70 năm bah năp nơh, Điện Biên Phủ lah me neh bri lĭng dak rngot, hăch rlâm tă bah tâm lơh tâm su, nău rêh ƀon lan dŭt n’hâm jêr jŏt. Ndrĭ yơn đah suan dăng bah tâm rnglăp lam ƀon lan, Đảng bộ, n’gâng kan n’hanh ƀon lan ăp rnoi nuĭh tâm n’gor hŏ mbrôn suan, du nuih n’hâm ndơ̆ Điện Biên Phủ jêng du nkual ƀon têh mhe đah săk  jăn mhe, muh măt mhe chrat ang ta mpeh bah lơ  dŭt nhâp nar neh dak.

Đah aƀaơ 70 năm, ta nâm nău rđău kan sŏng di bah Đảng, tahen n’hanh ƀon lan he hŏ  ƀư jêng lơh dơi Điện Biên Phủ “Lư lam ntŭr neh – n’gâr n’gơ lam bri”, lơh chrai nău  lăp pit in, tŭn jot bah mpôl Prăng n’hanh lăp rglah bah Mỹ. Nău dơi  rơh tâm lơh nê hŏ dŭt bah tâm lơh tâm su, lâp tay nău đăp mpăn ta Đông Dương. Tâm rnôk nău đăp mpăn lâp plơ̆ tay, Điện Biên Phủ dơn hôm ndŏk hăch rlâm bah bom ndrak xơr rlơk ntop đah ăp nău rngot ji roh yot dŭt n’hâm. Wa Vũ Văn Kiệm, nuĭh ƀon lan phường Mường Thanh, nkual ƀon têh Điện Biên Phủ, n’gor Điện Biên nkah tay:

(Bri dak rnôk nê nơh dŭt rngơt rngăt, dơn geh 3,4 mblâm jay ngói, bah yôk A1 hao bơi tât nklang chợ mô geh du nhih pah kan đêt. Điện Biên Phủ rklaih luh hôm yơn nuĭh  ƀon lan nha hôm krit jêr ji sât ji  ngot đŏng, lơn lah ƀon lan rnoi mpôl đê̆, nar sa 2 tơ̆ mô hơm)

Ăp năm aơ, Đảng bộ, n’gâng kan n’hanh ƀon lan ăp rnoi mpôl đê̆ n’gor Điện Biên way nkah nău way ơm cách mạng, mpư n’hao nuih n’hâm Điện Biên Phủ dăng janh tâm hun hao wăng sa, tâm rnglăp, nkra bah khuch khat an tay bah kơi. Ntơm bah du ntŭk tâm lơh hăch rlâm bom ndrak, roh âk suan rhal n’hanh nting mham bah tahen n’hanh ƀon lan he, Điện Biên aƀaơ hŏ lhut săk, rgâl ntô, lhung jong săk jêng du nkual ƀon têh mhe ngăch ngăr hun hao, têh uĕh mhe, hun hao n’hanh lăp rgum dăng ndrel lam dak. Âk ndơ ƀư têh dơi ƀư jêng n’glăp dŏng kơt tach ndeh păr Điện Biên Phủ nthoi đah 2 nkual wăng sa rgum tơm bah neh dak lah nkual ƀon têh Hà Nội n’hanh nkual ƀon têh Hồ Chí Minh.

Aƀaơ rêng trong đô thị n’gor Điện Biên dôl dơi pơk hvi n’hanh hun hao tĭng trong rƀŏng dăp rgum nkual, dăp rgum n’gor.  Pah kan dăp rgum đô thị, dăp rgum rdâk njêng dơi ŭanh khlay, đăp  mpăn  lam lĕ rngôch n’hanh hăn lor du njuat, ƀư ntŭk nsing gay rdâk  njêng trong nchrăp n’hanh an ƀư  ăp trong nchrăp kan rdâk njêng, hun hao đô thị. Tâm lvang năm 2020-2023, n’gor Điện Biên hŏ uănh an dŏng nklăp 20 đồ án dăp rgum ta ăp nkual đô thị, lơn lah ta nkual ƀon têh Điện Biên Phủ. Tât aƀaơ, rnoh nkrum dăp rgum na  nê̆ jêng dăp rgum nsum rĭng lam n’gor geh nklăp 36%. Lơn lah, nău ŭch tât năm 2025, n’gor mbra ntrôl dăng rgâl mhe lam lĕ rngôch, njêng đăt ndal tâm hun hao wăng sa- rêh jêng kon nuĭh, rgum tơm prăk rdâk njêng buăt nthoi ntŭk ntô ndơ dŏng ntung trong n’hanh đô thị ăp kôp tĭng trong rƀŏng têh uĕh mhe.

