VOV4.M'nông: Ăp nar rlău aơ, ta n'har bri ăp n'gor Tây Nguyên, ƀư âk nău kan khuh n'gôr nkah ndray Nar rgum lam ƀon lan njrăng n'gang neh dak 3/3, wăch rgum âk mpưm ƀon lan ăp rnoi nuĭh ta ntŭk tât râng. Ta nkual n'har bri 2 n'gor Dak Lak n'hanh Dak Nông, Bộ Chỉ huy Bộ đội Biên phòng 2 n'gor  hŏ pă an ăp nklâm ndơ dŭt ngăn ngăn, ƀư an nuih n'hâm ƀon lan ta nkual n'har bri rhơn nđơr râng mât njrăng n'har bri neh dak.

N'gor Dak Lak geh trong n'har bri jong rlău 73km kâng n'har đah n'gor Mondulkiri, Campuchia. Nkual n'har bri n'gor Dak Lak lah 4 xã, mpeh 2 nkuâl Buôn Đôn n'hanh Ea Súp, lah ntŭk gŭ rêh bah rlău 22.000 nuĭh mpeh 26 rnoi nuĭh. Năm 2021, gưl ủy, n'gâng kan ăp n'gor hŏ kan nsum lhăt đah Tahen n'har bri mât njrăng nâp ƀư tơm neh dak, rnă njrăng n'har bri neh dak, mât nâp rnă njrăng ta nkual. Na nê̆, ta ăp xã n'har bri hŏ geh 26 mpôl, rlău 480 rnăk, rlău 1.600 nuĭh đăng ký râng mât njrăng êng n'har bri, n'gâng n'har bri. Rlău ma nê, nuĭh ƀon lan ta 51 thôn, ƀon n'har bri ký ton râng rlăch ndăng, njrăng n'gang nuĭh tih.

Tĭng wa Trần Lệ Thuỷ, Bí thư Đảng uỷ xã Ia Rvê: Trong leo ƀư “Lam ƀon lan râng mât njrăng neh dak, rnă njrăng n'har bri neh dak tâm nô nău mhe" hŏ mât uĕh nuih n'hâm dâk êng bah nsum mpôl ƀon lan râng hăn rsong uănh n'har bri, năn ngăch nking nchăng ăp nău tih pháp luật.

“Mhe aơ kônh wa tĭng jăp nău way n'har bri lah dŭt lhăt. Nô nău tih nău way n'har bri gay hăn lơh joi, nchron pănh hŏ bah đêt. Kônh wa hŏ geh nău gĭt êng ăp nuĭh ƀon lan mbra lah du n'gâng rêh gay mât njrăng ƀư tơm rnă njrăng n'har bri. Mô dơn kônh wa gĭt êng mô tih nău way n'har bri ma kônh wa hôm lah tôr măt an gưl ủy, n'gâng kan ta ntŭk tâm ban kơt pôih n'har bri đŏng rnôk saơ geh nuĭh mha êng, geh nkô̆ nău nchuăt rlău n'har bri".

N'gor Dak Nông geh trong n'har bri jong rlău 140km kâng n'har đah n'gor Mundulkiri (dak Campuchia), hăn rlău 7 xã n'har bri. Ta "Nar rgum lam ƀon lan njrăng n'gang neh dak" ƀư ta ăp xã n'har bri, ndrel đah ăp nău kan văn hoá njroh mprơ săk tơm văn hoá rnoi nuĭh, ăp đại biểu hŏ tâm pă nău tă ơm gĭt kan tĭng ƀư tâm rlong tâm dâng. Ntĭt kơt ta xã Thuận An, nkuâl Dak Mil, 6 rmôt mât njrăng êng trong n'har bri hŏ nsrôih râng ndrel mpôl tahen n'har bri mât njrăng n'har bri, n'gâng n'har bri neh dak. Năm rlău aơ, âk rnăk ƀon lan ta ntŭk hŏ rong neh, an manh jay mir gay cán bộ, tahen ƀư ntŭk gŭ kâp njrăng nuĭh luh lăp mô geh nău way n'hanh njrăng n'gang nuh srê Covid-19 ta n'har bri.

        Tâm nar rgum lam ƀon lan njrăng n'gang neh dak ta xã Thuận An, Bộ Chỉ huy Tahen n'har bri n'gor Dak Nông hŏ ntăm an Kỷ niệm chương “Yor ƀư tơm rnă njrăng n'har bri" an 1 hê nuĭh hŏ geh âk nău rgop tâm n'gâng kan mât njrăng ƀư tơm, rnă njrăng n'har bri neh dak. Ủy ban MTTQVN n'gor Dak Nông n'hanh Tahen n'har bri n'gor hŏ pă an 2 mblâm jay tâm rnglăp an ăp rnăk geh nău rêh jêr jŏt. Ntơh măt n'gâng kan ta ntŭk nkhôm rnê an ăp mpôl, ăp nuĭh geh nău dơi ngăch prăl tâm trong tĭng ƀư lam ƀon lan râng mât đăp mpăn rnă njrăng ta nkual n'har bri năm 2021; pă an nuĭh geh nsing nơm, rnăk ach o ta xã Thuận An. Tahen n'har bri n'gor Dak Nông hŏ pă an 7 nklâm ndơ pă an ăp kon se nti tâm bôk nău kan "Ndơl jâng oh hăn tât nhhih nti" n'hanh "Kon mât pôih n'har bri" ta Thuận An./.

Nuĭh rblang: Điểu Thân