Ôi lơ 23/8, ta nkual ƀon têh Kon Tum, Uỷ ban Mặt trận Tổ quốc Việt Nam n’gor Kon Tum ƀư tâm nchră nau tă blau tâm nau kan Mặt trận đah n’gor Kon Tum ndrel Uỷ ban Mặt trận Lào ndâk neh dak n’gor Attapư ndrel Sekong. N’gor Kon Tum ndrel 2 n’gor Attapư ndrel Sekong dak Lào geh nsum trong n’har jong 154 km. Rlau 3 năm, 3 n’gor ƀư nau nkah tât nau tâm boh nau kan mặt trận geh âk nau ueh. Ngăn lah nau nkoch trêng. N’hao nau gĭt rbăng bah ƀon lan 3 n’gor tâm nau njrăng srê Covid-19. Năm tâm boh kan nsum Việt Nam-Lào 2022; ndrel nê lah nau ƀư săk tam nau kan tâm rgop joi, rgum geh 129 nting tahen khĭt, nŭih hăn kơl an tă bah Việt Nam khĭt tâm dak Lào kăl e gay ma leo tâp tâm dak nơm, ndâk ntrong n’har đăp mpăn, tâm boh ndrel hun hao...

Tâm rơh rƀŭn, Uỷ ban MTTQ Việt Nam n’gor Kon Tum ndrel uỷ ban Mặt trận Lào ndâk neh dak 2 n’gor Attapư ndrel Sekong hŏ tâm nchră nau tă blau kan mặt trận, tâm ban nau lŏ mât ndrel hun hao tâm boh kan nsum, rjăp, tâm rnơm. Mặt trận tổ quốc 3 n’gor lŏ tâm rgop ngăn, tâm nchră nau blau kan tâm nau kan, n’hao nau tâm boh tâm nau kan văng sa, tăch rgâl, khoa học-kỹ thuật, bonh đă ƀon lan bar dak ƀư nau tâm rnglăp rnoi mpôl tâm nau ndâk ndrel mât nâp neh dak bah ăp dak./.