VOV4.M'nông:  Tâm rlong nkhôm rnê báo chí gưl neh dak 2021, Hội đồng chung khảo hŏ sơch geh 152 nău nchih lăp tâm rlong n'glĕ dŭt n'hanh mbra nkhôm an 10 giải A, 22 giải B, 48 giải C, 35 giải Khuyến khích an ăp nău nchih dŭt uĕh blău. Tĭng uănh năl bah nuĭh ntơh măt hội đồng chấm Giải báo chí quốc gia 2021, tâm rlong rơh dja geh âk nău nchih geh nău ban saơ, rlăch ndăng tay jru, mpơl lĕ nuih n'hâm ma nău kan, blău ƀư mhe, joi gĭt, geh suan wăch rgum, mpơl dơi nău way kan, nsĭt n'hâm n'hôr bah báo chí mhe aƀaơ. Du đêt nău nchih ntoh lư geh nău rong an âk mông nar ƀư, lơn lah ăp đề tài geh tât nuh srê COVID-19. Hŏ geh âk nău nchih ngăn ngăn, rlăy kah nuih n'hâm nuĭh, mpơl dơi nău nchŏl săk bah phóng viên, geh suan ring tam âk tâm nău  rêh.

Tĭng uănh năl nsum nău nchih râng tâm rlong hŏ tŏng di ăp rnoh uănh năl sơch bah Hội đồng nkhôm rnê, nkoch lam lĕ rngôch n'hanh jru hvi tât nău rêh chính trị, wăng sa, văn hóa, rêh jêng kon nuĭh, rnă njrăng, njrăng n'gang neh dak, tâm dâl nău bah neh dak tâm năm 2021. Ăp nău nchih ntoh lư geh rong an âk mông nar ƀư geh tât nuh srê Covid-19 rnoh geh âk ta lĕ rngôch ăp ntil báo chí. Âk nău nchih geh ndơ nkhôm rnê têh mpơl dơi nău nchŏl săk bah nhà báo đah nău ŭch nsĭt tay ăp rnoh khlay ngăn ngăn n'hanh chŏnh tât play nuih âk nuĭh.

Tâm rlong rơh dja, Radio nău ngơi Việt Nam nkah têl đah âk nău nchih ntoh lư. Tâm nê geh 2 giải A, 2 giải B n'hanh 1 giải C. Bar giải A mpeh nău nchih "Ăp nar mô chuêl" bah rmôt nuĭh tơm nchih Nguyễn Vũ Duy, Bùi Thị Thu Trang, Nguyễn Thị Minh Hạnh (Ban Thời Sự-VOV1) n'hanh du rut 4 nău nchih “Vỉa hè đang thực sự nuôi ai”? bah rmôt tơm nchih Trang Công Tiến, Phạm Trung Tuyến, Nguyễn Hữu Thịnh, Chu Trung Đức, Nguyễn Hải Bằng (Kênh VOV Giao thông). Bar nău nchih geh Giải B lah “Cuộc chiến của những điều chưa từng” bah rmôt nuĭh tơm nchih Đinh Thị Thu Trang, Kiều Thanh Phượng, Nguyễn Thị Ánh Tuyết, Lê Phương Thảo, Phạm Thị Thu Trang (Ban Văn hoá Xã hội –VOV2) n'hanh “Cờ bạc núp bóng đầu tư tài chính mùa dịch” bah rmôt nuĭh tơm nchih Nguyễn Sỹ Đoan, Nguyễn Phú Huân, Nguyễn Văn Tùng, Nguyễn Duy Bùi (Đài truyền hình KTS VTC) .

