Wa Trần Văn Hoà, tơm duk BTh 95032TS tâm xã Phước Thể, nkuăl Tuy Phong, n’gor Bình Thuận tă geh tih nau joi nhŭp ka yor mô geh săm ƀŭt kơp dơn, mô nchih, mô mbơh nau sŏk joi, mô mbơh nau luh lăp ndrâm dak. Rnôk aơ, ăp nau tih nê mô hôm geh ôh. Nê lah rnơm bah ăp tahen Biên phòng hŏ nkoch mbơh mpeh pháp luật, pă trong hăn tâm dak lêng ân wa Hoà ndrel ƀon lan. Nkre lah, tahen Biên phòng hôm ntĭm kônh wa ƀư nau nhŭp joi tâm di, mô khuch tât nkuăl dak lêng dak ba dih ndrel kơl rklaih nau khuch tât tâm dak lêng:

 ‘Rnơm ƀư ueh nau nkoch trêng bah tahen Biên phòng tă bah nê gâp dơi gĭt, jêh ri nkoch mbơh ân ăp nŭih, ăp băl ƀư nau kan nsum tâm duk joi ka mô geh tih. Lah nŭih ƀon lan nơm ŭch ri tahen biên phòng mra kơl ndrel ntĭm ro. Kơt lah, rnôk geh nau tât ndal klơ dak lêng, mô lah ăp ntil ndơ nơm sŏk joi nhŭp ka tih dôih ri kŏ mbơh ân tahen biên phòng, jêh ri đă leo duk mpan tât kơl, der nau geh tâm rkeh tâm dak lêng”.

Tât rnôk aơ, âk ngăn ƀon lan joi nhŭp ka bah Bình Thuận hŏ gĭt nau blau bah nau nchih, nkah mbơh nau geh tui ka, kơt tĭng nau kan ntrŭp ndơ met uănh trong hăn (VMS).100% tơm duk joi ka kí ton mô tih nkual dak lêng dak ba dih. Wa Huỳnh Hương, tơm duk Bth 84025TS joi ka tâm nkuăl teh Liên Hương, nkuăl Tuy Phong, n’gor Bình Thuận, mbơh tay:

  ‘Đồn biên phòng mpông đah Liên Hương vay mâp kônh wa ƀon lan gay ma mbơh ăp nau geh tâm dak lêng. Bri moh nar mô lah nau nhŭp joi ka moh geh nau mâp ri kơt lah mâp ăp duk tă bah dak ba dih ri kŏ mbơh ân đồn biên phòng gĭt nau. Lah nsum oh nô Tahen Biên phòng dŭt n’hâm kơl an tât kônh wa ngăn”.

Mô knŭng nkoch mbơh pháp luật, bonh đă kônh wa nsôih mât ueh dak lêng, gôl dak, rmôt tahen biên phòng gŭ kan tâm nkuăl dak lêng Bình Thuận hôm tâm rgop ma gưl uỷ, n’gâng kan bah nkual kơl an ân nau rêh bah ƀon lan tâm dak lêng. Ăp năm, tahen Biên phòng ƀư ăp au kan kơt: Kơl an nŭih ach o, yăng phe kơl an, kơl an kon se hăn nti...kơl năn ân ƀon lan mâp nau jêr.

Êng năm 2022, bôk nau kan kơl an kon se hăn nti ân 42 kon se đah rnoh prăk 189 rkeh, bôk nau kan kon rong biên phòng hŏ kơl an ân 42 kon se đah rnoh prăk rlau 100 rkeh. Tahen Biên phòng hôm ndâk ăp nkuăl êp dak lêng bah Bình thuận 3 ngih gŭ, pă 9 tấn phe ân ăp rnakư vâl mâp nau jêr.... Wa Huỳnh Đình Dũng, Groi Kraunh UBND xã Phước Thể, nkuăl Tuy Phong, n’gor Bình Thuận, mbơh:

            ‘Tâm xã geh trạm Biên phòng gŭ kan ri nau tâm rgop đah n’gâng kan, ăp ntŭk kan rmôt kan tâm nkual ndrel ƀon lan, ngăn lah ƀon lan joi nhŭp ka rjăp ngăn. Nau tâm rgop kơl an đah Biên phòng ueh ngăn”.

Đại tá Đinh Văn Sáu, bí thư Đảng uỷ, Chính uỷ rđau tahen Biên phòng n’gor Bình Thuận mbơh, nkoch trêng nau ntrŭnh, ntrong kan, pháp luật ndrel nau rêh ân ƀon lan lah nsum, tâm nê geh ƀon lan joi ka lah nau kan bah tahen Biên phòng. Nau kan aơ mro geh ƀư tât ăp cán bộ, tahen gay năm ba kơi ƀư ân ueh lơn, săk tam lơn năm e:

‘Mhâm ƀư rgum n’hâm rgum bah lam ntrong kan chính trị ndrel ăp kơn nŭưih ƀon lan gay ndâk nau dơi biên phòng lam ƀon lan nâp nâl, tă bah nê ƀư ueh nau kan mât nau ƀư tơm, đăp mpăn nhe dak. Êp nê, hên rgum rđau ƀư ueh nau kan ndâk njêng đảng, ƀư ueh nau kan, nau dơi bah cán bộ đảng viên. Yor aơ lah rmôt kan tơm gay rđau rmôt kan ƀư ueh nau kan tâm rơh tât”.

Bình Thuận geh dak lêng jong 192km, đah 5.700 duk joi ka geh jong ntơm 6m hao gŏ lơ, tâm nê geh 1.946 mlâm duk jong ntơm 15m hao gŏ lơ ƀư nau kan joi nhŭp ka ngai kơh. Ntŭk kan sŏk joi tui ka hŏ pă kan pah ân rlau 46 rbăn nŭih, tâm nê geh nklăp 15 rbăn nŭih hăn joi ka ngai kơh. Nau joi ka bol ma mâp âk nau jêr, yơn đah nau nsôih, kơl an bah Chính phủ, n’gâng kan bah nkuăl ndrel rmôt kan tahen biên phòng, nŭih joi nhŭp tui ka Bình Thuận geh tay nau nsôih gay hăn joi nhŭp ka, mât dak lêng, ƀư rjăp nau ƀư tơm bah nkuăl gôl dak lêng bah neh dak./.