VOV4.M’nông: Lơ 8/4, ta nkuăl ƀon têh Pleiku, N’gâng kan tuch tăm ndrel hun hao ƀon lan tâm rgop nsum đah UBND n’gor Gia Lai ƀư nchră Nua dôl geh ndrel trong rƀŏng hun hao bum blang ta Việt Nam. Rnôk aơ, dak nơm geh rlau 528 rbăn ha bum blang, ngăn lah rgum tâm nkuăl mpeh yôk ba lơ, Bắc Trung Bộ, Duyên hải Nam Trung Bộ, Tây Nguyên ndrel Đông Nam Bộ. Năm 2021, rnoh bum blang lam dak nơm geh bơi tât 10,7 rkeh tấn, tâm nê geh 2,9 rkeh tât geh tăch luh dak ba dih, rnoh geh geh bơi tât 1,2 rmen đôla.

Tâm nar rƀŭn, Kruanh n’gâng kan Tuch tăm ndrel hun hao ƀon lan Lê Quốc Doanh mbơh, rơh tât, ăp rmôt kan bah N’gâng kan tuch tăm ndrel hun hao ƀon lan mra n’hao nau mĭn ƀư ăp ntil bum blang mhe geh rnoh âk lơn, nâp lơn, rdâng bu tuh ueh. Kruanh n’gâng kan đă ăp nkuăl ndrel ntŭk ƀư nau kan gay ƀư nau tuch tăm tĭng trong n’huch prăk dŏng, n’hao nau geh, n’hao nau nâp, rgâl mhe nau kan, ntrŭt dăng nau nkra, mât ntŭk ntu ndrel tâm rgop ƀư ân nâp./.

Nŭih rblang: H’Thi