Nău nchih 1: N’gâng điện bring, ntŭk kan tŭp tâm nau lŭp

  VOV4.M’nông: Bar năm 2020-2021, lah rnôk geh nau dơi ngăn bah nkuăl Tay Nguyên tâm nau rgum ntuh kơl lah kơp tĭng rnoh ƀư ăp nau kan geh ntrŭnh. Tâm nê, knŭng êng ăp nau kan điện sial, hŏ ntroch tâm nkuăl geh rlau 85 rbăn rmen, ndrel ma âk nau mpŏng ŭch mpeh nau săk geh văng sa, rêh jêng. Yơn lah, rnôk nar dŏng ân ăp nau kan hŏ lôch, Tây Nguyên lah ntŭk rđŭng khuch ngăn bah âk nau hôm nkol, nau khuch. Ăp nau kan nau kan ƀư rgum nsum ân geh rnoh FIT bah Chính phủ, kŏ mô ngăn ngên geh nau dơi, ăp nau kan hôm nkol jêng nau jâk bah ntŭk kan...ndrel âk nau tih bah ăp nau ƀư ndăn, ƀư tih, dôl kâp nau rklaih.

            Tâm trong Quốc lộ 15-Trong Hồ Chí Minh rlet nkuăl Dak Song, n’gor Dak Nông, ăp tourbin điện sial nglang, prêh rlau ma rhiăng mét, yơn knŭng gŭ gâng tâm ăp yôk ndrih brĭng. Lôch âk khay ma aơ, bol ma rnoh sual âk, mô lah đê̆, ăp tuorbin aơ hôm dâk n’gâng, mô geh ntoh luh du kwh điện ôh. Mpeh tâm dâng măt neh, ăp ntŭk yôk lơi dơm hôm geh âk ngăn n’gâng điện sial, yơn ăp ndeh gay ma ndâk nkra ri mô hôm saơ. Wa Chẩu Văn Sơn, Giám đốc Công ty TNHH du ntŭk kan ŭnh nar Dak NDrung 1, 2 ndrel 3 mbơh, ntŭk kan khân păng ntuh kơl rlau 15 rbăn rmen ta aơ, ton lah rnôk jêh, mra nthoi leo dŏng bah năp lơ 31/10/2021 ndrel tăch geh rnoh 1.928 rêh/kwh. Yơn công ty jêh nê hŏ ngăch ndơn lah nơm mô geh nau dơi. Dŭt khay 10 năm e, knŭng bar pe n’gâng geh sial tâm rnoh 89 n’gâng. Ntơm nê tât rnôk aơ, ntŭk kan hŏ ntrơn nau leo ntrong ntuh kơl, ntơm bah nau ƀư ân ngăch gay ma geh sa ri ntrơn jêng ƀư ân mbrơi gay ma hôm rêh:

            ‘Jêh ba kơi lơ 31/10/2021 rnôk ma mô geh rnoh FIT tay ôh ri nau kan bah hên mbrơi hô ngăn. Yor lah nau kan tâm rnôk rnoh FIT păng rlau hôm, lah nơm ntrŭt dăng ngăch nau kan ri lơn ma khuch tay đŏng, nau kan mbrơi lơn gay ma n’huch oi rnoh ƀư kan”.

            Kŏ nchăm rlong ma nar khay, lơ 31/10/2021, Ngih máy điện Nam Bình 1 (nkuăl Dak Song, n’gor Dak Nông), dôl ma nsôih ât rdâng đah nau lŭp têh. Wa Lê Văn Tiến, Groi giám đốc Ngih máy điện sial Nam Bình 1, mbơh:

            ‘Hŏ ƀư jêh bơi tât du năm, yơn lah lĕ ma ngih máy rlau du rbăn rmen prăk hôm dâk gâng. Tâm ăp khay ntŭk kan hên hôm trok prăk bay ma ƀư nau kan bah ngih máy ndrel nklăp lah lŭp nklăp 10 rmen prăk/khay”.

