Aƀaơ n’gor Kon Tum geh rnoh âk cán bộ, công chức, viên chức nuĭh rnoi mpôl đê̆ ƀư ăp kruanh rđău kan, mât bôk kan ta gưl n’gor geh rlău 8,9%, gưl nkuâl geh rlău 14,9% n’hanh gưl xã geh rlău 33%. Rnoh dja dơi UBND n’gor Kon Tum uănh năl lah di trong tor gĭt lor n’hanh trong nchrăp ndơ̆ luh.

Yơn lah, hăn lăp jru joi gĭt ri rnoh âk cán bộ, công chức, viên chức nuĭh rnoi mpôl đê̆ ta du đêt nhih pah kan, đơn vị, n’gâng kan gưl n’gor; đơn vị jrô kan rnâng kan gưl nkuâl, ăp nhih pah kan ngih dak hôm đêt, dăp rgum mô hŏ tâm ban; pah kan sơch lăp nuĭh kan, tâm pleh nuĭh kan, ntăm n’hao, tâm pă cán bộ nuĭh rnoi mpôl đê̆ hôm mbrơi; pah kan dăp rgum,  ntĭm nti, kơi năp, tâm pă dŏng tơm cán bộ nuĭh rnoi mpôl đê̆ ta du đêt nkuâl, đơn vị mô hŏ ăp kôp, nsĭt geh nău tam mô hŏ âk…Ndrel đah nê mô đêt cán bộ, công chức, viên chức nuĭh rnoi mpôl đê̆ hŏ lôch ntĭm nti yơn nha hôm mpăng đêt nău blău mât bôk kan, nău way kan.

Deh tâm rnăk geh nău way ơm cách mạng, mê̆ nuĭh Xơ Đăng, bơ̆ nuĭh Yuăn, wa Nguyễn Thị Liên, Bí thư Huyện uỷ Đăk Hà, nkoch sŏng, ndrel đah nău nta trong dơh bah gưl uỷ, n’gâng kan, cán bộ nuĭh rnoi mpôl đê̆ ân nsrôih gay rlău dơi săk he nơm:

“Gâp saơ ngăn lah du đêt cán bộ nuĭh rnoi mpôl đê̆ lah nuih n’hâm n’hanh nău dơn kan gâp saơ ndrât ndal n’hanh way nuih kŏng. Hôm săk blău cán bộ mpeh Ban Thường vụ Huyện uỷ mât bôk kan du đêt cán bộ nău blău mât bôk kan mpeh ăp trong kan chính trị, wăng sa, văn hoá mô geh nău blău mhe, mô ngăch rƀah. Cán bộ nuĭh rnoi mpôl đê̆ ân geh nău nsrôih âk lơn đŏng”.

Bah năp nău ŭch geh dơn kan tâm rơh cách mạng mhe, nkô̆ nău n’hao rnoh âk, săk blău rmôt cán bộ nuĭh rnoi mpôl đê̆ bah n’gor Kon Tum dôl dơi n’gluh du trong ndăn khlay. Yơn lah, ngăn an saơ bol n’gor dôl tĭng ƀư trong rƀŏng cán bộ rbăn lhơ, khoah mpeh ntil nău ri kơt năp nti ntil nê n’hanh uănh khlay kơi năp nti nău blău mât bôk kan, rđău kan, ƀĭt juet, yơn rnôk tĭng ƀư hôm mâp du đêt nău kŏ kol geh tât trong kơl ntĭm nti, kơi năp nău gĭt blău an cán bộ nuĭh rnoi mpôl đê̆ đêt geh trong n’hao  nău blău rnâng kan. Wa Lê Viết Nam, Groi Giám đốc Sở Nội vụ n’gor Kon Tum an lah, ăp kŏ kol dja ân dơi droh rklaih ngăch:

“Aƀaơ Nghị định n’hanh Thông tư ntĭm nti lah dơn geh công chức hăn lăp ntĭm nti dơm ri mơ dơi ntop kơl. Hôm viên chức ri kruanh nhih pah kan ân sŏk dŏng ma aƀaơ dôl tĭng ƀư mât dŏng êng tơm prăk, Kruanh nhih pah kan ma an oh nô viên chức hăn nti hôm ma sŏk tay prăk bah nhih pah kan đŏng kơt lah nău dja dŭt jêr ƀư. Tâm bah ri aơ nơh lơn âk viên chức lah hăn nti êng. Aƀaơ pah kan ntĭm nti, kơi năp nti ăp du ntil jrô nti nê nơh ân tĭng trong ƀư tâm rlong rêng ƀư siƀŭt dŭt âk mpưm jêr jŏt”.

