VOV4.M’nông: Di nkah 50 năm nar lơh dơi Đăk Tô-Tân Cảnh (24/4/1972-24/4/2022) tâm nkuăl ƀon têh Kon Tum, N’gâng kan neh dak ƀư tơm tâm rgop đah N’gor uỷ Kon Tum ƀư rơh tâm nchră khoa học gưl kan N’gâng kan neh dak đah nkô̆ “Nau dơi rklaih Đăl Tô-Tân Cảnh-Rnoh khlay bah nau ơm ndrel nau geh gĭt nau kan”. Rơh tâm nchră đah nau râng bah 250 ntoh măt lah rđau tahen, nŭih janh dăng tâm rmôt tahen ƀon lan, nŭih tă geh râng kan kăl e, nŭih kan khoa học, nŭih tahen ơm, ntoh măt ntŭk kan Trung ương, n’gor Kon Tum ndrel âk n’gor, nkuăl ƀon têh tâm lam dak hŏ ƀư ueh nau khlay bah nau lơh dơi rklaih Đăk Tô-Tân Cảnh tâm rơh tâm lơh bah rnoi nơm.

            Hŏ bơi tât 50 năm, đah nau rđau kan bah Trung ương Đảng, Quân uỷ Trung ương, ngăn lah N’gâng kan tahen Tây Nguyên, lơ 24/4/1972 tahen ndrel ƀon lan he lơh tâm ntŭk gŭ bah rmôt tahen Sài Gòn ta Đăk Tô-Tân Cảnh ndrel geh nau dơi.

            Nau dơi rklaih Đăk Tô-Tân Cảnh rgop nau ƀư ueh nau dơi nau kan rơh 1 bah rơh tâm lơh ba lơ Tây Nguyên. Aơ lah rnôk tâm lơh bôk năp bah rmôt tahen Tây Nguyên lơh rlăng đah nau leo lăp tahen nsum âk ngăn, geh nau ƀư ngăch ngăn, lơh dơi ntŭk gŭ bah rmôt tlăng, nâp ngăn tâm ntrong njrăng rdâng bah tahen Sài Gòn tâm mpeh ba lơ Tây Nguyên, pơk luh nau dơi geh lơh têh, rƀŏng tât rklaih lĕ Tây Nguyên. Nau dơi Đăk Tô-Tân Cảnh hŏ geh rklaih du nkuăl neh têh bah n’gor Kon Tum dah 15 rbăn ƀon lan tă bah Đăk Tô-Tân Cảnh tât Võ Định.

            Lah rjăp nau khlay bah rơh tâm nchră khoa hoch Nau dơi rklaih Đăl Tô-Tân Cảnh-Rnoh khlay bah nau ơm ndrel nau geh gĭt nau kan”, Thượng tướng, Tiến sĩ Lê Huy Vịnh, Uỷ viên Rnâng kan rđau kan Trung ương Đảng, Uỷ viên Quân uỷ Trung ương, Kruanh n’gâng kan neh dak, Kruanh Rnâng kan rđau rơh rƀŭn nchră lah rjăp:

            ‘Rơh tâm nchră lah rơh gay lam Đảng, lam ƀon lan, lam tahen nkah tay nau ơm lơh rdâng janh dăng bah ăp rơh mbơ̆, nô nkah tât ăp đồng chí, kônh wa nơm hŏ tâm lơh, khĭt tâm rnôk tâm lơh jŏ jong gay ma nsĭt ndrel mât nau đăp mpăn bah rnoi mpôl, dah rŏng ndrel ma tâm ban neh dak. Nau tă geh bah rơh tâm nchră mra rgop nau ƀư ueh nuih n’hâm rŏng dak, ntô̆ n’hao rnoi mpôl nsôih ŭch đăp mơpăn, ƀư tơm ndrel ŭch ueh lăng, ƀư nâp nau rnơm ndrel snôih chính trị bah lam Đảng, tahen ndrel ƀon lan”.

