Tâm ăp nar dja ta n’gor Kon Tum, Dak Lak ƀư rgop, kơl nuĭh ƀon lan ăp n’gor, nkual ƀon têh mpeh Bắc geh tât khuch  khat tă bah dak bŭk lơh dơi mât uănh khlay, tâm kơl bah âk mpưm cán bộ n’hanh nuĭh ƀon lan ta ntŭk. Ta ăp nhih nti, đah nuih n’hâm “tâm yô̆, tâm kơl”, ăp kon se nti n’hanh me bơ̆ dôl lĕ nuih n’hâm rgop kơl roh yot, rngot ji đah nuĭh ƀon lan nkual geh dak bŭk. Nău dŭt khlay lơn đŏng lah ma ăp nău kan rƀŏng sĭt mpeh ƀon lan nkual geh dak bŭk, ăp kon se nti dơi ntĭm nti hao âk tay nuih n’hâm rŏng nuĭh, tâm pă, tâm kơl ƀon lan  geh nău rêh jêr jŏt, rmoh rman ji sât boh ji gloh ba.

Ntơm du nar nti mhe, nai ntĭm n’hanh 930 kon se nti Nhih nti Tiểu học Quang Trung, nkual ƀon têh Kon Tum, n’gor Kon Tum rong an uănh 10 mnĭt rup gui nhih nti bah nkual geh dak bŭk ăp n’gor, nkual ƀon têh mpeh Bắc.

“Nar aơ nai ntĭm ndrel ăp kon se nti mbra uănh gâl phim glêh rƀŏng tât ƀon lan mpeh Bắc dôl geh trôk nar lơh gay an saơ dơi ăp khuch khat, roh yot bah ƀon lan mpeh Bắc”.

 Oh Nguyễn Hữu Bảo Anh, kon se nti jrô 4A, an gĭt:

“Lôch rnôk uănh  ăp gâl băng gâp dŭt yô̆ nđach ƀon lan mpeh Bắc bah he ji ngot ji kăt n’hanh ân uănh saơ rnăk wâl he geh dak bŭk klôr rdu. Gâp mpŏng lah phŭt dja ngăch hăn rlău gay an miền Bắc plơ̆ đăp mpăn tay”.

Ta năp măt, rngot ji bah nuĭh ƀon lan geh dak bŭk, Ban giám hiệu Nhih nti Tiểu học Quang Trung rgŏ jă rơh rgop kơl n’hanh dơi kon se nti tâm ban kơt me bơ̆ ăp kon se ŭch tĭng kơl rlău dơi nău mpŏng kâp. Ti nơm ƀư êng du bì thư bah siƀŭt nchih đah rup play nuih n’hanh nchih “njuăl miền Bắc” tâm nê geh 200.000 prăk, oh Đỗ Hồng Anh, nti jrô 3C, lah kơt aơ:

“Prăk dja lah prăk bah nhih pah kan Bơ̆ an gâp sa Tết Trung thu yơn ma gâp saơ ăp nuĭh ta mpeh Bắc geh dak bŭk dŭt krit ngăn jêng gâp hŏ ƀư du phong bì dja gay an ăp nuĭh. Gâp mpŏng miền Bắc mbra uĕh tay n’hanh dak bŭk mbra mô hôm ntoch jong tay đŏng ôh”.

Lôch du nar rgŏ jă, Nhih nti Tiểu học Quang Trung, nkual ƀon têh Kon Tum hŏ rgop geh bơi 25 rkeh prăk; 114 thùng mỳ tôm, dak rchŏk; 20 thùng dak toh, bánh kẹo; 8 ao đông; nklăp 400 blah kho ao ndrel âk ndơ dŏng sa khlay n’hanh dak si săm ji. Nai ntĭm Đậu Thị Lan, Hiệu trưởng Nhih nti Tiểu học Quang Trung, an gĭt lĕ rngôch rnoh prăk ndrel ăp ndơ dŏng sa khlay ma kon se nti n’hanh me bơ̆ ăp kon se kơl mbra dơi nhih nti ngăch njuăl tât nuĭh ƀon lan nkual geh dak bŭk. Tĭng nai Đậu Thị Lan, nău dŭt khlay lah ma nău  kan dja, ăp kon se nti dơi ntĭm nti, n’hao âk tay nuih n’hâm rŏng nuĭh, tâm mât tâm kơl ƀon  lan geh nău rêh jêr jŏt:

“Bah năp nô nău dak bŭk trôk nar lơh geh ta mpeh Bắc ma aƀaơ ƀon lan dôl mbăk anh, ntĭm nti ăp kon se mpeh nuih  n’hâm rŏng nuĭh, nău ndrel nuih n’hâm tâm pă dŭt khlay. ăp kon se saơ săk he nơm dơi rgop kơl du đêt ndơ nê nơh gay kơl an ƀon lan mpeh Bắc ma ăp nklâm ndơ lah dŭt khlay. Nhih nti dŭt rngot rhơn yor dơn geh nău ndrel hăn bah me bơ̆ kon se ntĭm nti ăp kon se mpeh nuih  n’hâm rŏng nuĭh”.