Tâm nê, nău nchih geh nkhôm giải A “Những ngày không quên” bah rmôt tơm nuĭh nchih Nguyễn Vũ Duy, Bùi Thị Thu Trang, Nguyễn Thị Minh Hạnh – Liên chi hội nhà báo Đài Tiếng nói Việt Nam hŏ chŏnh tât ăp nkô̆ nău têh dŭt dăng bah rơh rdâng lơh nuh srê Covid-19 yơn dơi mpơl ta du njônh êng, blău ƀư mhe. Nê lah nău nchih mpơl kloh nău dăng bah pơk nău ngơi, dŏng nău nteh ngơi ta ntŭk dôl kan, âm nhạc, lơn lah nău nchŏl săk hăn kan mô kă rnam bah phóng viên, rnôk hăn tât ăp nkual tơm nuh srê kơt Bạch Mai, nkual ƀon têh Hồ Chí Minh…Ntơh măt rmôt nuĭh tơm nchih, nhà báo Bùi Thị Thu Trang (VOV1) an gĭt: Gay geh nău lư uĕh, di ngăn ngăn, lŏng nuih n'hâm nuĭh djăt tâm rnôk nuh srê krit nji, nău tât khuch djơh, lĕ rngôch nuĭh dơi nchih nkoch, nar kan khlay, nău nkoch  bah bơi bar năm lam dak mbrôn suan rdâng lơh đah nuh srê Covid - 19 (2020-2021), ekip hŏ tĭng ƀư ăp nău nchih ntoh lư ndjôt săk ntơ lư phóng viên Radio nău ngơi gưl neh dak, ma nău nchih ngơi, nău nteh n'gôr, nđơn nkoch trêng tay di, uĕh n'hanh geh nău mhe, đah ăp nău mbơh gĭt lor nkah rơh kơn bah kơi tay- rnôk dơi djăt tay nău nchih dja.

“Nău dŭt nkoch, lah tâm nău rêh ngăn, nău kan hăn mâp ôp na nê̆, ri đah nău nchih dja, ekip 3 nuĭh - du hê lah F0, ta nklang tơm nuh srê krit nji ta nkual ƀon têh Hồ Chí Minh, du hê lah nhà báo Nguyễn Thị Minh Hạnh, bar hê hôm ƀa ƀă lah nhà báo Nguyễn Vũ Duy - Kruanh Ban Thời sự, VOV1 n'hanh gâp lah Bùi Thị Thu Trang, geh tât 4 tơ̆ an gŭ rgum êng tĭng di nău way, jêng ăp nău kan tâm ôp dŏng lĕ tâm jâng nsing mbrô. Jêr jŏt- ntul rlong lah nău nkah - dŭt nkah jŏ bah ekip "Những ngày không quên".

Năm 2021, nuh srê Covid-19 plơ̆ ntoh tay ƀư mpet jâk mpeh ăp nar hăn pah kan nchih nkoch nău lư, rmoh rman yơn nsĭt tay an ăp nhà báo trong dơh soih tâm nău nchŏl săk tâm ăp trong kan jêr jŏt bah nău rêh, nkra bah jêr jŏt, klach rvê gay hăn tât ntŭk tơm nuh srê, ndrel hăn đah rmôt cán bộ y, bác sĩ, ăp mpôl kan ta bôk trong rlong sial rdâng lơh nuh srê. Tĭng wa Phạm Mạnh Hùng, Groi Tổng Giám đốc, Kruanh rnâng kan Liên chi Hội Nhà báo Đài Tiếng nói Việt Nam, ăp nău nchih bah ăp nhà báo Đài Tiếng nói Việt Nam geh nkhôm rnê Báo chí Quốc gia năm 2021 rgum tâm ăp nkô̆ nău dŭt khlay. Nê lah rơh rdâng lơh nuh srê Covid-19, an ƀư Nghị quyết Đại hội Đảng gay mât njrăng jâng nsing nău mĭn bah Đảng…Ăp nău jêr jŏt tă bah nuh srê lơh hŏ ƀư an rmôt phóng viên bah Radio mpơl dơi nău ngăch ngăr tâm pah kan, dŏng nău gĭt blău báo chí mhe ta jâng nsing âk ndơ dŏng, njêng luh âk ndơ geh nchih báo chí rêh dăng, nkoch nău kan ngăn ngăn tâm ban kơt ăp nău rngot klâng, roh yot bah nuĭh ƀon lan.

“Âk nău nchih đah tŏng ăp ntil trong nkoch trêng dơi lăp tâm rlong n'glĕ dŭt an saơ nău lam  lĕ rngôch, âk ntil ndơ bah rmôt ƀư báo ma âk ndơ dŏng bah VOV ta lĕ rngôch ăp ntil báo chí. Aơ lah nău lah rjăp trong nchrăp, trong rƀŏng rdâk njêng du nhih pah kan báo chí âk ntil ndơ dŏng gưl neh dak - nhih pah kan báo chí tơm bah Ngih dak lah di lĕ rngôch. Âk năm rlău aơ he hŏ ntuh kơl n'hanh rnôk dja nsĭt geh âk nău dơi dŭt kloh. Nău dơi bah rơh tâm rlong báo chí rơh dja dŭt n'hao êng săk bah rmôt ƀư báo bah VOV”

