Ôi 22/5, ta Jay Quốc hội hŏ ƀư ntơm pơk Rơh hop tâl 5, Quốc hội khoá 15. Lah ta rnôk ntơm pơk, Kruanh Quốc hội Vương Đình Huệ an gĭt: nchrăp tâm 23 nar pah kan, Quốc hội mĭn uănh, n’glêh an ăp nkô̆ khlay. Ndrel đah pah kan rdâk njêng pháp luật, ta rơh hop dja, Quốc hội mĭn ŭanh an dŏng 20 trong nchrăp kan khlay.

Na nê̆ kơt trong nchrăp ntuh kơl ƀư trong bah Quốc lộ 27C tât trong n’gor ĐT.656 n’gor Khánh Hòa – nthoi đah Lâm Đồng n’hanh Ninh Thuận; rgâl di trong nchrăp ntuh kơl ƀư n’glău n’gâr dak Ka Pét, nkuâl Hàm Thuận Nam, n’gor Bình Thuận…. Ta rơh hop dja, Quốc hội mĭn ŭanh siƀŭt mbơh bah Chính phủ mpeh kơi ntop ŭanh năl jêh geh tĭng ƀư trong nchrăp hun hao wăng sa- rêh jêng kon nuĭh n’hanh ngân sách ngih dak;  ŭanh an n’glêh sŏk dŏng prăk ngân sách ngih dak năm 2021. Kruanh Quốc hội an lah, ăp khay bôk năm 2023, wăng sa têh dak he đăp mpăn tay, hao khlay ndơ dơi mât kân, ăp nău tâm rlak geh nău tâm ban nău kan têh, đăp mpăn rêh jêng kon nuĭh, ndơ dŏng an nău rêh tơm bah nuĭh ƀon lan dơi đăp mpăn.