VOV4.M'nông: Ôi 14/10 ta Nhih pah kan Trung ương Đảng, Tổng Bí thư Nguyễn Phú Trọng ƀư tơm n'hanh geh nău lah rđău đă khlay ta rơh tâm nchră an ƀư Nghị quyết bah Bộ Chính trị mpeh hun hao nkual Tây Nguyên tât năm 2030 uănh ngai tât năm 2045. Nkual Tây Nguyên geh 5 n'gor lah: Kon Tum, Gia Lai, Dak Lak, Dak Nông n'hanh Lâm Đồng dơi gĭt tât kơt du nkual neh jêng nđơn  nkoch, lah ntŭk ndrel gŭ rêh bah bơi 6 rkeh nuĭh mpeh lĕ rngôch 53/53 rnoi nuĭh oh nô lam dak.

Lah ta rnôk rđău đă tâm nchră, Tổng Bí thư Nguyễn Phú Trọng lah rjăp: Nkual Tây Nguyên lah ntŭk têh khlay mha êng mpeh hun hao wăng sa, rêh jêng kon nuĭh, ntŭk gŭ rêh bri dak, njrăng n'gang neh dak- rnă njrăng n'hanh tâm boh dak bah dih bah lam dak. Hun hao Tây Nguyên ngăch, nâp dăng lah trong nchrăp bah Đảng, Ngih dak n'hanh lah nău dơn kan khlay bah lam dak. Rdâk njêng n'hanh hun hao nkual Tây Nguyên ân nkre tâm lăp nsum đah hun hao wăng sa, văn hoá rêh jêng kon nuĭh, mât njrăng ndơ mpêt khlay, ntŭk gŭ  rêh, krêp dêh lhăt đah đăp mpăn njrăng n'gang neh dak -rnă njrăng n'hanh n'hao dăng pah kan tâm boh dak bah dih. Sŏk nău hun hao wăng sa, văn hoá, rêh jêng ƀư jâng nsing an nău mât nâp njrăng n'gang neh dak, rnă njrăng, đăp mpăn chính trị - rêh jêng kon nuĭh.

VOV.VN

Nuĭh rblang: Điểu Thân