Kêng măng 7/4, ta Hà Nội, Rnâng kan Uỷ ban Trung ương MTTQ Việt Nam ndrel Uỷ ban Dân tộc ƀư rơh rƀŭn nchră nau nchrăp tâm rgop nau kan năm 2023. Wa Đỗ Văn Chiến, Bí thư Rnâng kan Trung ương Đảng, Kruanh Uỷ ban Trung ương Mặt trận Tổ quốc Việt Nam ƀư tơm nar rƀŭn. Ƀư tĭng bôk nau kan tâm rgop bar ding nchrăp nkoch mbơh nau tât ƀon lan, kônh wa ăp rnoi mpôl đê̆ mpeh ăp nau ntrŭnh bah Đảng, nau ntrŭnh pháp luật bah Ngih dak mpeh nau kan rnoi mpôl, nau kơl an rnoi mpôl đê̆ ndrel nau tâm rnglăp lam rnoi mpôl.

Nkre ƀư ăp nau kan nkoch trêng, bonh đă kônh wa ăp rnoi mpôl đê̆ nsôih râng ƀư ăp nau kan bah neh dak. Ntoh nau tâm nar rƀŭn, wa Đỗ Văn Chiến, Kruanh Uỷ ban Trung ương Mặt trận Tổ quốc Việt Nam rnê prêh nau kan tâm rgop bah bar ding rgop nau ngăn tâm nau ndâk njêng nau kơl, đă tâm rơh tât bar ding tâm rgop ƀư ân rjăp ăp nau kan, nau ntrŭnh hun hao nkuăl rnoi mpôl đê̆, ngăn lah bôk nau kan bah neh dak hun hao văng sa, rêh jêng nkuăl rnoi mpôl đê̆, gôl yôk lvang năm 2021-2030./.