VOV4.M’nông: Lơ 22/9, rlau 1,9 rkeh kon se nti jrâu 1 tâm lam dak ntơm lăp năm nti mhe. Vơt kon se hăn nti tay, ăp ngih săm ƀŭt kŏ n’hao nau kan kơp uănh ăp ntŭk ntu, jrâu nti, trong điện, dĭng dak, nsưng nti, gung hao, quạt điện...gay đăp mpăn ân kon se, njrăng rdâng nau khuch rmanh. Tĭng nau nchrăp năm nti 2022-2023 đah nau ntĭm nti mầm non, phổ thông ndrel ntĭm nti ƀa ƀơ geh N’gâng kan ntĭm nti ntrŭnh lơ 5/8, nau lăp năm nti mhe geh lơ 5/9 kơt ăp năm.

Kon se geh lăp nti ơm ngăn du pơh, lah lơ 29/8. Êng đah jrâu 1, ăp ngih săm ƀŭt ƀư lăp nti ơm lơn 2 pơh, lah lơ 22/8. Kơt ăp n’gor: Hà Nam, Hải Dương, Hậu Giang, Hoà Bình, Bến Tre, Dak Nông, Đồng Tháp, Đồng Nai, Bắc Giang, Hà Nội, Bắc Kạn, Bắc Ninh, Bạc Liêu, Lai Châu, Lâm Đồng... mra vơt kon se jrâu 1 hăn nti tâm nar aơ./.

Nŭih rblang: H’Thi