VOV4.M’Nông- Ôi nar 31/5, mpôl kan uănh nđôi mbrô 4 bâh rnâng kan ntĭm leo Trung ương mpeh njrăng, rdâng nău sa nkhiăn, sa ƀer lĕ pah kan đah n’gor Ủy Dak Lak, mbơh nău ntrŭnh uănh nđôi nău leo kan, ntĭm đă n’hanh leo ƀư tĭng pah kan geh saơ, vơt dơn, doh rklaih, mbơh nuĭh tih, dăn đă rmal ăp nău tih geh ƀư tih mpeh sa nkhiăn, nău wăng sa mô tâm di.

Tĭng nău nchrăp kan, mpôl kan mbra geh tât pah kan đah rnâng kan thường vụ n’gor Ủy n’hanh uănh nđôi tay ta 4 ntŭk kan lah nkuăl ủy Buôn Ma Thuột, Viện Kiểm Sát Nhân dân n’gor, Công an n’gor, Thanh tra n’gor mpeh ăp nkô̆ nău, nău leo kan, ntĭm đă bâh ăp gâl ủy, ntŭk leo kan đảng đah nău mbơh tơih pah kan, dơn, doh rklaih rnoh tih mpeh nuĭh tih, rgum ta ăp trong kan dơh ntoh luh sa nkhiăn, sa ƀer, nău kan mô ueh mô di, nău kan ngăch saơ , mbơh nău mpeh nuĭh tih tât ăp ntŭk kan têh, ngăn lah đah trong kan dơh geh nău sa nkhiăn, sa ƀer, pah kan mô tâm di, nău kan vơt dơn, doh rklaih bâh ăp ntŭk kan geh nău dơi đah nău mbơh mpeh nuĭh tih, nău kan tâm rgop đah ăp ntŭk kan geh nău dơi ngăch saơ, ndơ̆ mbơh, dơn, doh rklaih nău mbơh mpeh nuĭh tih, nău dơh rklaih tâm lah tâm phong, nduĭh rmal ăp nău ƀư tih pháp luật  tâm nău kan ngăch saơ, ndơ̆ mbơh, dơn, doh rklaih nău mbơh mpeh nuĭh tih.

Mông nar uănh nđôi kan bâh nar 1/1/2011 tât nar 31/12/2021 n’hanh ăp nău mbơh mpeh nuĭh tih, dăn đă mbơh phong, ăp nău dăn uănh năl, đă uănh năl ta năp nar 1/11/2011 yơn mô hŏ geh doh rklaih lôch.

Nuĭh rblang: Thị Đoắt