VOV4.M'nông: Kơt Radio nău ngơi Việt Nam hŏ nkoch, bar pe jât ha bri mât dŏng mha êng bah bar Bri mât gưl neh dak Chư Yang Sin (n'gor Dak Lak) n'hanh Bi Đoup – Núi Bà (n'gor Lâm Đồng) hŏ geh lơh n'hang mô geh nău way rnôk ăp tơm nuĭh ƀư trong Trường Sơn Đông. Bri mô hŏ geh gưl nău dơi kan pă an si ƀŭt rgâl dŏng, nău lơh mô geh groi nđôi bah nuĭh tơm bri, nhih pah kan dơi kan. Nkô̆ nău ndơ̆ luh lah đah du rnoh hvi neh bri mât dŏng mha êng bah bar Bri mât gưl neh dak geh lơh n'hang kơt nê̆, rnoh si mô đêt aƀaơ hŏ ah ntŭk hăn? Phóng viên Radio nău ngơi Việt Nam ta Tây Nguyên geh nău nchih nkoch.

Ta ntŭk geh lơh n'hang bri nuĭh lâng gay ƀư trong Trường Sơn Đông mpeh ăp tiểu khu 22 n'hanh 26, mpeh n'har Bri mât gưl neh dak Bi Đoup - Núi Bà, kâng đah xã Đưng K’Nớ, nkuâl Lạc Dương, n'gor Lâm Đồng. Ta aơ, du njăr trong jong rlău 3km hŏ dơi pơk rloh ăp rlô bri lha tư̆- ngâr gle, bri lha rhên mô uĕh jêng, bri lha rhên n'hanh neh lưn bah bri mât gưl neh dak Bi Đoup - Núi Bà. Njok tĭng meng trong hŏ lôch ƀư aƀaơ mô têl du đêt n'gu tơm si geh nhuĭh rôk, geh neh lŭ bôr ndâp. Hăn uănh ntŭk geh lơh, wa Thân Văn Hữu, Bí thư Đảng uỷ nkre ƀư Kruanh UBND xã Đưng K’nớ (nkuâl Lạc Dương) an gĭt, nău nhuĭh bri gay ƀư trong ƀư tâm năm 2021:

        “Mpôl hên ntơm nơh hăn rsong uănh mbro, saơ tơm nuĭh ƀư trong đŏng, yơn ma nuĭh tơm ƀư trong mô tâm ôp đah n'gâng kan ta ntŭk mô lah mbơh ăp trong nchrăp ƀư đŏng. Nuĭh tơm ƀư trong mô tâm ôp, mô pah kan đah xã. Mpôl hên dơn gĭt trong dja dôl ma ƀư dơm, dôl manh ƀư dơm. Aƀaơ rđău đă ăp oh nô hăn ôp uănh mbro, ƀư lhăt, mô an nde rnôk ƀư trong dja gay lăp lơh tât bri, lơh si mô geh nău way."

         Wa Nguyễn Lương Minh, Groi giám đốc Bri mât gưl neh dak Bi Đoup - Núi Bà an gĭt, gay dŏng an ntŭk ƀư trong Trường Sơn Đông, UBND Lâm Đồng hŏ geh nău n'glêh an sŏk mplơ̆ 13,5ha bah bri jao an Ƀan mât uănh trong nchrăp 46. Tĭng quy định, nău ƀư trong dơn dơi an ƀư lôch rnôk gưl geh nău dơi kan uănh an dŏng rgâl bri dơm, n'gâng kan n'hanh n'gâng kan dơi kan ta ntŭk ƀư mbluh aih rong ntŭk an ƀư trong, ndăn dŏng si, jao neh rong an ƀư trong. Yơn lah, rnôk mô hŏ lôch jêh ăp ntil si ƀŭt ri nuĭh tơm ƀư trong hŏ lăp êng tâm bri nhuĭh neh bri. Nău dja lah tih đah ăp nău way ngih dak n'hanh aƀaơ hôm mô hŏ năl rnoh âk si geh roh yot:

         “Tơm si ri geh đŏng, mpeh Chi cục Kiểm lâm dôl hăn uănh năl, nar ntri, nar r'e hên lăp uănh gay ƀư kloh nkô̆ nău dja đŏng. Ri nău dja UBND n'gor hŏ rđău đă ăp nhih pah kan lăp ƀư kloh, jêh aơ tay mbra nchih kơp, lôch nê ƀư kloh nău dơn kan bah ăp ding dơm."

         Tâm rnôk nê, mpeh n'har bri mât gưl neh dak Chư Yang Sin, ăp nhih pah kan dơi kan n'gor Dak Lak bôk năp ntrŏng năl, ăp nuĭh tơm ƀư trong Trường Sơn Đông ta gâl ƀư ndranh Đ41 hŏ nhuĭh rlău 15ha bri hăn rlău bar tiểu khu 1383 n'hanh 1402 rnôk mô hŏ geh nău n'glêh an rgâl dŏng neh bri, mô hŏ ndăn dŏng si. Rlău 7km trong hŏ ƀư lôch jêh, mbluh rlău bri lha tư̆ way nđĭr uĕh, bri tâm rlŭ, bri ngâr nkar. Wa Nguyễn Quốc Hưng, Chi cục trưởng Chi cục Kiểm lâm n'gor Dak Lak an gĭt, rnôk ƀư si ƀŭt rgâl bri an ƀư ndranh Đ41, nchrăp ƀư trong Trường Sơn Đông, nhih pah kan dơi kan hŏ năl rnoh âk si lah rlău 260m3:

        “Hăn uănh tay ta ntŭk bri, nchrăp an si ƀŭt rgâl dŏng neh bri ri 16,72ha dja geh du đêt neh bri, si. Tâm nê rnoh âk si dơi năl lah 264m³. Mô hŏ geh trong nkra ndăn dŏng si lah yor mô hŏ geh nău n'glêh an rgâl dŏng neh bri. Lôch rnôk geh nău n'glêh an rgâl dŏng ri du rêng bah kơi lah mbra ƀư weh ntrŏng bài tơm si gay năl rnoh âk si gay ndăn dŏng, gay tăch klŭp an ngân sách.”

         Đah bar pe jât ha bri mât dŏng mha êng dơi mât njrăng lhăt bah 2 Bri mât gưl neh dak ri rnoh âk si nklăp mô đêt. Ndrĭ yơn, aƀaơ lĕ rngôch rnoh si ta du njăr trong jong rlău 10km hŏ geh lơh lĕ klor. Aƀaơ dơn hôm têl du đêt tơm si geh bôr ndâp meng trong dơm, geh tơm trong rval têh tât bar hê nuĭh ut. Nău âk nuĭh uănh khlay lah rnoh si ta njăr trong mhe pơk rloh bri mât dŏng mha êng mpeh 2 Bri mât gưl neh dak Chư Yang Sin (n'gor Dak Lak) n'hanh Bi Đoup – Núi Bà (n'gor Lâm Đồng) hŏ ah ntŭk hăn? N'hanh nuĭh i dơn nău tih an tơm ndơ mpêt khlay gưl neh dak geh roh huach lĕ?./.

Nuĭh rblang: Điểu Thân