Tă aơ 1 khay, wa Phạm Thị Lệ, ta xă Lương Phi, nkuăl Tri Tôn, n’gor An Giang tât ntŭk wơt dơn n’hanh mplơ̆ jêh mkra sam ƀŭt hành chính nkuăl ƀư sam ƀŭt kơp dơn dŏng neh. Tĭng nău ntrŭnh, jêh 1 khay mư geh ndrôm sam ƀŭt kơp dơn dŏng neh:

“Vĕ neh jêh nĕ sŏk sam ƀŭt ton hăn ta aơ. Hăn trôm tal 2, jêh nĕ trôm tal 5, bu an he sŏk. Bu ntĭm hăn trôm tal 5 hăn trok prăk jêh nĕ ndơ̆ trôm tal 2. Ăp nuĭh ƀư, ntĭm he ngăch ngăn”.

Nuĭh ƀon lan tât ƀư sam ƀŭt hành chính ta Ntŭk du mpông nkuăl Tri Tôn knŭng an sŏk mrô tĭng nuĭh tĭng nău kan dơi ơm pă, jêh nĕ ndơ̆ sam ƀŭt rhăch nău du mpông hao lơ, dơn sam ƀŭt ton n’hanh tât nar geh njuăl êng nău mbơh an nuĭh ƀon lan tât sŏk sam ƀŭt. Ta aơ hôm geh ndơ uănh lah, chấm điểm cán bộ gay nuĭh ƀon lan dơi uănh năl nău kan bah công chức, viên chức. Mô lah nuĭh ƀon lan dơi ndơ̆ êng sam ƀŭt điện tử đah trong lĕ dơi năp lor. Wa Đỗ Minh Trí, Groi kruanh UBND nkuăl Tri Tôn an gĭt:

“Công chức du mpông geh nău wât lĕ đah nău kan têh đah nuĭh ƀon lan, đah nuih n’hâm rhŏ kan nuĭh ƀon lan, bah nĕ nău kan ƀư tĭng du mpông hao lơ ta xă, nkuăl dŭt lah uĕh mô geh nău jêr. Aƀaơ nkuăl, n’ăp xă mkra 5 ta ntŭk. Đah nuĭh ƀon lan Tri Tôn kloh rah wah ăp nkô̆ nău nuĭh ƀon lan tât ƀư sam ƀŭt hành chính moh ndơ ŭch. Lah nuĭh ƀon lan lah cán bộ ƀư jêr ri nchih mbơh ta du mpông ta ntŭk”.

Hôm ta Ntŭk rhŏ an hành chính nsum n’gor Dak Lak, ntŭk wơt dơn, mkra n’hanh mplơ̆ jêh mkra sam ƀŭt hành chính bah 20 n’gâng kan, tâm nĕ 2 ngih pah kan ngành dọc Trung ương lah Công an n’gor n’hanh Bảo hiểm xã hội n’gor; lĕ rngôch sam ƀŭt rhăch nău hành chính dơi wơt dơn, mplơ̆ jêh ƀư ta Ntŭk kan dơi ƀư tĭng tă bah trong mbơh nău du mpông điện tử bah n’gor n’hanh phần mềm way kan. Nô Lương Trung Thanh ta nkuăl Ea Hleo an gĭt: knŭng roh nklăp 5 mnĭt đah ăp gưl dơh ngăch, nô lĕ jêh ăp sam ƀŭt khlay gay dăn rgâl pă mhe sam ƀŭt ƀĭt ndeh n’hanh kâp dơn jêh mkra tă bah trong bưu điện:

“Kăl e ăp tơ̆ ƀư sam ƀŭt sam tra hăn rwăch rwêng âk gưl yơn aƀaơ knŭng đêt mông lĕ jêh. Saơ ngăch dơh, dơh an nuĭh ƀon lan hăn nsong.

Gay n’hao uĕh mkra sam ƀŭt hành chính, aƀaơ, ăp ngih pah kan, ntŭk kan geh sam ƀŭt hành chính wơt dơn n’hanh mplơ̆ jêh mkra sam ƀŭt hành chính ta Ntŭk kan rhŏ kan hành chính nsum n’gor Dak Nông dôl ntrôl ngăch mbơh ƀư nău mkra sam ƀŭt hành chính tĭng trong “mô kâp” đah ăp sam ƀŭt geh nar mkra đêt nar, dơh, nău mkra sam ƀŭt mô geh tât âk ngih pah kan ntŭk kan.

Uănh lah mpeh săk rnglăy ntrong kan du mpông hao ngăch, du mpông điện tử mkra sam ƀŭt hành chính, PGS,TS Ngô Thành Can, tă ƀư groi trưởng khoa tổ chức hành chính, Học viện Hành chính Quốc gia, nău mbơh ƀư trong kan du mpông, du mpông hao ngăch lĕ rgop mkra ăp sam ƀŭt hành chính jêr jŏt. Ntŭk kan mkra hành chính lah nsum, ntŭk kan pă an rhŏ nău kan hành chính nsum lah êng dơi rhoăt dơh, ngăch. N’hanh nău khlay ngăn lah nsĭt tay nău tâm di an nuĭh ƀon lan:

“Tâm rgop du mpông vật lý n’hanh điện tử gay nta an ăp nuĭh, rmôt kan, ƀư n’hŭch mô nar ƀư sam ƀŭt hành chính. Rlău ma dơh, ngăch, n’hŭch mông  nar ri ntêm nkrem an he n’hŭch rnoh ntŭk du mpông, n’hŭch prăk dŏng sam ƀŭt sam tra, n’hŭch mông nar kâp, ƀư n’hanh ntêm nkrem ăp prăk êng. Nsĭt tay nău nsing nơm bah nuĭh ƀon lan”.

Aƀaơ lĕ rngôch ăp ntŭk lĕ an trong nchrăp ƀư bôk nău rgop an tâm nchră “Rgâl mhe nău ƀư tĭng trong ƀư “du mpông”, “du mpông hao ngăch” mkra sam ƀŭt sam tra hành chính”, đah nău ŭch tât năm 2025, rnoh rgâl sam bŭt rhăch nău, sam ƀŭt sam tra mkra hành chính ta lĕ rngôch ntŭk “du mpông” ăp n’gâng kan, ban, nău kan, n’hanh ăp ntŭk kan hành chính gưl nkuăl, xă.