Nthoi tay rơh hop tâl 5, nar 21/6, Quốc hội tâm nchră ta Hội trường mpeh trong nchrăp Luật Neh ntu (rgâl).  Nsing kalơ nău djăt, rblang nău rgop đại biểu Quốc hội ta Rơh hop tâl puăn n’hanh lôch sŏk nău rgop ƀon lan, trong nchrăp Luật mbơh rblang rơh hop dja dơi ŭanh lah hŏ rgâl geh ngăn mpeh drăp ndơ. Bol ma kơt nê̆, hôm âk nău rgop wĭ wĕ đah quy định mpeh Ntrŏng năl rnoh khlay neh tĭng nău way ntŭk tăch rgâl đŏng” n’hanh nău trok tâm, ntop kơl, ntrơn du ntŭk gŭ mhe rnôk ngih dak sŏk mplơ̆ neh. 

Âk đại biểu an lah, nău ntrŏng rnoh khlay neh hôm âk nău khoah, kŏ kol, tâm chong cheng n’hanh mô tâm di. Nău ntrŏng năl rnoh khlay neh hôm tĭng nău uănh năl ma măt, mô tăch luh kloh rnoh khlay neh tĭng ntil neh. Ndrel du ntil neh, ntŭk ntô rêh jêng geh tâm ban yơn hôm rnoh khlay neh êng êng. Ăp nuĭh an lah, trong nchrăp Luật mô hŏ geh quy định mô hŏ năl gĭt khuch khat rnôk ngih dak sŏk mplơ̆ neh, nău lah trok tâm mô hŏ tâm di, dơn quy định trok tâm mpeh neh dơm, mô quy định trok tâm roh huach mpeh drăp ndơ êng ƀa ƀă./.