Ôi 2/4, ta n’gor Khánh Hòa, Rƀŭn nchră mbơh dăp rgum n’hanh ntrŭt ngăch ntuh kơl n’gor Khánh Hòa năm 2023 yor N’gâng kan Kế hoạch n’hanh Đầu tư tâm rgop đah n’gor Khánh Hòa lĕ geh ƀư. Thủ tướng Chính phủ Phạm Minh Chính râng n’hanh ntoh ngơi ntĭm rđău. Rƀŭn nchră mbơh dăp rgum n’hanh ntrŭt ngăch ntuh kơl ta n’gor Khánh Hòa năm 2023 lah du nău ƀư dŭt geh nkô̆ nău khlay, di tâm rơh nkah gĭt 370 năm ndâk njêng n’hanh hun hao n’gor Khánh Hòa n’hanh 48 năm Nar rklaih đăp mpăn Khánh Hòa.

Mpeh trong rƀŏng, nău kan, trong mkra khlay tâm khay tât, Thủ tướng Phạm Minh Chính đă, Khánh Hòa ndăn ƀư jêh, mbơh ƀư săk rnglăy ăp Dăp rgum, ngăn lah dăp rgum khlay lĕ dơi uănh an mhe dơi mbơh, an tâm pă, mât uănh tâm ban ŭch, đăp mpăn nău tâm rgop, tâm ban, kơp dơn ngoăy, săk rnglăy n’hanh hun hao nâp nâl đah trong uănh jŏ jong, nchrŏng trong hun hao lĕ rngôch, tâm rgop nkual, mât uĕh nău geh, nău dơi, hun hao têh dăng wăng sa, rêh jêng n’hanh mât njrăng ntŭk ntô gŭ âm.