, yor nê ăp nau kan ân geh rjăp ndrel geh ntrong rƀŏng uănh. Tâm rơh tât, Chính phủ ndâk ăp nau kan ngăn ân lam nkuăl Tây Nguyên tĭng nau ntrŭnh 23 bah Bộ chính trị mpeh nau hun hao văng sa, rêh jêng ndrel đăp mpăn neh dak, rnă njrăng nkuăl Tây Nguyên tât năm 2030, rƀŏng tât năm 2045, Chính phủ mra uănh n’ôi gay ăp nau kan aơ geh lăp ngăn tâm nau rêh, lôch nau nchrăp ntop tay ân tâm di./.