Lĕ rlău 10 năm bah năp, yơn wa Ngô Thị Minh (55 năm deh), ta phường Tân Lập, nkual ƀon têh Buôn Ma Thuột mô hŏ dơi ât dak măt ăp rnôk nkah đah nău rmanh kăl e. Lah phung pah kan Công ty trách nhiệm hữu hạn Môi trường Đông Phương, rnôk mpêh ta trong rnôk 3 mông ôi, wa geh du bôk ndeh tom. Rmanh ƀư wa Ngô Thị Minh roh lĕ 2 đah jâng, rnoh sôt rmanh 98%.

“Aƀaơ ŭch hăn ƀư du nău gŭ ta ndeh rlă dơm yơn ma gŭ mô dơi jŏ, knŭng geh 2 mông lah pơng nho lĕ hôm. Jêh nĕ ăp rơh ji rhoăt soan lah mô dơi ât. Aƀaơ ăp rse thần kinh ta bah dâng tăch lĕ, âk rnôk hăn săm ndal ta ngih dak si khân pơng lah mô dơi ƀư du ntil nău, dak si bah ji aƀaơ pơng bal hôm, he knŭng he nsrôih ât ăp rơh ji kơt nĕ dơm”.

Geh sôt rmanh 98% jêh rmanh pah kan năm 2004 yor rtoh mìn phah trong, wa Võ Thanh Tùng ta phường Tân Tiến, nkual ƀon têh Buôn Ma Thuột, tă ƀư phung pah kan ntung trong bah N’gâng kan ntung trong n’gor Dak Lak, an gĭt, gay rêh geh tât aƀaơ, wa lĕ rlet rlău mô gĭt âk rơh rek đah rlău 100 nglai jĭm ta bôk. Ji lơn, jêh rnôk wa geh rmanh du năm, ur wa lĕ ntlơi. Gay joi nău rêh lôch nar, oh kon wa pơk du ntŭk tăch ndơ jêt tâm jay manh, hôm wa lap dơi nti nău kan bấm huyệt:

“Du đêt khay bah kơi ngih dak uănh mĭn an hăn Hà Nội nti nău kan bấm huyệt săm ji, ri nău rêh dơi oi. Aƀaơ gŭ nsum đah kon, ngih wâl ri mô geh, đah soan mô ngăch, trôk nar mô uĕh ri ji ngăn”.

Tĭng nău mbơh bah N’gâng kan Lao đông, Thương binh n’hanh xã hội n’gor Dak Lak, aƀaơ lam n’gor geh rlău 12.000 ntŭk, doanh nghiệp dăn tăch rgâl đah dĭng lĕ rnoh nuĭh pah kan nklăp 120.000 nuĭh. Dŭt âk ăp doanh nghiệp ta ntŭk geh têh n’hanh jêt, pah kan ta ăp ntil tăch rgâl, dịch vụ, nkra njêng, nkret njêng ndơ...

Wa Nguyễn Quang Thuân, Groi Giám đốc N’gâng kan Lao động Thương binh n’hanh xã hội n’gor Dak Lak an gĭt, ăp năm dăch aơ, trong kan đăp mpăn, răk uĕh pah kan ta ăp doanh nghiệp lĕ dơi uănh mĭn lơn, ăp nău pah kan nar lơ rgâl. Yơn geh đah nău rmanh pah kan hôm e geh âk. Knŭng kơp êng năm 2022 ta n’gor lĕ geh 7 nău rmanh pah kan ƀư 7 nuĭh khĭt.

Gay n’hŭch rmanh pah kan, UBND n’gor Dak Lak lĕ an trong nchrăp ƀư tĭng bôk nău kan đăp mpăn, răk uĕh pah kan lvang 2021-2025. Nsrôih tât năm 2025, rĭng ăp năm hŭch 4% rnoh rmanh pah kan khĭt nuĭh; hao tay 5% rnoh nuĭh pah kan dơi but uănh ji rmanh nău kan n’hanh 5% rnoh ntŭk dơi mât uănh ntŭk ntô pah kan... wa Nguyễn Quang Thuân, an gĭt:

“Mpeh trong mkra na nê̆ ri bôk năp n’hao trong kan nkoch trêng, rlău ma nău nkoch trêng đah pano, áp phích, sam ƀŭt ri an ntrôl dăng ƀư tiăr nti an nuĭh pah kan n’hanh nuĭh dŏng pah kan; tal 2 lah uănh nđôi tay rnôk ƀư, trong ƀư, nău ntrŭnh ƀư tĭng pah kan ta ntŭk nkra njêng dơh geh rmanh pah kan, tâm nĕ uănh khlay tât nău ƀư nkra njêng tăch rgâl, nkra njêng nkret gâm, ndâk ƀư ri an geh trong na nê̆ tâm nău n’hŭch geh rmanh pah kan; mbơh ƀư ăp nău kan n’hanh nta an ntŭk ntô pah kan an nuĭh pah kan kơt mât uănh ntŭk ntô pah kan gay đăp mpăn nău tâm boh uĕh di, đăp mpăn”.

Ăp nău rmanh pah kan n’hanh tih khuch nău kan dơi njrăng dêr da dê lah nuĭh pah kan dŏng nuĭh kan uănh mĭn tât nău rgâl uĕh nău pah kan, uănh nđôi ăp nău geh mâp, n’hanh lĕ rngôch nuĭh pah kan tĭng rjăp nău ntrŭnh, trong ƀư, trong mkra nău kan đăp mpăn. Gay dơi ƀư nău nĕ, n’ăp nuĭh pah kan n’hanh nuĭh dŏng pah kan an wât kloh mpeh ăp nău roh đăp mpăn m’hâm an ƀư gay n’hŭch đêt nău mâp tă bah trong kan uănh nđôi êng, năl nkô̆ nău klach, geh khuch ta ntŭk pah kan, ƀư uĕh trong kan tiărr nti, ntĭm ƀư ngăn mpeh đăp mpăn, kloh uĕh pah kan./.