VOV4.M'nông: Văn phòng Rnâng kan Ƀan rđău đă gưl neh dak mpeh njrăng n'gang trôk nar lơh mhe geh si ƀŭt njuăl ngăch tât Ƀan rđău đă njrăng n'gang trôk nar lơh n'hanh kơl joi nuĭh n'gor Lâm Đồng mpeh rdâng lơh đah mih n'hach, dak bŭk nkual dak me Cam Ly. Tĭng nău lư bah Ntŭk rgum nchroh lor trôk nar gưl neh dak, ntơm bah nar 20 tât nar 23/5, nkual Tây Nguyên geh mih ntâng n'hanh ntâr n'glaih, geh ntŭk mih têh tât dŭt têh. Gay lor nchrăp an ƀư ăp trong rdâng lơh đah dak bŭk hao ngăch way geh ta nkual  dak me Cam Ly, Văn phòng rnâng kan Ƀan rđău đă gưl neh dak mpeh njrăng n'gang trôk nar lơh dăn đă Ƀan rđău đă njrăng n'gang trôk nar lơh n'hanh kơl joi nuĭh n'gor Lâm Đồng tĭng groi nđôi lhăt ăp nău lư mbơh njrăng lor mpeh mih, dak bŭk, pĭch rlâm neh gay mbơh ngăch tât ăp n'gâng kan, nuĭh ƀon lan, ăp ntŭk rhŏ an pâl nđaih, năch pâl nđaih, lơn lah nuĭh dak bah dih, lor nchrăp ăp trong njrăng der tâm di, đăp mpăn an nuĭh, drăp ndơ n'hanh nău kan ƀư njêng. N'hao mpôl hăn kơl lor njrăng n'gang trôk nar lơh ta ăp ntŭk, hăn ôp uănh, treng nđôi ăp nkual ƀon lan gŭ rđŭng dêh, nkual geh ma nău pĭch rlâm meng dak me Cam Ly, hoch rlău ăp nkuâl Đức Trọng, nkuâl Lâm Hà, nkual ƀon têh Đà Lạt,… gay lor nchrăp leo ƀư, ntrơn du nuĭh ƀon lan rnôk geh dak bŭk; mbluh aih n'hong hoch, njrăng n'gang pĭch rlâm neh./.

Nuĭh rblang: Điểu Thân