            Tâm ăp n’gor Tây Nguyên, Gia Lai geh nau dŏng n’hâm sial têh ngăn, đah 17 bôk nau kan, rnoh dăng nklăp 1.200 MW. Ndrel ăp nau kan điện n’hâm sial tâm Gia Lai kŏ tŭp tâm nau 5 sa/5 lŭp, rnôk ma rhiăng n’gâng tourbin, dăng rlau 620 MW tâm 10 bôk nau kan geh tŭp rnoh FIT, tŭp tâm nau “dâk gâng”, ƀư ntŭk kan tăch rgâl dâk, gŭ mô đăp dôl am rvê ăp tnoh prăk dŏng lơn nar lơn ma khuch, mro mrăng mô geh nsĭt. Kŏ kơt âk ngih ntuh kơl điện sial bah lam dak, du đê̆ ntŭk kan điện sial tâm Gia Lai ân lah, nau khuch khat ngăn bah khân păng knŭng lah nau tât nsum kơt lah srê Covid-19 ƀư mbrơi nau kan, ăp nau kan đă ân geh ƀư rjăp ma nau kơp dơn nau leo dŏng nau kan tăch rgâl geh tât nau rlong kỹ thuật, ƀư phung ntuh kơl tŭp tâm nau khuch.

Yơn lah, tĭng wa Nguyễn Hữu Quế, Giám đốc N’gâng kan nchrăp kan ndrel ntuh kơl n’gor Gia Lai, ntŭk kan geh điện n’hâm sial knŭng blau nduih êng săk nơm. Tâm rnôk n’gor kuăl jă nau ntuh kơl năm 2020, srê Covid-19 dôl tât jêr. Ăp nau kơl an bah Ngih dak geh tât điện sial, kŏ geh ntrŭnh ntơm bah năm bah năp gay ma ntuh kơl mĭn, săch ƀư. Ndrel nau ngăn lah ndrel tâm du ntŭk, nau kan, hôm geh nau ƀư jêh ơm, yor ri kŏ mbrơi lơn tay bah n’gâng kan ndrel nau kơl an:

            ‘Geh nŭih ntuh kơl bu ƀư nsrôih rjăp ngăn, yơn geh nŭih ntuh kơl bu hôm nkol đŏng nê lah nau kan êng bah khân păng, yơn hôm ta aơ lah nau kan nsum. Geh ăp tơm ntuh kơl kơl bu lăp ba kơi, ndâk ƀư nau kan ba kơi, yơn lah ân jêh tâm di nar 31/10, yơn lah ăp nau ma păng ƀư ri hôm mbrơi ngăn, kơt lah mô tŏng nŭih pah kan mô lah pah kan đah tơm ntuh kơl ƀư nau kan mô geh đăp mpăn nau dơi ri hôm mbrơi. Nê lah nau kan bah tơm ntuh kơl mô di lah bah Ngih dak”.

            Đah nau kan rlau n’gul nau dơi ƀư kan hôm ê geh dơi, bol ma geh nkô̆ nau ngăn ngên tă bah nau mô dăng bah tơm ntuh kơl, ndrel ma lah geh ndơ sa ndrel mô geh ri khơm lah nau geh bah rmôt ƀư kan tăch rgâl. Yơn lah, nau mô dơi bah ăp bôk nau kan nkra điện sial tâm Tây Nguyên, ƀư rlau n’gul tâm rnoh rlau 85 rbăn rmen tơm prăk ntuh kơl geh mpŭng lir, mô êng lah nau kan bah ntrong kơp rnoh ƀư kan tăch rgâl. Ntơm bah rnôk n’gor mbơh nau kan gay ma ntuh kơl, tât ntŭk kan ƀư kan đăng ký, ƀư săm ƀŭt kan...tât rnôk lôch nau ân ƀư, rnoh ƀư nau kan knŭng bơi tât 2 năm, ma srê Covid-19 hŏ geh nkah tă bah ơm. Yơn lah, ăp nkuăl hôm ƀư ndal, rgum nau ntuh kơl ndrel ăp ntŭk ƀư nau kan tăch rgâl hôm nsôih ƀư nau ntuh kơl đah ăp ntrong, nkre dăp ntrong nkre nchuăt. Ntrong mĭn nau kan mô nâp, mô jêng aơ hôm têk tĭng âk nau khuch êng êng./.

  Nŭih rblang: H'Thi