Ăp nar rlău aơ, rup gui nuĭh ƀon lan ăp n’gor mpeh Bắc ntrăm săk tâm dak bŭk, pĭch rlâm neh bôk âk nuĭh ƀư ji uh nuih n’hâm. Tă rlău âk roh yot tă bah dak bŭk n’hanh dơn geh âk ndơ kơl bah ƀon lan lam dak, kônh wa miền Trung nklâm êng bánh, rgop êng ndơ sa, dak ngêt, ao đông njuăl mpeh Bắc ntop kơl nuĭh ƀon lan nkual geh trôk nar lơh. Ta nkual ƀon têh Đà Nẵng, kônh wa âk nkual ƀon lan gŭ rngeh măng gay nklâm bánh chưng, bánh tét njuăl kơl kônh wa ntŭk geh dak bŭk.

Bar pe măng aơ, âk ntŭk nklang nkual ƀon têh Đà Nẵng way chrang ŭnh. Ta phường Hòa Hải, quận Ngũ Hành Sơn, bar pe jât nuĭh lĕ ma công nhân, tahen, công chức, viên chức, geh ăp bu ranh rlău 70 năm deh rgop êng phe mƀêt, tuh gay nklâm bánh tét, bánh chưng njuăl tât kônh wa nkual geh dak bŭk mpeh Bắc. Ăp mblâm bánh chưng lah nklâm lĕ ma du nuih n’hâm rŏng tât ƀon lan mpeh Bắc.

Ơm ôi aơ, wa Trần Thị Thương, rnăk tăch rgâl jê̆ ta chợ Hòa Cường ntlơi lĕ ma ôi tăch ndơ, hăn rvăt 50 kg phe mƀêt n’hanh tuh gay ăp nuĭh ndrel gŭ nklâm bánh. Wa Thương nkoch:

“Ma nău lư ta Radio, gâp saơ yô̆ nđach ngăn yơn he mô geh ndơ ma kơl âk kơt ăp nuĭh, jêng gâp rgop nsum nklâm bánh dơm. Du mbâr rnôk ji ngot dah du nklâm rnôk hơm. Măng nơh tât aƀaơ rvê mbro, ôi aơ gâp ndăn hăn tât ta aơ gay gâm an năn ăp nklâm bánh njuăl tâm nar. He dŭt ji nuih n’hâm yor nsum du dak mham jêng dŭt uh nuih n’hâm ngăn”.

Ăp nar dja, rnăk wa Nguyễn Thành Long, nuĭh tâm Câu lạc bộ bán tải Đà Nẵng ta phường Hòa Hải, quận Ngũ Hành Sơn jêng ntŭk gay kônh wa hăn tât nklâm, gâm nsum bánh njuăl mpeh Bắc. Ndăng măng nar, bah năp mpông jay nhih, jay ŭnh hit gir gir ŭnh gâm. Lĕ ma măng kônh wa rngeh gŭ gâm bánh. Wa Đặng Tâm, bol rlău 70 năm deh ta quận Ngũ Hành Sơn nha hôm rngeh kâp glah bánh tét gay năn ơm ôi njuăl kơl ƀon lan mpeh Bắc.

“Gâp bol săk hŏ ranh yơn nsrôih ndrel nklâm bánh chưng ndrel oh yuh gay njuăl kơl ƀon lan  geh dak bŭk ta ăp n’gor mpeh Bắc đŏng. Mpôl hên râng bah măng tât aƀaơ, ƀư 11 tât 12 mông măng mơ sĭt, nar aơ mpôl hên ƀư tay đŏng”.

Jay pơk tăch cà phê bah wa Nguyễn Thành Long jêng ntŭk gay kônh wa tât njuăl nklâm ndơ ntop kơl ƀon lan dak bŭk ta mpeh Bắc đŏng. Wa Nguyễn Thành Long an lah, âk năm aơ, rnôk ăp tơ̆ Đà Nẵng mô lah ƀon lan miền Trung mâp trôk nar lơh dơi geh dơn ndơ kơl bah ƀon lan lam dak. Aƀaơ ƀon lan ăp n’gor mpeh Bắc mâp jêr jŏt, kônh wa rgop êng, tâm  pă tâm kơl. Ndrel du dak mham “Kon Lạc, său Hồng”, lĕ dĭng nuĭh yô̆ nđach n’hanh ŭch rŏng dơi tâm pă jêr jŏt đah ƀon lan mpeh Bắc rnôk dja:

“Nar ntri hŏ nklâm dơi 1.000 mblâm bánh, nar aơ nklâm tay 1000 mblâm đŏng gay njuăl mpeh Bắc kơl kônh wa. Oh nô râng tâm âk rmôt ăp nuĭh ntop kơl  du ti. Kônh wa oh nô rgop prăk gay rvăt ndơ nklâm đŏng, tâm nar ôi tay mpôl hên hăn n’gor Yên Bái. Râng nău kan dja he rgum geh thôn, ƀon n’hanh tổ dân phố n’hanh oh yuh ta phường Hòa Hải, quận Ngũ Hành Sơn. Mpôl hên mô hŏ gŭ rlu nha hôm nklâm n’hanh gâm bánh chưng du măng rsol đŏng. Ndơ ƀư nuĭh ndơ geh ri an ndơ nê, ntĭt kơt dak, mì tôm bánh mì, ndơ dŏng sa khlay, mpôl hên nchih na nê̆ n’hanh njuăl tât ăp n’gor mpeh Bắc. Mpôl hên nha hôm nklâm bánh chưng tât ôi tay đŏng”.

 Ăp nar dja, du đêt ntŭk nklâm bánh ta nkual ƀon têh Đà Nẵng an lor ƀư nklâm bánh gay kơl kônh wa mpeh Bắc. N’gâng kan ta ntŭk ăp n’gor, nkual miền Trung hŏ rgŏ jă ƀon lan rgop kơl kônh wa mpeh Bắc geh  tât khuch khat bah trôk nar lơh. Ăp rmôt hăn tât kơl êng hŏ râng tâm pah kan kơl nuĭh n’hanh rgum kuaih kloh uĕh ndŏk hăch rlâm lôch bah phŭt. Ăp bôk ndeh bah miền Trung tâm nthoi hăn mpeh Bắc rdeng nkre ndơ dŏng sa khlay n’hanh bêng ăp nău tâm rŏng bah nuĭh ƀon lan miền Trung rƀŏng mpeh kônh wa nkual geh trôk nar lơh mpeh Bắc, kơl  khân păng đăp mpăn nău rêh.