Rnăk wa Sầm Văn Khiàng lah 1 tâm 2 rnăk ach o ngăn bah ƀon nkual n’har bri Nặm Đông, xã Cần Nông n’gor Hà Quảng geh Đồn Biên phòng Cần Yên kơl an 4 mlâm sur gay ma rong. Cán bộ tahen kŏ vay hăn ntĭm mbơh nau mât chăm, ntơm bah rong, nkra ndrung, chuh dak si ân sur. Rơh tết năm mhe mhe rlau, rnăk wa hŏ geh prăk tăch sur gay ma rvăt ndơ ndrel sa tết tŏng lơn. Wa Khiàng ngơi:

            ‘Rnăk hên bah năp nơh gŭ tâm ƀon êng, mhe gŭ ta aơ geh 2 năm ri ma nau rêh hôm jêr ngăn. Geh tahen biên phòng kơl an sur ntil, kơl an geh prăk ân kon hăn nti, rvăt ndơ dŏng, rvăt dak toh ndrôk ndrel phe sông. Gâp lah ueh tahen biên phòng âk ngăn”.

            Đồn Biên phòng Cần Yên geh jao mât 2 xã Cần Nông ndrel Cần Yên, ăp xã jêr bah nkuăl Hà Quảng, n’gor Cao Bằng, đah rnăk ach o rlau 50%. Gay ƀư săk tam nau kan Ndâk njêng ƀon lan mhe, Đồn tâm rgop nsum ma n’gâng kan ăp xã uănh ăp nau kan, ăp ƀon gay ndâk kan ân tâm di. Êng tơm tăm, kon ntil, cán bộ tahen Đồn Biên phòng Cần Yên hôm kơl kônh wa ma rhiăng nar kan gay nkra trong, nkra ngih, rep ntŭk ntu, nkra ndrung rong ndrel ntĭm kônh wa ntrơn luh ndrung nâm ndjrôm ngih. Nau ntrŭnh Đảng bộ Đồn leo nkô̆ nau ăp năm kơl an 2 rnăk rklaih ach o nâp nâl.

            Trung tá Nông Văn Ích, Chính trị viên Đồn Biên phòng Cần Yên mbơh: Yor 2 xã geh 21 ƀon, geh ƀon hăn lôch ma mông mơ tât xã ri ma nau ntuh kơl mô tâm ban. Rmôt tahen kơl mbơh nchră nau ma n’gâng kan geh ƀư nau kan mhe, săk tam:

            ‘Năm 2022, Đồn mbơh nchră nau ân gưl uỷ, n’gâng kan xã Cần Yên ƀư rlong nau kan ƀon lan mhe tâm 3 ƀon, yơn nơm mô tŏng rmôt kan, ndơ dŏng gay ma ƀư ntoch jong, jêh nê mơ rgum, rhuăt luh nau tă blau kan, ntrong kan gay ma ƀư ndrel ăp ƀon êng bah 2 xã ndrel kơl tĭng ƀư”.

            Cao Bằng geh trong jong rlau 330 km, bah 40 xã, nkuăl têh. Ăp xã ach o da dê, ƀon lan tâm nkah, trong hăn jêr. Tâm ăp nkuăl aơ, tahen Biên phòng lah rmôt tơm râng mbơh ƀư nau kan ƀon lan mhe mpeh ndâk ntrong kan chính trị, gĭt pháp luật ndrel neh dak ndrel rnă njrăng. Đại uý Trần Tuấn Ngọc, Cán bộ tahen Biên phòng Quang Long, nkuăl Hạ Lang, ngơi:

            ‘Tâm nkuăl n’har bri hôm âk rnăk jêr ngăn yor ntŭk ntu ngai, nkah, nau gĭt rbăng bah kônh wa ê tâm ban ri ma nkoch trêng gay hun hao văng sa rêh jêng kŏ mâp ak nau jêr. Ntơm bah nau ntĭm bah N’gâng kan tahen Biên phòng tât nau pă nau kan ân đảng viên ƀư kơl an rnăk vâl, Đồn hŏ đă cán bộ tât ăp ƀon kơl an ƀon lan. Bah nau kơl bah phung hên, kônh wa geh n’hao prêh ngăn, bu blau dăp nau kan ueh lơn, gĭt ngluh mpa rong luh bah ndjrôm ngih, ƀư ueh nau kan tăm gay ma tăch”.

            Đah ăp nkuăl yôk, nkuăl prêh nau rêh kônh wa hôm jêr ri nau rgum gay ndâk njêng ƀon lan mhe jêr ngăn. Ndri ma, ăp ntŭk kan kŏ geh nau kơl an êng, blau, dŏng đah ăp ntŭk ân tâm di. Thượng tá Sái Văn Hùng, Chính trị viên Đồn Biên phòng Lũng Nặm, N’gâng kan rđau tahen Biên phòng Cao Bằng mbơh, nau ndâk njêng ƀon lan mhe lah nau khlay, rgop nau mât neh dak ndrel đăp mpăn nkuăl n’har bri:

          “Aơ lah ăp nkô̆ nau geh Đảng uỷ N’gâng kan tahen Biên phòng n’gor ndrel ăp rmôt năl lah nau kan tơm. Kơl an ƀon lan kŏ kơt lah kơl an rmôt tahen biên phòng tă bah tâm dâng gay ƀon lan geh nau rêh ueh lơn, tâm dăch dơh ma nkuăl n’har bri ma tahen Biên phòng ƀư ueh nau kan mât nau ƀư tơm bah neh dak”.

            Tâm rnoh 17 xã geh tŏng nau dơi ƀon lan mhe ta Cao Bằng geh âk xã n’har bri kơt Đức Long, nkuăl Thạch An, Sóc Hà, Trường Hà, nkuăl Hà Quảng, Đàm Thuỷ, Ngọc Côn, nkuăl Trùng Khánh, Thị Hoa nkuăl Hạ Lang...Aơ lah nau tă geh dơi kơp dơn ân saơ nau nsôih bah n’gâng kan, ƀon lan ndrel tâm nê geh nau nsum n’hâm bah rmôt tahen biên phòng, kŏ lah nau nsôih gay ăp thôn, ƀon, xã n’har bri lŏ nsôih ƀư jêh nkô̆ nau ndâk njêng ƀon lan mhe, rgop nau leo tât nau rêh ueh lăng hơm tăm ân ƀon lan nkuăl Đông Bắc./.