Ôi lơ 12/12, ta nkuăl ƀon têh Cần Thơ, N’gâng kan ntĭm nti hŏ ƀư nar rƀŭn nchă nau kan ntĭm nti neh dak ndrel rnă njrăng kon se nti Trung học phổ thông tal III năm 2022.

Rơh tâm nchră geh ntơm lơ 12-17/12. Geh 633 nŭih tă bah 54 n’gor, nkuăl ƀon têh tâm lam dak râng. Ăp nŭih râng rlong tâm 9 nkô̆: Gĭt nau nsum mpeh neh dak ndrel rnă njrăng, rmôt kan tiểu đội, rmôt kan bah ăp nŭih mô geh phao, nau blau mpeh nau kơl săm, ntrơn leo nŭih rmanh; klŭp ndrak ngai geh tom ntŭk, doh rnglăp phao tiểu liên AK; dŏng ăp nau ƀư bah săk nơm rnôk geh nau tâm lơh; nchuăt ngai 800m, păng phao tiểu liên AK.

Môn ntĭm nti neh dak ndrel rnă njrăng hŏ kơl an kon se nti THPT tâm lam dak hun hao ăp ntil, geh nau gĭt bôk năp mpeh ăp nkô̆ nau bah nau kan neh dak tâm lam ƀon lan, rnă njrăng ƀon lan, tâm lơh rdâng phung rlăng lăp in bah rnoi mpôl, rmôt tahen ƀon lan ndrel nau blau mpeh tahen Việt Nam./.