VOV4.M’nông: Ta Hà Nội mhe ƀư rƀŭn nchră lĕ rngôch Ủy ban ngih dak mpeh druh ndăm Việt Nam rơh bôk năp. Ntoh ngơi ta rƀŭn nchră, Groi thủ tướng Vũ Đức Đam lah rjăp: “Ntoh lư lơ têh, nău kan lư têh, Ủy ban Ngih dak mpeh druh ndăm Việt Nam an mbơh ƀư ăp nău kan mô knŭng mĭn uănh uĕh druh ndăm ma hôm mât soan mom, mĭn ƀư mhe, nău nsơr an druh ndăm Việt Nam”. Ta rƀŭn nchră, lĕ ƀư mbơh nău ntrŭnh 282 bah Thủ tướng Chính phủ ntrŭnh gưl kan, nău kan, nuĭh dơi mkra nău n’hanh trong ƀư bah Ủy ban ngih dak mpeh druh ndăm Việt Nam.

Druh ndăm Việt Nam aƀaơ geh rlău 22,1 rkeh nuĭh, geh 22,5% rnoh nuĭh ƀon lan lam dak. Druh ndăm nkual ƀon lan geh bơi 60%, druh ndăm nkual ƀon têh rlău 40%. Rnoh druh ndăm tŏng dơi pah kan tâm dĭng lĕ druh ndăm ta rnoh năm pah kan geh 98,%. Uănh nsum, druh ndăm đăp mpăn, nsing nơm n’hanh kơl ăp nău ntrŭnh bah Đảng, nău ntĭm rđău ƀĭt joet dŭt n’hâm bah Chính phủ, lơn lah nsing tâm nău ntrŭt nsôr, rdâk hao wăng sa bah Chính phủ mbra mât săk rnglăy. Dŭt âk druh ndăm geh nti ren, mô rlu tiăr nti, nsrôih gay rdâk njêng nău kan, nsrôih râng ăp nău kan njrăng n’gang srê covid-19, trôk nar lơh, nar lơ tâm di đah ăp nău kan, tăch rgâl, nti nsơm, tâm nđŭr tâm rgâl tâm nău chôt srê geh jêr jŏt, jŏ jong.

Ta rƀŭn nchră lĕ rngôch Ủy ban Ngih dak mpeh druh ndăm Việt Nam rơh bôk năp, ăp đại biểu uănh lah, năm 2021, Chôt srê Covid-19 khuch âk tât druh ndăm, nău kan nti ren, nău rêh, nău geh tăch proăt. Yơn lah, ăp nău ƀư bah druh ndăm geh âk nău lư, druh ndăm lĕ geh nău tâm rnglăpo, ndrel soan, ndrel nuih n’hâm, lĕ nău kan đah Chính phủ n’hanh nsum mpôl. Bah meng nĕ, ăp nău ƀư lĕ nsrôih ƀư ăp nău kan druh ndăm đah trong ƀư tâm di; ndâk njêng ăp sam ƀŭt ntĭm Luật druh ndăm 2020... Tĭng wa Nguyễn Thị Bích Ngọc, Groi kruanh n’gâng kan Kế hoạch n’hanh Đầu tư, năm tât, druh ndăm an hăn ban rơh mhe, an n’hao kan ndrel lam ntŭr neh, ntrôl dăng rdâk njêng nău kan ƀư mhe:

Lam ntŭk rƀŭn nchră nsum mpôl Ủy ban ngih dak mpeh druh ndăm Việt Nam rơh bôk năp.

“Ngâng kan lĕ tâm rgop ăp n’gâng kan, nău kan, hiệp hội gay ntop kơl, tâm rgop đah Hội LHTNVN tâm pă trong nchrăp prăk ntop kơl doanh nghiệp jêt n’hanh dah găp. Năm tât, mpôl hên ntop kơl druh ndăm tâm nĕ rgum ntĭm nti, mât uănh doanh nghiệp jêt n’hanh dah găp rdâk njêng nău kan ƀư mhe. Mpeh trong hun hao druh ndăm lvang 2021-2030, he an ndâk njêng rnoh ndơ ƀơ uănh lah săk rnglăy ƀư”.

Ntoh ngơi ta rƀŭn nchră, Groi Thủ tướng Vũ Đức Đam lah rjăp: Aƀaơ, druh ndăm mô tŏng 18 năm deh lĕ geh nău wât rêh jêng, đah ân nău kan hvi têh âk rơh hăn lor. Aơ lah ngoăy tâm âk ntŭl rlong an Ủy ban Ngih dak mpeh druh ndăm Việt Nam. Groi thủ tướng Vũ Đức Đam đă, năm tât Ủy ban n’hanh Trung ương Đoàn an wât na nê̆, ndâk njêng ăp nău ƀư tay dơi mât soan mĭn ƀư mhe bah druh ndăm Việt Nam rnôk mhe.

Lah rjăp nău uănh mĭn bah Chính phủ n’hanh Thủ tướng Chính phủ n’hanh đah druh ndăm n’hanh trong kan druh ndăm, Groi Thủ tướng Vũ Đức Đam đă ăp n’gâng kan nău kan an tâm rgop rjăp đah Ủy ban Ngih dak mpeh druh ndăm Việt Nam n’hanh Trung ương Đoàn ƀư ăp bôk nău kan na nê̆, tĭng di nuih n’hâm bah Chính phủ. Groi Thủ tướng Vũ Đức Đam đă:

“Trong nchrăp ƀư tĭng druh ndăm lvang mhe, trong kan mbơh ƀư rnoh ndơ ƀư kơp uănh druh ndăm Việt Nam, an dơi ƀư, mpŏng druh ndăm hăn lor tâm ƀư tĭng, dŏng công nghệ kơl trong kan ntrong leo bah ăp nsum mpôl ƀư ngăn lơn. Wăch rgum nuĭh gĭt blău, druh ndăm tốt nghiệp gĭt, nău kan aơ an tâm rgop rjăp đah n’gâng kan đah nsum mpôl gay ntrong leo ƀư uĕh lơn”.

Groi Thủ tướng Vũ Đức Đam ntoh ngơi ta rƀŭn nchră.

Groi Thủ tướng Vũ Đức Đam mpŏng tâm nău ƀư ăp nău kan ndrel lam ntŭr neh bah mpôl druh ndăm đah đoàn viên ăp dak tâm nkual n’hanh lam ntŭr neh, ăp nău kan an tâm rgop mbơh ƀư têh dăng lơn, gay nău kan aơ ƀư đah nău tâm rgop ntop kơl bah n’gâng kan.

Tâm năm 2022, Ủy ban ngih dak mpeh druh ndăm Việt Nam n’gluh an du đêt nău kan khlay kơt: Tâm rgop mĭn njêng, dăn đă ndâk njêng trong ƀư, nău kơl mpeh druh ndăm n’hanh trong kan druh ndăm; ƀư rƀŭn nchră, tâm nchră nău kơl druh ndăm; tâm rgop ntrŭt đă ăp n’gâng kan nău kan, ƀon lan ƀư tĭng Luật Druh ndăm năm 2020, ăp sam ƀŭt sam tra ntĭm ƀư tĭng Luật Druh ndăm năm 2020, Nău kan hun hao druh ndăm Việt Nam lvang 2021-2030; ƀư kơp uănh, groi nđôi, uănh lah nău ƀư tĭng nău kơl, pháp luật đah druh ndăm tŏng 16 năm tât bah dâng 18 năm deh n’hanh du đêt nău kan êng; Rdâk ƀư nău kan tâm nchră ngih dak đah druh ndăm./.

          Nuĭh rblang: Y Sưng Phê Ja