            Đah rlau 80 nau mbơh, nchră, tâm nê geh âk nau bah ăp nŭih rđau kan, rđau kan ơm bah Quân uỷ Trung ương, N’gâng kan neh dak, ăp nkuăl, ăp rđau tahen, sĩ quan, nŭih râng tâm lơh kăl e, ăp nŭih kan khoa học tâm ndrel bah dịh tahen njoăl tât mbơh tâm rơh nchră gay ƀư kloh nau rlăng bah phung Mỹ ndrel n’gâng kan Sài Gòn kăl e, Nau dơi ndrel rmôt cách mạng miền Nam ndrel nkô̆ nau tâm lơh nsĭt dơi ntrŭnh nau lơh rdâng du nhoat bôk năp tâm nau kan “Việt nam tâm lơh”. Wa Trần Thanh Dân, Groi Bí thư n’gor Kon Tum, năm aơ 96 năm, uănh khlay ngăn tât nau snĭt, mât dnrel ƀư ueh n’hâm dăng ƀon lan tâm rnôk tâm lơh rklaih Đăk Tô-Tân Cảnh:

            ‘Geh nuih n’hâm lah gegh nau lơh rdâng ndrel ntơm ndâk. Geh nuih n’hâm ƀon lan tahen mô janh lơh rdâng nơm. Tahen rlăng ma joi lơh nơm ri nơm mâp nau jêr âk ngă, roh khuch ndrel mô dơi rdâng kan tâm nkuăl geh phung rlăng. Tahen nơm mô lơh dơi ri phung rlăng tâm dâng mra jêng hôi ndrel geh nau tâm lơh raih. Nau dơi ndrel rmôt kan bah ƀon lan hao nâp ri phung rlăng mô geh nau dơi lah kơt nê”.

            Ăp nau tâm nchră ta rơh rƀŭn kŏ lah rjăp, ƀư kloh nau kan, nau ntrŭnh rđau, đă rơh tâm lơh njrăng rdâng phung Mỹ kơl an neh dak, nau kan tâm di, năn bah Trung ương Đảng ma ngăn lah Quân uỷ Trung ương dnrel N’gâng kan neh dak tâm nau nsôih pơk luh nau tâm lơh năm 1972, ndâk tay nau rđau, đă kan ƀư ndrel ƀư tay nau tâm lơh ân ueh, blau mhe, ăp nau tă geh dơi nau kan mpeh nau blau rđau kan tahen, nau kan, ƀư ueh ndrel kơt tĭng lăp tâm nau ndâk nkuăl njrăng rdâng, ƀư nâp neh dak, mât rnă njrăng ân nêp neh dak Việt Nam xã hội chủ nghĩa.

            Ntô̆ n’hao đah nau vay ơm bah tahen Tây Nguyên janh dăng, ntô̆ n’hao đah nau moh Binh đoàn tây Nguyên, lah quân đoàn tơm ƀư nau kan bah N’gâng kan dôl ƀư nau kan tâm nkuăl Tây Nguyên, Thiếu tướng-tiến sĩ Nguyễn Anh Tuấn, Rđau kan Quân đoàn 3, lah rkăp:

            ‘Cán bộ, tahen Quân đoàn 3 saơ kloh nau ntô̆ n’hao ndrel nau kan têh ngăn tâm nau ndâk njêng mât neh dak. Quân doàn hŏ rgum ƀư tâm ban ăp ntrong kan ndâk njêng rmôt kan nâp nâl ăp ding. Cán bộ, tahen lam Quân đoàn nsôih mât nkuăl, mât tâm dâng ndâk nau tâm rnglăp, tâm boh nting mham đạh ƀon lan, ndrel ƀư nâp nau kan nuih n’hâm ƀon lan tâm nkuăl Tây Nguyên njêng n’hâm dăng rgum nsum ƀư geh dơi ăp nau kan geh jao”.

            Rơh tâm nchră khoa học: “Nau dơi rklaih Đăl Tô-Tân Cảnh-Rnoh khlay bah nau ơm ndrel nau geh gĭt nau kan” yor N’gâng kan neh dak ƀư tơmhŏ rgop nau ƀư kloh lơ, jru lơi ăp nau kan ngăn ntơm bah rơh Đăk Tô-Tân Cảnh. Aơ lah nau kan khoa học gay ma kơt tĭng tâm nau kan tahen, neh dak, rgop nau ƀư jêng nau dơi nau ndâk njêng ndrel mât neh dak tâm rơh mhe. Nkre kah nau kan nâp gay ma lơh rdâng ăp nau ƀư mhĭk, nau ŭch lơh raih, nau ƀư nkoch mô ueh nau ơm bah ăp phung rlăng, rgop nau ƀư ntĭm nti nau ŭch nau ơm mpeh lơh rdâng bah cách mạng, bun dăp nuih n’hâm nuih rŏng dak, nau ntô̆ n’hao bah rnoi mpôl ân cán bộ, tahen ndrel ƀon lan, ngăn lah ăp rơh kơn nŭih Việt Nam nar aơ ndrel jêh aơ./.

Nŭih rblang: H’Thi