VOV4.M'nông: Kêng măng 7/6, Quốc hội ntơm rơh ôp lor bôk năp tâm 2 nar n'gul ƀư rơh ôp n'hanh ơh nău ôp. Bộ trưởng Bộ Nông nghiệp n'hanh Phát triển Nông thôn Lê Minh Hoan lah nuĭh lor bôk năp ơh nău ôp bah năp Quốc hội. Lah ta rơh ntơm ôp n'hanh ơh nău ôp, Kruanh Quốc hội Vương Đình Huệ an gĭt, nău ôp ta rơh hop dja dơi ƀư tĭng trong sŏk rmôt nkô̆ nău ƀư rgum tơm, nkô̆ nău mpeh dơn kan bah nuĭh, nuĭh nê geh nău dơn ơh nău ôp. 4 rmôt nkô̆ nău ôp mpeh trong kan mât uănh ngih dak bah ăp Bộ: Tài chính, Nông nghiệp n'hanh Phát triển nông thôn, Giao thông vận tải, Ngân hàng Ngih dak Việt Nam ta rơh hop dja. Nkô̆ nău tuch tăm ntŭk tâm nchră ta Quốc hội duh khlay đah ăp nkô̆ nău ôp "Plơ̆ ntơm ndơ tuch tăm jŭr geh rnoh khlay hŭch" n'hanh ăp rơh kơl ndơ tuch tăm mô hŏ tât dŭt bah; nkô̆ nău rnoh khlay phân poh, dak si mât njrăng si tăm, ndơ sa mât rong, ăp ntil ndơ dŏng kan tuch tăm hao khlay. Ơh nău ôp bah ăp đại biểu quốc hội, ăp trong nkra Bộ trưởng Lê Minh Hoan lah rjăp nê lah nău dăp  rgum tay nău kan tuch tăm, rgŏ jă kônh wa lăp tâm Hợp tác xã. Nkre lah rjăp tât nău mĭn rgâl bah nău kan tuch tăm mât rong jêng nău mĭn wăng sa tuch tăm mât rong./.

  Bâh nău uănh djăt nău mbơh tơih bâh kruanh n’gâng kan tuch tăm mât rong n’hanh hun hao ƀon lan Lê Minh Hoan, wa Nay Hứ 66 năm deh, ƀon lan ta phường tây Sơn, nkuăl ƀon têh Pleiku, n’gor Gia Lai dŭt mât uănh tât ăp trong kan ma kruanh n’gâng kan ndơ̆ mbơh đah nău rnoh khlăy ndơ tuch tăm hao khlăy aƀaơ. Wa Nay Hứ ŭch, lôch rơh rƀŭn nchră, kruanh n’gâng kan tuch tăm mât rong n’hanh hun hao ƀon lan geh nău nchrăp kan na nê̆ an tâm di đah ăp ntŭk, ăp nkual tâm nău doh rklaih ăp nău kŏ văk tâm hun hao tuch tăm.

“Nău ŭch lah lôch rơh rƀŭn nchră, kruanh n’gâng kan geh nău nchrăp kan na nê̆, ntĭm đă, ntĭm leo răng dăng tă ăp nkual, ăp ntŭk an tâm di. Kơt lah ta Tây Nguyên, dŭt âk lah nău kan tuch tăm, mhâm ƀư gay ma ntĭm leo trong hăn tuch tăm bâh Tây Nguyên hăn di trong, geh săk rnglăy lơn”.

Nar aơ, kruanh n’gâng kan tuch tăm mât rong n’hanh hun hao ƀon lan Lê Minh Hoan geh mbơh ơh tay nău ôp ta năp Quốc hội. Lôch nĕ lah rơh ôp nău n’hanh ơh nău bâh kruanh n’gâng kan tơm prăk Hồ Đức Phớc n’hanh thống đốc ngân hàng ngih dak Việt Nam Nguyễn Thị Hồng.

Nŭh rblang: Thị Đoắt