VOV4.M’nông: Ôi lơ 17/3, tâm nkuăl Krông Pách, Dak Lak, N’gâng kan sở hữu trí tuệ (N’gâng kan Khoa học Công nghệ) tâm rgop nsum đah UBND n’gor Dak Lak ƀư nau pă săm ƀŭt kơp dơn “Sầu riêng Krông Pách”. Krông Pách lah nkuăl tăm tơm sầu riêng âk ngăn bah n’gor Dak Lak, đah rnoh tăch rgâl rlau 2.500 ha, rnoh geh ăp năm nklăp 45 rbăn tât 50 rbăn tấn, nau geh ntơm 2.200 tât 2.400 rmen.

Nau kan geh kơp dơn lah nau dơi nau ma nŭih tăm, ntŭk kan dơi geh hun hao ăp nau geh jêng mpeh nau nâp kah, tu tơm, rgop nau n’hao nau ntoh lư, hun hao ntŭk tăch ân ntil sầu riêng bah nkuăl. Bí thư nkuăl uỷ Krông Pách Trần Hồng Tiến mbơh, ăp n’gâng kan dôl tâm rgop nsum ma ƀon lan, ntŭk kan ăp nhoat ntơm ƀư ân jêh ăp nau kan gay ma sầu riêng Krông Pách jêng ndơ geh tăch âk, tŏng nau dơi gay ma tăch tât ăp dak têh kơt Nhật Bản, Hàn Quốc, Úc, Hoa Kỳ mô lah EU./.

Nŭih rblang: H’Thi