Nthoi tay rơh hop tâl 6, ôi 9/11, Quốc hội tâm nchră ta hội trường mpeh nău rgâl di du đêt nkô̆ bah Nghị quyết bah Quốc hội mpeh siƀŭt mbơh gŭ mĭn geh nău dơi bah trong nchrăp sŏk mplơ̆ neh, ntrơn du ntŭk gŭ mhe tach ndeh păr Long Thành. Ta tâm nchră, Bộ trưởng Bộ Giao thông vận tải Nguyễn Văn Thắng an gĭt, mpeh nkô̆ nău ƀư jêng mbrơi, rlău ma ăp nkô̆ nău nchrăp lor kơt lor ƀư tơm hao mbơh rblang, siƀŭt mbơh bah Chính phủ nkoch kloh tât nkô̆ nău uănh lhơ tă bah nuĭh kan n’gâng tơm bah UBND n’gor Đồng Nai tâm rnôk tĭng ƀư trong nchrăp kan geh âk nău rgâl. Tĭng ăp đại biểu, rnoh ngăch ƀư tach ndeh păr Long Thành dôl dŭt mbrơi n’hanh mâp âk jêr jŏt.

Đại biểu an lah geh âk nkô̆ nău jêng tât geh nău dja, Chính phủ, n’gor Đồng Nai ân rblang kloh gay geh tay ăp nău tă ơm gĭt kơt nti n’hanh jêh aơ tay rnôk an ƀư ăp trong nchrăp kan tâm ban kơt nê mbra geh ăp trong nkra tâm di. Rlău ma nê, pah kan an ƀư đề án ntĭm nti nău kan, nta joi nău kan n’hanh dăp rgum tay nău rêh an nuĭh ƀon lan dơi ƀư dŭt mbrơi, tâm rnôk nê aơ lah nkô̆ khlay bah trong nchrăp kan. Đại biểu dăn đă gŭ mĭn, uănh năl na nê̆ n’hanh geh ăp trong nkra ngăn ngăn an nkô̆ nău dja./.