VOV4.M’nông – Ôi 10/5, ta nkual ƀon têh Hồ Chí Minh lĕ ƀư Rƀŭn nchră lam ntŭk tăch rgâl điện tử Việt Nam 2022 đah bôk nău “Tăch rgâl điện tử ntrôl wăng sa jêh srê”. Ta rƀŭn, ăp nuĭh ntoh măt an lah: Tăch rgâl điện tử lĕ ƀư rgâl dŭt têh nău tăch rgâl bah doanh nghiệp n’hanh nău bên rwăt năp nuĭh dŏng, ngăn lah rnôk geh chôt srê Covid-19.

Ăp ntoh măt tâm nchră ta rƀŭn

Tăch rgâl điện tử lĕ hun hao dăng tâm lvang 2020-2021 n’hanh nchroh mbơh mbra geh âk nklăp 39 rmen đôlar tâm năm 2025. Aơ lah trong hun hao nâp nâl tâm nău âk ntil ăp trong tăch ndơ tâm năm tât, bôl geh chôt srê đŏng lah mô. Kơp tât n’gul bôk năm 2021, Việt Nam geh rlău 8 rkeh nuĭh dŏng trực tuyến mhe. Aƀaơ, ăp nuĭh tăch rgâl ta ntŭk tăch điện tử têh rgum âk ta Hà Nội n’hanh nkual ƀon têh Hồ Chí Minh. Bah năm 2021 tât aƀaơ, rnoh ndoh ndơ tăch ta ntŭk tăch điện tử hao bah 1,5-2 tơ̆ nkôp đah rnôk bah năp srê.

Nuĭh rblang: Y Sưng Phê Ja