Ôi 28/6, rlău 14 rbăn nuĭh râng thi n’gor Gia Lai ntơm lăp tâm môn thi lor bôk năp rơh thi THPT 2023, môn Ngữ văn. Rơh thi bôk năp ƀư đăp mpăn, răp jăp, mô geh nuĭh tih nău way thi. Lĕ rngôch ăp nuĭh râng rơh thi ŭanh năl, tâm n’guăk đề thi ngữ văn hôm tâm ban kơt ăp năm đŏng n’hanh tâm ban đah ăp đề thi rlong ma kon se hŏ tă ƀư tâm bah ri aơ nơh. Ăp kon se mpơl nău rhơn nđơr rnôk môn Ngữ văn nkoch tât nkô̆ nău "Kân tâm ban nuih n’hâm".

Aơ mô dơn lah nkô̆ duh ndal ma hôm tâm di đah rơh năm deh bah ăp kon se đŏng, ntơm bah nê kơl kon se geh ăp nău uănh năl, gĭt mĭn êng êng. Tĭng nău mbơh ngăch bah Sở Giáo dục n’hanh Đào tạo Gia Lai, tâm rơh bôk năp bah rơh thi tốt nghiệp THPT năm 2023, ta môn Ngữ văn, lam n’gor mô tât 54 nuĭh. Na nê̆, rnoh nuĭh đăng ký râng thi môn Ngữ văn lah 14.696 nuĭh; rnoh nuĭh tât râng thi lah 14.642 nuĭh, 54 nuĭh mô tât, tâm nê geh 18 nuĭh rnoi mpôl đê̆./.