Ăp nău rgâl mô rlu nê mô dơn ƀư năch pâl nđaih ma lĕ ma nuĭh ƀon  lan Ðiện Biên nơm mô bah ndrât ndal ơm. Wa Lò Văn Diên, nuĭh ƀon lan ta phường Him Lam, nkual ƀon têh Điện Biên Phủ nkoch:

(Gâp saơ mpeh ntŭk ntô ndơ dŏng dŭt hun hao, lơn lah ăp năm mhe aơ, jêng kônh wa ƀon lan dŭt rhơn nđơr mpeh trong hun hao wăng sa ntŭk ntô ndơ dŏng bah nkual ƀon têh. Săk gâp nơm n’hanh kônh wa ƀon lan ŭch rŏng ntik n’hao suan dăng he nơm đŏng gay rgop rdâk njêng ntŭk dja nar lơn ma hun hao)

Wa Lê Thành Đô, Kruanh UBND n’gor Điện Biên an gĭt: Năm 2022, n’gor Điện Biên dâk tâl 2 mpeh rnoh ngăch hun hao tâm rnoh 14 n’gor nkual Trung du n’hanh mpeh yôk yang mpeh Bắc, dâk 24/63 n’gor, nkual ƀon têh lam dak, lah rnoh hun hao dŭt âk tâm âk năm mhe aơ. Nău  rêh ƀon lan lĕ mpeh drăp ndơ n’hanh nuih n’hâm dơi rgâl geh kloh, ntŭk ntô ndơ dŏng dơi ntuh kơl rdâk njêng nar lơn ma  ăp kôp, têh uĕh. Năm 2023, rnoh ngăch hun hao GRDP bah n’gor nchroh geh 7,1%, âk rlău rđĭl đah rnoh ŭch tât Nghị quyết Đại hội Đảng bộ n’gor n’gluh, geh dŭt âk rđĭl đah rĭng geh nsum bah lam  dak, mpeh rmôt dâk bôk  năp bah 14 n’gor tâm nkual trung du n’hanh yôk yang mpeh Bắc. Nsĭt geh bah nău kan pâl nđaih chroh geh 1.750 rmen prăk n’hanh lah năm lor  bôk năp pâl nđaih bah n’gor tât 1 rkeh tơ̆ năch.

Năm aơ, n’gor Điện Biên mbra nkah ndray 70 năm lơh dơi Điện Biên Phủ n’hanh ƀư năm Pâl nđaih gưl neh dak - Điện Biên 2024, n’gor hŏ geh nău lor nchrăp  tâm pah kan nchrăp n’hanh nău mpŏng njêng luh ăp njuat hăn đăt ndal  tâm hun hao wăng sa rêh jêng kon nuĭh bah nkual Tây Bắc tâm let năp tay. Wa Lê Thành Đô lah rjăp:

(Cán bộ, công chức, viên chức, mpôl tahen, ƀon lan ăp rnoi nuĭh n’hanh nsum mpôl  doanh nghiệp bah n’gor Điện Biên dôl rgum nsrôih ntik n’hao nău way ơm Điện Biên Phủ dăng janh, ntrôl dăng rgâl mhe, blău njêng mhe, an mât dŏng geh nău tam săk geh, dơh uĕh bah n’gor gay njêng suan đăt ndal tâm hun hao wăng sa rêh jêng kon nuĭh n’hanh đăp mpăn njrăng n’gang neh dak- rnă njrăng ta ntŭk. Ntơm bah nê njêng geh nău dơi ngăn ngăn mbah rhơn nkah ndray 70 năm lơh dơi Điện Biên Phủ)

70 năm lơh dơi n’gloh lư lam ntŭr neh, n’gâr n’gơ lam bri n’hanh geh nkô̆ hôr khlay, nău têh lư tâm  du rơh, đah nău n’hao êng săk ƀư jêng dâk kan dăng ndrel đah suan dăng bah tâm rnglăp  lam rnoi nuĭh, Đảng bộ, n’gâng kan n’hanh ƀon lan ăp rnoi nuĭh ta aơ hŏ n'hanh dôl ndơ̆ Ðiện Biên jêng ntŭk chrat ang kalơ trong hăn rgâl mhe ta mpeh bah lơ dŭt nhâp nar bah neh dak./.