Ăp nar dja, n’gâng kan ntĭm nti n’gor Dak Nông dôl nsrôih an ƀư ăp trong gay rgŏ jă kon se nti ta nkual jru, nkual ngai, nkual dŭt jêr jŏt mha êng tât nti. Ndrel đah nău nsrôih bah ăp nai ntĭm nti, ăp trong kơl dơh bah ngih dak dôl nsrôih ntop kơl an ăp nkual jru ngai mât rnoh âk kon se nti, n’hao săk blău ntĭm n’hanh nti đŏng.

Pơh n’glĕ dŭt khay 8, nai ntĭm Nhih nti THCS n’hanh THPT Lê Hữu Trác tât khâl rnăk bar hê yuh nur Thị Chúc, Thị Yêm, nuĭh Bu Nong (thôn Tân Bình, xã Đắk Ngo, nkuâl Tuy Đức, n’gor Dak Nông). Bar hê oh dôl kơl me bơ̆ jik pih, poh phân an mir cà phê. Rnăk oh mpeh săk ach o, du hê bơ̆ kan tơm dơm, me geh lêt nho săk, nô bu klô geh tâm tom ndeh. Oh Thị Chúc dŭt rngot rhơn saơ ăp nai ntĭm tât khâl, rgŏ jă:

“Rnăk mon jêr jŏt, geh nai ntĭm nti, me bơ̆ bonh đă hăn nti. Năm nti mhe mon hŏ nchrăp siƀŭt sitra ăp tŏng hôm. Mon mbra nsrôih kơt nti an me bơ̆ rhơn”

Wa Điểu Thắng, bơ̆ oh Thị Chúc n’hanh Thị Yêm an gĭt, bar hê kon bu ur hŏ 15 năm deh hŏ bơi jêng nuĭh kan tơm, yơn wa nha hôm way rgŏ jă ăp oh kon hăn nti gay nău rêh jêh aơ tay nău oi krit jêr. Nơm geh ăp trong ntop kơl bah Đảng, Ngih dak ma ăp kon păng mô ntlơi nti n’guh wah.

“Rnăk hên dŭt jêr jŏt, hôm ngai đah nhih nti đŏng, nơm geh dơi nău mât uănh bah Đảng, Ngih dak, nhih nti, ntop kơl an ăp mon său prăk gŭ, prăk sa, prăk rsong hăn. He nsrôih rgŏ jă ăp oh kon nsrôih kơt nti  gay gĭt rplay siƀŭt, gĭt kơp nđăp gay nău rêh jêh aơ tay bah ir krit jêr đŏng.”

Wa Nguyễn Thế Hiệt, Hiệu trưởng nhih nti THCS – THPT Lê Hữu Trác, xã Đắk Ngo, nkuâl Tuy Đức, n’gor Dak Nông an gĭt, ta  nkual dŭt jêr jŏt mha êng, âk kon se nti jêng nuĭh kan tơm rnôk mhe 15-16 năm deh. Gay mât rnoh âk kon se nti, ban giám hiệu n’hanh ăp nai ntĭm way sĭt tât ăp ƀon lan rgŏ jă ăp kon se nti hăn nti. Rnôk hăn rgŏ jă, nai  ntĭm nkoch trêng ăp trong kơl bah Đảng, Ngih dak rong an kon se nti  nkual jru, nkual ngai, nkual rnoi mpôl đê̆, kơl me bơ̆ kon se nti, kon se nti nơm wât nău khlay b ah nău hăn nti đah nău rêh.

“Ban giám hiệu nhih nti ndrel đah nai chủ nhiệm, nkre kan nsum đah ăp thôn ƀon, n’gâng kan ta ntŭk hăn rgŏ jă ăp kon se hăn nti. Mpeh trong kơl ri xã nkual 3, nkual dŭt jêr jŏt mha êng jêng geh 2 trong kơl tĭng Nghị định 81 ntop kơl prăk nti n’hanh Nghị định 116 ntop kơl phe, prăk gŭ, prăk sa an ăp kon se, dŭt uĕh.”

 Wa Phan Thanh Hải, Giám đốc Sở Giáo dục n’hanh Đào tạo n’gor Dak Nông an gĭt, n’gor êng uănh khlay tât kon se nti ta nkual jru, nkual ngai, nkual rnoi mpôl đê̆. Nchrăp an năm nti mhe, n’gâng kan ntĭm nti kan nsum đah lam n’gâng kan chính trị tâm dâng lor nchrăp hăn tĭng ƀon gay rƀah gĭt nô nău n’hanh rgŏ jă kon se hăn nti. Đah ăp kon se nti geh nău rêh jêr jŏt n’gâng kan mbra joi ăp trong ntop kơl. Nău mĭn bah n’gâng kan ntĭm nti n’gor lah mô an kon se nti ntlơi nti tă bah nău rêh jêr jŏt.

Aƀaơ ăp trong ntop kơl an kon se nti nkual jru, nkual ngai, nkual rnoi mpôl đê̆ tĭng Nghị định mbrô 116 năm 2016 n’hanh Nghị định 81 năm 2021 bah Chính phủ dôl mpơl geh nău tam uĕh ta n’gor Dak Nông. Tâm ăp năm nti 2022-2023 n’hanh 2023-2024 hŏ geh rlău 14.000 kon se nti tâm n’gor dơi ntop kơl prăk gŭ, prăk sa, kơl prăk nti đah lĕ rngôch rnoh prăk bơi 21 rmen prăk. Wa Phan Thanh Hải an gĭt.

“Tâm ăp năm aơ, ăp trong kơl bah Trung ương n’hanh n’gor êng uănh khlay tât oh kon, kon se nti ta nkual jru, nkual ngai, nkual rnoi mpôl đê̆. Lơn lah geh 2 Nghị định dŭt njrăng uănh lăp tâm ngăn ngăn lah Nghị định 116 n’hanh Nghị định 81 bah Chính phủ. Nău ntop kơl dja lăp tâm ngăn ngăn, ntop kơl, rgŏ jă ăp mon nkual jru, nkual ngai, lơn lah oh kon nuĭh rnoi mpôl đê̆ geh ndơ ma hăn nti uĕh lơn, hŭch bah ir kon se ntlơi nti tâm  ăp năm aơ.”

Ăp nar dja, kon se nti ta nkual jru, nkual ngai, nkual rnoi mpôl đê̆ bah Dak Nông lah êng, Tây Nguyên lah nsum dôl nđơr plơ̆ tay nhih nti. Ndrel đah nău nsrôih bah n’gâng kan ntĭm nti, bah ăp nai ntĭm grêt dêh ƀon  lan, ăp trong kơl bah Đảng, Ngih dak dôl nsrôih ntop kơl ăp kon se nti klaih rlău jêr jŏt tât nău rêh chrat ang let năp tay.