VOV4.M'nông: Hăn khâl n'hanh mbah rhơn Tết Đảng bộ, n'gâng kan n'hanh ƀon lan n'gor Quảng Ngãi, kêng măng 17/1, Rnâng kan Ban Bí thư Võ Văn Thưởng, ndrel mpôl pah kan Trung ương hŏ tât nsum rhơn đah Bôk nău kan "Tết njôm wăr- Năm mhe đăp mpăn 2022" n'hanh pă nklâm ndơ Tết an rhiăng công nhân Nkual Công nghiệp VSIP Quảng Ngãi, ta xã Tịnh Phong, nkuâl Sơn Tịnh; Mâp măt, mbah rhơn Tết cán bộ, nuĭh kan, Công ty Cổ phần Lọc hóa dầu Bình Sơn, Nkual wăng sa Dung Quất. Tết năm aơ, Liên đoàn Lao động n'gor Quảng Ngãi an ƀư âk nău kan mât chăm đah nkô̆ "Tết njôm wăr- Năm mhe đăp mpăn 2022” đah trong rƀŏng lĕ rngôch đoàn viên n'hanh nuĭh kan geh Tết da dê. Lôch nê, Công đoàn ăp gưl hŏ ntop kơl an bơi 65 rbăn đoàn viên đah rnoh prăk rlău 19 rmen prăk; rgŏ jă ntop kơl 700 đoàn viên, nuĭh kan, đoàn viên Nghiệp đoàn lơh joi ka đah rnoh prăk 700 rkeh prăk, pă an 25 chor jay n'hŭt răm Công đoàn đah rnoh prăk rlău 1 rmen prăk...Râng nsum tâm Bôk nău kan "Tết njôm wăr- Năm mhe đăp mpăn 2022”, Rnâng kan Ban Bí thư Võ Văn Thưởng rnê âk nău blău ƀư mhe bah Tổng Liên đoàn Lao động Việt Nam tâm nău mât 7 năm mbro ƀư bôk nău kan Tết njôm wăr đah nar lơn ma têh hvi, ntop kơl ngăn ngăn, mât chăm nău rêh an nuĭh kan tâm rnôk Tết./.

Nuĭh rblang: Điểu Thân