VOV4.M'nông: Nkhêp nkah ndray 132 năm Nar deh Kruanh Hồ Chí Minh, 111 năm nar wa Hồ hăn joi trong kơl neh dak, kêng măng ntri (18/5), Thành ủy Nkual ƀon têh Hồ Chí Minh ƀư nkhôm rnê ăp nuĭh, ăp mpôl geh nău dơi ngăch prăl tâm kơt nti n'hanh ƀư tĭng nău mĭn, nuih n'hâm uĕh lŏng, trong gŭ rêh Hồ Chí Minh năm 2021 - 2022.

Lah ta rơh ƀư nkhôm rnê, Uỷ viên Bộ Chính trị, Bí thư Thành ủy Nkual ƀon têh Hồ Chí Minh Nguyễn Văn Nên rnê âk, 142 mpôl n'hanh 213 nuĭh sơch sơch bah hang rbăn nuĭh ntoh lư tâm kơt nti pah kan an lĕ nău gĭt blău n'hâm suan ta âk ntil trong kan an nău rêh. Aơ lah ăp kao si uĕh, ngăch prăl, nănh mĭn, nănh ƀư, lĕ nuih n'hâm đah nău kan bah he, way nănh mĭn, nănh ƀư n'hanh nănh dơn nău kan tâm trong tĭng ƀư nău kan bah he./.

Nuĭh rblang: Điểu Thân