Ăp năm rlău aơ, cán bộ, tahen Pôih n’har bri bah mpông n’har bri Đăk Ruê (Tahen n’har bri Dak Lak) hŏ tĭng ƀư jăp ăp bôk nău kan “Kon mât pôih n’har bri”, “ndơl jâng oh tât nhih nhih”, “Chor jay n’hŭt răm n’har bri” mô lah ăp trong ntĭt leo tăm ba lŏ, mât rong ndrôk deh kon, kơl an be ntil… kơl ƀon lan  jut jăng ji ngot n’hŭch ach o, đăp mpăn nău rêh, nuĭh ƀon lan nsing nơm tay tâm mpôl tahen n’har bri, ndrel râng mât njrăng n’har bri nâp dăng bah neh dak. PV Tuấn Long, Nhih pah kan way gŭ kan nkual Tây Nguyên, geh nău nchih mpeh pah kan rdâk njêng ntŭk nsing nơm ƀon lan bah cán bộ, tahen Pôih n’har bri mpông n’har bri Đắk Ruê, jă kônh wa n’hanh băl mpôl djăt ndrel.

Nkah tay nău rhơn ăp nar tâm rnôk lam dak khuh n’gôr tât nkah ndray 78 năm nar Quốc khánh 2/9/2023, ur sai wa Hoàng Minh Lý, 79 năm deh, thôn 8, xã n’har bri Ea Bung, nkuâl Ea Súp nha hôm nkah mô blău nkoch. Nkhêp geh rnôk dja, ur sai păng dơi Pôih n’har bri mpông n’har bri Đắk Ruê ndrel du đêt nuĭh lŏng nuih n’hâm kơl ƀư jay “n’hŭt răm n’har bri” rnoh khlay 80 rkeh prăk. Păng nkoch, ta năm hŏ bơi tĭng drô phan hôm geh kô ji đŏng, nău ƀư dơi bu blâm jay têh uĕh lah du nău wơl tâm du bông nău rêh:

“Gâp dŭt rhơn, rhơn yor ăp tahen n’har bri hŏ kuăl jă ăp nuĭh lŏng nuih n’hâm kơl an rnăk mon ƀư  an  gâp du mblâm jay n’hŭt răm n’har bri. Rnôk mon ƀư lôch jêh hôm, gâp lăp gŭ ta aơ ri mô rvê jay truh mih, sial khôm. Gâp geh jay têh uĕh gŭ rêh mbra n’hao dăng n’hâm suan n’hanh ntoch jong năm rêh”.

Ea Bung lah ngoăy tâm 3 xã n’har bri bah nkuâl Ea Súp. Lam xã aƀaơ geh 1.053 rnăk đah rlău 4.100 nuĭh, mpeh 8 rnoi mpôl oh nô ndrel gŭ rêh. Rnă njrăng ta ntŭk way dơi mât nâp, nău rêh ƀon lan nar lơn ma dơi n’hao prêh. Wa Trần Thanh Thản, Kruanh Ủy ban Mặt trận Tổ quốc Việt Nam xã Ea Bung nkoch, dơi geh nău dja du gâl nơm geh nău ntop kơl bah mpôl tahen Pôih n’har bri mpông n’har bri Đắk Ruê:

“Ăp năm ăp mpôl  tahen  pơk rơh rgŏ jă trong leo mât rnă njrăng neh dak nkual n’har bri, n’hanh an ƀư ăp jrô kơi năp nti an kônh wa n’hanh kơl kônh wa yơng ba ntil săk jêng uĕh, kỹ thuật mât chăm ndrôk deh kon. Nkre, tâm ăp rnôk lễ, Tết ăp năm pôih n’har bri tât ôp khâl, pă nklâm ndơ ăp rnăk ach o, rnăk dơi kơl gay rgŏ jă khân păng rhơn wơt Tết đăp mpăn rhơn mƀak”.

Pôih n’har bri mpông n’har bri Đắk Ruê aƀaơ mât njrăng trong n’har bri nklăp 8km n’hanh n’gâng 42 mpeh xã n’har bri Ea Bung, nkuâl Ea Súp, n’gor Dak Lak, kâng n’har đah n’gor Muldulkiri, dak Campuchia. Thượng tá Phạm Đức Khá, Chính trị viên Pôih n’har bri mpông n’har bri Đắk Ruê an gĭt, ăp năm aơ, ndrel đah nău dơn kan mât njrăng nâp ƀư tơm rnă njrăng n’har bri neh dak, ăp cán bộ, tahen bah pôih hôm rdâk njêng nâp ntŭk nsing nơm nuih n’hâm ƀon lan.

Đah trong rƀŏng, “Pôih lah jay, n’har bri lah ƀon tơm, ƀon lan ăp rnoi mpôl đê̆ lah oh nô du ndŭl mham”, pôih hŏ tĭng ƀư geh nău tam pah kan ntop kơl đăp mpăn lam rêh jêng kon nuĭh ma ăp bôk nău kan kơt: pêt mât Me Việt Nam dăng jay, "kon mât pôih n’har bri”, “ndơl jâng oh tât nhih nti”, nar rgum nklâm bánh chưng, ƀư jay “n’hŭt răm n’har bri”, ntop kơl ăp trong ntĭt leo hun hao wăng sa jut jăng ji ngot n’hŭch ach o. Ndrel đah nê, pôih hôm nsrôih grêt dăch tâm dâng, ntop kơl Đảng ủy, n’gâng kan ta ntŭk rdâk njêng ntŭk ntô ndơ dŏng tâm thôn ƀon, nsŏng kơl rdâk njêng ăp chi bộ nar lơn ma nâp dăng lam lĕ rngôch, tĭng ƀư geh nău tam ăp trong kơl bah Đảng, Ngih dak. Thượng tá Phạm Đức Khá an gĭt:  

        “Aƀaơ mpôl hên geh 16 oh nô đảng viên ta rmôt pah kan râng sinh hoạt manh ta 6 chi bộ ta ăp thôn; n’hanh 16 cán bộ dơi jao nău dơn kan mât uănh ăp rnăk ach o ntŭk n’har bri. Bah mpôl kan dja, mpôl hên way rđău đă gay grêt dăch ăp chi bộ tâm dâng gay tĭng ƀư ăp Nghị quyết bah n’gâng kan ta ntŭk mhâm ƀư an dăch dêh đah nô nău ngăn ngăn. Bah nê, nsŏng kơl an gưl ủy ăp gưl gay ndrel n’gâng kan ta ntŭk rdâk njêng xã nar lơn ma têh dăng, ƀon lan ta ntŭk n’har bri nar lơn ma geh nău rêh hơm răm n’hanh đăp mpăn lơn”.

Nău ntop kơl bah mpôl tahen n’har bri hŏ rgop kơl Ea Bung jêng xã n’har bri lor bôk năp ta Dak Lak tât di rnoh rdâk njêng ƀon lan mhe tâm năm 2021. Nău rêh nar lơn ma dơi n’hao prêh, kônh wa nsrôih râng ndrel ăp mpôl tahen n’har bri mât đăp mpăn rnă njrăng, mât nâp ƀư tơm, rnă njrăng n’har bri./.