Ta n’gor Sơn La, Bộ Công an mhe ƀư tâm nchră tâm ôp nău tă ơm gĭt kan n’hanh mpư rnê ăp nuĭh ntoh lư tâm trong leo lam ƀon lan mât rnă njrăng neh dak ta nkual ƀon lan rnoi mpôl đê̆ nkual Tây Bắc n’hanh kiău ma, lvang năm 2018- 2023.

  Nkual Tây Bắc n’hanh kiău ma lah 14 n’gor, geh ntŭk gŭ kan khlay mha êng mpeh wăng sa – rêh jêng kon nuĭh, njrăng n’gang neh dak, rnă njrăng, tâm boh dak bah dih; geh 30 rnoi nuĭh ndrel gŭ rêh, tâm nê ƀon lan rnoi mpôl đê̆ âk nklăp 65%, dŭt âk lah ăp rnoi Mông, Tày, Thái, Mường, Nùng…

        Tâm 5 năm aơ, ăp ntŭk nkual rnoi mpôl đê̆ nkual Tây Bắc n’hanh kiău ma hŏ rdâk njêng geh rlău 860 trong leo lam ƀon lan mât rnă njrăng neh dak ta nkual ƀon lan rnoi mpôl đê̆, đah bơi 46.000 ntŭk ƀư dơi ntik hvi ta ăp ntŭk, ăp ntil trong kan.

        Âk trong ntĭt leo geh suan ring tam dăng, kơt: “Câu lạc bộ rđăp, ntĭm nti, kơl nuĭh lăn geh tih plơ̆ tay đah nău rêh ngăn ƀon lan” bah n’gor Sơn La; “Ntŭk rgum rƀŭn ngăn đăp mpăn rnă njrăng ta bản Giàng Ly Cha” bah n’gor Lai Châu; “Goh loih mât đăp mpăn ta giáo xứ Mường Riệc” bah n’gor Hòa Bình. Wa Giàng A Pao, nuĭh ntŭk rgum rƀŭn chroh kon Tin Lành Báp-tít Việt Nam ta bản Sam Lang, xã Nà Hỳ, nkuâl Nậm Pồ, n’gor Điện Biên an gĭt:

“Mpôl hên râng tâm rmôt mât njrăng êng mô dơh đŏng, mô geh ndơ kơl đêt. Yơn mpôl hên gĭt lah mô geh rmôt mât njrăng êng, bản geh dŭt âk nău jêr nkra. Rnôk hăn nkra ăp nău tâm rkeh jê̆ geh rnôk nuĭh ƀon lan lah, dŭt jêr đŏng. Mpôl hên hŏ nsrôih rblang an ƀon lan, gay nuĭh ƀon lan gĭt mpôl hên lah rmôt mât njrăng êng, kônh wa djăt, di ri tâm ban ŭch, nkra bah nău  tâm rkeh”.

        Tĭng nău mbơh bah công an ăp n’gor, ma nău kan bah ăp trong ntĭt leo, nsum mpôl ƀon lan hŏ mbơh bơi 70.000 tơm nău lư geh tât rnă njrăng đăp mpăn; âk nău lư geh rnoh khlay, kơl mpôl kan dơi kan ôp uănh lơh rlău 13.300 tơ̆ nău tih, nhŭp kân rlău 11.500 nuĭh...

        Tâm 5 năm, ƀon lan hŏ rgŏ jă luh mbơh êng nău tih n’hanh ƀoi tĭng nhŭp 900 nuĭh nchuăt krap nău tih, nuĭh tih nchuăt du; râng mât njrăng, rđăp, ntĭm nti, kơl rlău 3.700 nuĭh tă geh nău tih ta ƀon lan; lơh jăng hang rbăn mét vuông tơm thuốc phiện...   Lah nuĭh ntĭt leo lor râng njrăng n’gang ma túy, wa Sồng A Dính, bu ranh ƀon, nuĭh geh nsing nơm ta xã Hang Kia, nkuâl Mai Châu, n’gor Hòa Bình nkoch:

“He ân nkoch trêng kon său he lor, kon său tĭng ƀư jăp ri he lah ƀon lan kiău ma mơ djăt tĭng. Gâp ntĭm nti kon său mô dơi hoih su, mô tih pháp luật... Nuĭh hoih su hăn ât su gâp hăn lăp tât jay đă ât; nuĭh tih nchuăt du gâp hŏ ndrel druh ndăm, bu ur, tahen ơm hăn nkoch trêng na nê̆ đŏng... geh ăp nuĭh hăn kan thuê, hăn tĭng chroh, sĭt su lĕ ma bàn thờ, gâp hăn tât nkoch trêng rdâk tay bàn thờ kơt ơm”.

        Ăp  bu ranh ƀon, kruanh bản, nuĭh geh nsing nơm ta ăp nkual jru, nkual ngai, nkual n’har bri hŏ rgop mô đêt rnôk nkoch trêng ƀon lan râng tâm pah kan mât rnă njrăng đăp mpăn tâm dâng; đăp mpăn ƀư tơm neh dak, rnă njrăng n’har bri neh dak. Lah ta tâm nchră, Trung tướng Lê Quốc Hùng, Thứ trưởng Bộ Công an lah rjăp:

“Dăn đă ăp nuĭh ntoh lư ntô̆ n’hao tay nuih n’hâm tâm rnglăp lam rnoi nuĭh, gay an tay suan dăng, bôk rngok gĭt blău; ntik uĕh nău tâm rŏng, tâm mât nkrum nsum, dâk kan dơh đêt yơn geh nău tam. Lĕ rngôch trong leo ntoh êng mbra jêng dâk đăt êng; tĭng trong kan  Đảng rđău đă, n’gâng kan ƀĭt juet n’hanh mât njrăng, ăp mpôl công an, tahen, n’har bri, mặt trận, tuyên giáo lah mpôl kan dâk chŏl lor ngăn, rƀŏng an trong leo hun hao; rdâk njêng ntŭk nsing rnă njrăng tâm ƀon lan, njrăng n’gang neh dak lam ƀon lan, n’hanh ntŭk tât kêng dŭt lah rdâk njêng ntŭk nsing nuih n’hâm ƀon lan”.

Trung tướng Lê Quốc Hùng dăn đă mpôl công an lor nchrăp kan nsum đah mpôl tahen, tahen n’har bri n’hao dăng rsong hăn treng nđôi mât njrăng ta trong n’har bri. Dăn đă công an ăp n’gor rđău đă công an nkuâl, xã, phường... ndrel mpôl tahen, tahen n’har bri tĭng ƀư jăp pah kan rgŏ jă n’gâng kan ta ntŭk, rgŏ jă tahen công an; dăch dêh ƀon lan, kơl ƀon lan, tĭng ƀư “3 ndrel”, “4 gĭt” đah ƀon lan. Ndrel đah pah kan rgŏ jă, ân ƀư jăp đăp mpăn rêh jêng kon nuĭh đah ƀon lan, đah mpôl công an n’hanh nuĭh ƀon lan dak băl Lào.

        Nkhêp geh rnôk dja, Bộ Công an hŏ ntăm an Bằng khen an 22 mpôl, 61 nuĭh geh nău dơi tâm trong leo lam ƀon lan mât rnă njrăng neh dak nkual rnoi mpôl đê̆ nkual Tây Bắc n’hanh wăr kiău ma, lvang năm 2018 - 2023; pă nklâm ndơ an ăp đại biểu lah nuĭh geh nsing nơm tâm nkual ƀon lan rnoi mpôl đê̆./.