Nar 12/6, N’gor Dak Lak hŏ n’gluh siƀŭt ôp kuăl bah Tỉnh Ủy, Hội đồng nhân dân, Ủy ban nhân dân, Ủy Ban mặt trận tổ quốc Việt Nam. Tâm siƀŭt njuăl, n’gor Dak Lak lah kloh: Ƀon lan ăp rnoi nuĭh bah n’gor dŭt nuih ăl mpeh nău ƀư tih pháp luật bah mpôl tih djơh dja. Mpôl kan dơi kan dôl ndăn rgot nhŭp ăp mpôl dja n’hanh dôl joi tĭng nhŭp ăp nuĭh hôm ƀa ƀă gay rmal lhăt tĭng di quy định bah pháp luật. Ăp gưl uỷ, n’gâng kan ta ntŭk hŏ an ƀư  ăp trong nkra gay đăp mpăn nô nău, ngăch ôp khâl, ntop kơl ăp rnăk nuĭh geh khĭt, geh rmanh; mbơh, rgŏ jă ƀon lan nkân nkân, mô phit klach, tĭng ƀư di trong ntĭm nti bah nhih pah kan dơi kan.

Tỉnh uỷ - HĐND - UBND - UBMTTQ Việt Nam n’gor nduih lah ngăn nău tih rdôl lơh nhih pah kan  ngih dak, nkhĭt nuĭh, tih jru pháp luật bah mpôl mhĭk djơh hŏ ƀư jêng; nkre, dăn tâm pă đah ăp nău rngot klâng n’hanh roh yot têh bah rnăk ăp tahen công an, cán bộ n’hanh nuĭh ƀon lan. N’gor Dak Lak ôp kuăl ƀon lan, nuĭh ndrel kan n’hanh tahen ta n’gor tâm rnglăp du nuih n’hâm, nsing nơm tâm trong nchrăp, trong kơl bah Đảng, nău rđău đă bah gưl uỷ n’hanh nău ƀĭt juet bah n’gâng kan ăp gưl. Nsrôih râng tâm trong leo “Lam ƀon lan mât rnă njrăng neh dak”, ntô̆ n’hao suan dăng bah ntŭk nsing njrăng n’gang neh dak lam ƀon lan nkre đah rnă njrăng lam ƀon lan nâp dăng; kan nsum, ntop kơl ăp mpôl kan dơi kan tĭng ƀư nău; nsum ti kơl, tâm pă roh yot rngot klâng đah ăp rnăk tahen công an, cán bộ n’hanh nuĭh ƀon lan geh nău tât; đăp mpăn pah kan jan sa, mir ba , rgop tâm nău đăp mpăn, hun hao bah n’gor. Mô nchih nkoch ăp nău lư geh tât ta mạng xã hội rnôk mô hŏ gĭt năl tih di, ƀư khuch tât rnôk tĭng ƀư nău kan bah ăp mpôl kan dơi kan n’hanh ƀư jêng phit klach, nău mĭn rvê tâm ƀon lan; n’hao nuĭh n’hâm njrăng uănh, mô “djăt, mô tĭng, mô kơt ƀư” ăp mpôl rlơn lơh, ăp phŭng rlăng bu êh rkeh nde tâm nô nău dja gay nchoh chôl nkoch nklă, têk  klônh rdâng lơh n’gâng kan ta ntŭk, ƀư roh rnă njrăng chính trị ta ntŭk.