Tâm ăp năm aơ du tơm ndơ khlay bah pah kan rdâk njêng, njêng tơm cán bộ nuĭh rnoi mpôl đê̆ ƀon  tơm ta ntŭk bah n’gor Kon Tum lah rêng nhih nti dân tộc nội trú. Oh kon ăp nuĭh rnoi mpôl đê̆ tâm n’gor dơi Đảng, Ngih dak n’hanh n’gâng kan ta ntŭk mât chăm, ntĭm nti. Yơn lah tĭng wa bu ur Y Ngọc, Groi kruanh UBND n’gor Kon Tum, tă bah trong kơl dơn tĭng ƀư tât rnôk ăp kon se nti lĕ jrô 12 dơm jêng âk kon se bol geh nău dơi nti uĕh yơn mô dơi  hao nti tay đại học ơm. Yor kơt nê̆ ân geh trong kơl gay nthoi jong tơm cán bộ nuĭh rnoi mpôl đê̆ bah ăp nhih nti dân tộc nội trú:

“Mât nti ăp kon se tât jrô 12 hôm ri ăp kon se mô dơi hăn nti tay đŏng ôh. Du hê kon se hăn nti đại học du năm prăk nti ndơ̆ bah 25 tât 30 rkeh prăk ri ăp kon se mô tŏng geh ndơ. N’gor đă an kon se nti đah rnoh âk  kơt nê mô geh tơm ndơ ơm. Trung ương, Quốc hội gŭ mĭn đah kon se rnoi mpôl đê̆ ta nkual geh nău rêh jêr jŏt rnôk râng hăn nti đại học ri mbra an kơl lor, ntop kơl ăp kon se ndơ̆ prăk nti nklăp 20-30% dơm hôm ƀa ƀă Ngih dak ntop kơl”.

Mhe aơ tâm rơh  hăn pah kan groi nđôi way nkô̆ nău tĭng ƀư trong kơl pháp luật mpeh pah kan cán bộ đah rmôt cán bộ nuĭh rnoi mpôl đê̆, lvang năm 2016- 2023 ta n’gor Kon Tum, wa Y Thanh Hà Niê Kđăm, Uỷ viên Trung ương Đảng, Ủy viên Ủy ban Thường vụ Quốc hội, Kruanh Hội đồng Dân tộc Quốc hội ndrel đah nchih nkah nău dăn đă bah n’gor Kon Tum tâm pah kan rdâk njêng rmôt cán bộ nuĭh rnoi mpôl đê̆ hŏ lah rjăp đŏng:

“N’gor uănh khlay wăch rgum tay, tâm pă dŏng rmôt cán bộ, công chức, viên chức nuĭh rnoi mpôl đê̆ tâm di đah nău mha êng bah n’gor. Tâm nê uănh khlay tât n’hao săk blău, nsĭt nău dơi nti nău ngơi rnoi mpôl đê̆ gay ntik n’hao dơi nuih n’hâm dăch dêh ƀon lan, gĭt wât ƀon lan n’hanh tâm pă đah ƀon lan. N’hao dăng pah kan rđău đă, way hăn groi nđôi, uănh năl nău  tĭng jăp ăp trong nchrăp, trong kơl bah Đảng, bah Ngih dak, bah n’gor mpeh pah kan cán bộ đah rmôt cán bộ nuĭh rnoi mpôl đê̆”.

Gay dơi geh ăp cán bộ nuĭh rnoi mpôl đê̆ “nkre geh nuih n’hâm uĕh lŏng, nkre geh nău gĭt blău”, ndrel đah nău nsrôih droh rklaih jêr jŏt, n’gor Kon Tum dôl tĭng ƀư pah kan sơch lăp nuĭh kan, dăp rgum, ntăm n’hao…tĭng nău way kloh rvah, tâm ban, uĕh di, nta trong dơh gay “nkre geh nuih n’hâm uĕh lŏng, nkre geh nău gĭt blău” đăp mpăn tiăr nti n’hanh an lĕ nău gĭt blău.

Ntrŏng pah kan leo ƀư, cán bộ kơt nău ntĭnh bah drô Tổng Bí thư Nguyễn Phú Trọng ân lah ntŭk đăt ndal, lah “n’gâng tơm” bah nău dơn kan “n’gâng tơm”, geh tât nău rêh nha bah Đảng, hao uĕh bah rêh jêng kon nuĭh, lam Đảng bộ n’gor Kon Tum dôl an tĭng ƀư jăp nău ntrŭnh bah Bộ Chính trị mpeh đại hội đảng bộ ăp gưl hăn tât Đại hội đại biểu lam   dak tâl XIV bah Đảng, tâm nê nsrôih rdâk njêng dơi rmôt cán bộ nuĭh rnoi mpôl đê̆ lvang năm 2025- 2030 n’hanh uănh ngai tât năm 2045 “nkre geh nuih n’hâm uĕh lŏng, nkre geh nău gĭt blău” gay an jrŏng nâp, mpông nâl./.