 Nchŏl săk, mbra geh măt ta ăp ntŭk dŭt jêr jŏt, mô dơn nê dăch kêng brŏng tŭp tĭng drô phan, nău nchih “N'har phan” bah rmôt nuĭh tơm nchih Tạ Quỳnh Tư, Kiều Viết Phong, Liên chi hội nhà báo Đài Truyền hình Việt Nam, geh giải A ntil phim tài liệu hŏ hor luh dŭt âk dak măt bah nuĭh uănh ăp rup gui dŭt ngăn ngăn. Nuĭh uănh mbra saơ dŭt kloh nău n'groh lĕ săk nơm bah ăp nai dak si tâm rơh rdâng lơh nuh srê, tâm nê geh lĕ ma nău n'groh lĕ n'hâm suan bah phóng viên, nhà báo hăn ƀư bộ phim dja. Nhà báo Tạ Quỳnh Tư, Đài Truyền hình Việt Nam, ntơh măt an rmôt tơm ƀư nkoch:

“Ndơ nkhôm rnê ƀư an gâp nkah tât ăp nuĭh ntưp Covid 19, lơn lah ăp y bác sĩ tâm rơh rdâng lơh rgŭt n'gĭng dja, khân păng hŏ an gâp ăp nău tă ơm gĭt nti mpeh nău rêh, trong uănh khlay nău rêh n'hanh rêh an nsum mpôl. Ntơm bah rnôk gâp tĭng n'gâng kan ƀư báo n'hanh ntơm ƀư phim tài liệu ri gâp way mĭn lah, nău kan di lah ntrŭt ntrôl nău rhơn răm, nău kan tih lah ntrôl ntrôl ăp nău mô lap jêng gâp mô rnam nchŏl săk tâm ăp đề tài ma gâp mĭn lah mbra rlay kah nuĭh n'hâm uĕh lŏng ơm geh tâm săk ăp kon nuĭh Việt Nam he”.

Tĭng nhà báo Nguyễn Đức Lợi, Groi Kruanh Hội Nhà báo Việt Nam, tâm 2 năm 2020-2021, ta năp nău tât krit nji bah nuh srê Covid - 19, âk phóng viên, nhà báo bah ăp nhih pah kan thông tấn, báo chí hŏ nchŏl săk tâm ăp ntŭk klach rvê, mô  dơn nê tât dăch kêng n'har đah drô phan. Tă bah nău nănh, nănh mĭn, nănh ƀư bah rmôt nuĭh ƀư báo hŏ n'gluh dơi âk nău tih djơh ndâp ngo luh bah dih sol ang, dơi nhih pah kan dơi kan lăp rmal. Nê lah nuih n'hâm têh uĕh bah nuĭh ƀư báo ân dơi mât tay dăng:

“Ăp đề tài geh nkô̆ nău klach rvê, kơp lĕ ma tâm njrăng, n'gang nuh srê ri he ân nchŏl săk kơt nê̆. Yơn kơp lĕ ma tâm rơh rlăch ndăng sa khâm, rlăch ndăng tay nău tih djơh ri he mbra dơi lah geh dŭt âk nău klach rvê mƀui tĭng đŏng, geh nău ntêt nkri, mô dơn nê geh nkri lơh tât săk jăn nuĭh nhà báo nơm tâm ban kơt rnăk wâl bah khân păng nơm đŏng. Mpôl hên mĭn lah ăp nhà báo ân năp nău gĭt blău lor, bôk năp lah năp nău gĭt blău an săk nơm mpeh pháp luật. Yơn lah nhà báo ma mô nchŏl săk, mô han săk ma lăp tât dŭt bah nkô̆ nău, lơn lah tâm njrăng, n'gang sa khâm ri he mô dơi geh du nău nchih uĕh  di n'hanh geh ăp nău nchih tam lŏng nuih n'hâm"

Gay dơi nchŏl săk, ăp nhà báo way geh du nuih n'hâm gân djăng đah nău kan, play nuih nsĭch đă khân păng tĭng tât dŭt nkô̆ nău, rgop ƀư an nău rêh uĕh lăng lơn kơt nuih n'hâm bah ăp nuĭh ƀư báo cách mạng- nê lah “Sŏk nău uĕh nkêh nău djơh"./.

 Nuĭh rblang: Điểu Thân