VOV4.M'nông: Gay joi ăp trong nkra nsĭt âk săk geh, dơh uĕh an nău hun hao pâl nđaih Kon Tum lah êng n'hanh nkual Tây Nguyên lah nsum, ta nkual ƀon têh Kon Tum tâm pơh rlău aơ, Bộ Văn hóa, Thể thao n'hanh Pâl nđaih kan nsum đah UBND n'gor Kon Tum ƀư Rgum nchră "Pâl nđaih Kon Tum- Săk geh n'hanh mpŏng hao”

Rgum nchră "Pâl nđaih Kon Tum- Săk geh n'hanh mpŏng hao” rgum nău tât râng bah bơi 500 nuĭh ntơh măt lah ăp kruanh mât bôk kan, nuĭh rnâng kan dâk bôk năp bah n'gâng kan; Hiệp hội, tập đoàn doanh nghiệp leo hăn pâl jong nar, khách sạn, nchuăn rdeng; nuĭh ntơh măt tât bah du đêt n'gor Nam Lào, Đông Bắc Campuchia geh nsum trong n'har bri đah Kon Tum.

Lah ta rnôk rgum nchră, Bộ trưởng Bộ Văn hóa, Thể thao n'hanh Pâl nđaih Nguyễn Văn Hùng lah rjăp, Bộ n'hanh ăp n'gor lam dak dôl geh âk trong nkra, nsrôih ƀư ăp nău kan gay dâk hao tay nău kan pâl nđaih lôch bah nuh srê Covid-19.  Rgum nchră "Pâl nđaih Kon Tum- Săk geh n'hanh mpŏng hao” lah rnôk gay ăp doanh nghiệp tâm mâp tâm nđŭr, ký ton tâm boh pâl nđaih. Tĭng Bộ trưởng, n'gor Kon Tum hŏ geh bar ndơ khlay gay hun hao pâl nđaih:

“Mpôl hên năl geh saơ geh bar ntil nău tơm Kon Tum hŏ n'hanh rgum tŏng gay he hun hao ƀư pâl nđaih. Bôk  năp nê lah Kon Tum geh ăp tŏng mpeh bri dak neh ntu n'hanh săk tơm văn hoá gay he ƀư pâl nđaih mô châp  đê̆ oh yuh. Nău tâl bar lah kon nuĭh Kon Tum đah nău jăp gơih, pah kan jan sa, dêh bên n'hanh tâm rŏng. Khân păng nơm lah ăp nuĭh gay kân jâng bah ăp năch hăn pâl nđaih".

Ta rơh rgum nchră, ăp đại biểu hŏ tâm nchră, lah rjăp nău săk geh n'hanh mpŏng hun hao pâl nđaih bah n'gor Kon Tum đah ntoh lư lah săk tơm văn hóa uĕh êng, âk bri dak uĕh măt uănh, kơt yôk Ngọc Linh mpeh Nkual bri mât ndray bri dak Ngọc Linh; n'glah pe n'har bri Việt Nam- Lào- Campuchia; nkual pâl nđaih bri dak Măng Đen- Kon Plông… Yơn lah gay hun hao dơi pâl nđaih, tĭng groi Giáo sư- Tiến sỹ Trần Đình Nguyên, nuĭh rnâng kan wăng sa, Viện trưởng ơm Viện kinh tế Việt Nam ri ndrel đah mât ndray ndơ ơm geh khlay, âk ntil, n'hao khlay ndơ geh ƀư, Kon Tum ân ntrŏng năl rnoh hun hao gay an rong lor trong hun hao pâl nđaih:

“Kon Tum ân mbluh gay manh suan dăng. Ta nê ntĭt kơt ta Bờ Y. Ŭch Bờ Y mpăr dơi Bờ Y ân mbluh nthoi tât Lào, ân mbluh tât Campuchia tĭng di nău mĭn lăp rgum pơk hvi. Rnôk nê Bờ Y mơ ƀư ăp ndơ săk geh dơh uĕh ta ntŭk băl jêng ndơ săk geh dơh uĕh bah he gay n'hao suan rêh an pâl nđaih. Ân geh trong kan rgum n'hanh tơm ndơ an ăp toạ độ an ƀư lor jêng lah ân gĭt rgum tâm bar pe mbah trong hun hao. Ngoăy lah nkual ƀon têh Kon Tum, bar lah Măng Đen n'hanh tâl pe geh du trong leo hao tât n'glah pe n'har bri".

Nănh tâm mâp ntral đah nău ngăn mô klach nuih ăl yơn mô roh nsing nơm, wa Trần Nguyện, Kruanh Ban Kinh doanh Tập đoàn Sun Group an lah, tâm trong kan pâl nđaih Kon Tum lah êng n'hanh Tây Nguyên lah nsum geh âk ntil nău khoah, kơt ntŭk ntô ndơ dŏng; mô tŏng geh nuĭh ntuh kơl têh; Nkô̆ nău rƀŏng trong dăp rgum; mpêt đêt mpeh nău gĭt blău pah kan tâm pâl nđaih...N'hanh lah ŭch hun hao pâl nđaih ân nkra dơi ăp nău ntul rlong dja:

“Aơ lah ăp ntil nău ma dŭt n'hâm tơm khlay. Lah ŭch hun hao ân hăn nkra ăp ntul rlong dja n'hanh mpôl hên mpŏng đah ăp nău rgop bah mpôl hên n'hanh nău ndrel hăn bah ăp doanh nghiệp êng ƀa ƀă mbra rgop an ntŭk tât Kon Tum mbrơi mbrơi nkra dơi ăp nău ntul rlong n'hanh he mbra rƀah ngăch rnôk tât geh, hăn bah kơi yơn mbra hăn dŭt ngăch".

Ta Rgum nchră "Pâl nđaih Kon Tum- Săk geh n'hanh mpŏng hao” năm 2022 , Bộ Văn hóa, Thể thao n'hanh Pâl nđaih mbơh Trong nchrăp hun hao pâl nđaih ta nkual pe njônh hun hao Campuchia- Lào- Việt Nam lvang năm 2021-2025, uănh ngai tât năm 2030; Sở Văn hóa, Thể thao n'hanh Pâl nđaih n'gor Kon Tum mbơh, nkoch n'hơ Logo n'hanh slogan pâl nđaih n'gor Kon Tum “Rlong gĭt văn hóa- Hăn uănh saơ bri dak"; ký ton tâm boh mpeh ntop kơl rdâk hao tay nău kan ăp doanh nghiệp pâl nđaih đah n'gor Kon Tum đah Hiệp hội pâl nđaih 3 nkual ƀon têh: Hà Nội, Đà Nẵng n'hanh nkual ƀon têh Hồ Chí Minh; Sở Văn hóa, Thể thao n'hanh Pâl nđaih n'gor Kon Tum ký tâm ton đah Liên chi hội Lữ hành Việt Nam gay n'hao rnoh âk năch pâl nđaih tât n'gor đŏng./.

Nuĭh rblang: Điểu Thân