Ta nkual ƀon têh Buôn Ma Thuột, n’gor Dak Lak hŏ ƀư âk nău kan geh nkô̆ khlay tâm khay Trung Thu năm aơ, kơt: pla n’hơ rup njăr trong hăn “Lồng đèn mpoh  ang nău wơl geh” bah 63 n’gor, nkual ƀon têh; sa nkra, kơl an “ntŭk gŭ rŏ siƀŭt, tâm dâl n’hanh sinh hoạt Đội”, tâm rlong pla ndơ  trung thu, nkrơ̆ uĕh lồng đèn; wơt đèn, múa lân. Oh H’ Kim Anh Niê, jrô 5C, nhih nti tiểu học Lê Lợi, ta nkuâl Ea Kar, n’gor Dak Lak nkoch:

“Nar aơ gâp dơi râng dŭt âk nău  kan, gâp saơ dŭt rhơn  n’hanh mƀak rnôk dơi râng du bôk  nău kan têh kơt aơ. Măng aơ gâp hôm dơn geh dŭt âk nklâm ndơ n’hanh học bổng, lah uĕh kônh yơ hŏ mât uănh ntop kơl ăp băl geh nău rêh jêr jŏt. Gâp ton mbra nsrôih nti jăp blău”.

Yuh Nguyễn Phạm Duy Trang, Bí thư Ban Chấp hành Trung ương Đoàn, Kruanh Hội đồng Đội Trung ương an gĭt, ndrel đah Dak Lak, tâm khay trung thu năm aơ, Trung ương Đoàn mbra ndơ̆ kơl 15.000 nklâm ndơ n’hanh 330 nklâm học bổng an kon se âk n’gor nkual ƀon têh; Ndơ̆ 4 ntŭk pâl an kon se jê̆ ăp n’gor Gia Lai, Dak Nông, Lạng Sơn n’hanh Cao Bằng. Ntop kơl prăk măt n’hanh ndơ dŏng sa khlay an kon se jê̆ ta 15 n’gor, nkual ƀon têh geh tât khuch tă bah phŭt mbrô 3 lơh (me phŭt Yagi). Lĕ rngôch rnoh khlay ăp nău kan lah bơi 13 rmen prăk:

“Tĭng nău kuăl jă bah Ban bí thư Trung ương Đoàn, ăp gưl đoàn, đội, lơn lah ăp kon se jê̆ lam dak hŏ ndrel nsum ti tĭng ƀư ăp nău kan gay ntop kơl, tâm pă đah ăp kon se jê̆ ta ăp n’gor mpeh Bắc. Ăp nklâm ndơ jê̆ mô dơn nsĭt tay âk nău rhơn,ntop tay suan dăng an ăp  kon se mô geh nău lap ma hôm ntăm tâm nuih n’hâm ăp kon se nău rŏng, nuih n’hâm kơl nuĭh, nău tâm pă đah nsum mpôl đŏng”.

Ta măng pâl, tâm  mông nar khuh n’gôr, ăp kon se jê̆ dơi uănh ƀư múa lân n’hanh ăp nău njroh mprơ  mpeh nkô̆ hôr Tết Trung thu, pơk ƀoh sŏng dăng tât đah kon se ăp n’gor Hải Phòng, Lâm Đồng, Bình Dương, Tiền Giang n’hanh nkual ƀon têh Hồ Chí Minh. Ban tổ chức hŏ kơl an 1.700 nklâm ndơ lah học bổng, ndeh wah jâng n’hanh nklâm ndơ trung thu an ăp kon se jê̆ geh nău rêh jêr jŏt ta n’gor Dak Lak.

Lah ta măng ƀư, Groi Thủ tướng rnâng kan Chính phủ Nguyễn Hòa Bình rnê, n’hao ăp kon se jê̆ yor ăp nău nsrôih âk tâm kơt nti, tiăr nti, nsrôih nsan hao tâm nău rêh. Mpŏng ăp kon se ntik n’hao nău way ơm chrat ang bah kon se jê̆, druh ndăm rchong Việt Nam.

 “Wa mpŏng ăp mon său  dơi rhơn Trung thu răm mƀak ndrel ăp nuĭh tâm rnăk wâl bah he, tĭng ƀư jăp tay 5 nău Wa Hồ ntĭm, nsĭt n’glĭng đah u che, me bơ̆, n’guh mbah nai ntĭm, gĭt siƀăp đah bu kuâng, tâm rnglăp, tâm pă, tâm kơl ăp băl geh nău rêh jêr jŏt, lơn lah ăp băl dôl geh tât khuch hô bah phŭt, dak bŭk lơh, gay ndrel krêp dêh nhih nti, krêp dêh jrô nti; jăp gơih kơt nti n’hanh tiăr nti nuih n’hâm uĕh lŏng nău gĭt blău gay jêh aơ tay jêng nuĭh tơm mât rdâk njêng neh dak he nar lơn ma têh ndrŏng uĕh, rsang rnglăy”.