VOV4.M’nông:   Nklăp 3 khay tay, ăp kon hŏk jrô 12 mbra ntơm tâm rơh tâm rlong tốt nghiệp trung học phổ thông năm 2022. Aơ lah rơh tâm rlong khlay ngăn bah âk kon hŏk yor jêh bah rơh tâm rlong aơ dơi âk ngih sam ƀŭt đại ộc sŏk dŏng săch nti. Aƀaơ, ăp ngih sam ƀŭt dôl rgum ƀư tiăr nti tay, ntop kơl nău lĕ nti an kon hŏk gay ăp oh nchrăp lăp rơh tâm rlong tốt nghiệp, kơt râng ăp rơh tâm rlong êng bah ăp ngih sam ƀŭt đại học ƀư.

Ăp nar aơ, kơt âk kon hŏk jrô 12 êng, oh Nguyễn Đình Dương nti Ngih sam ƀŭt THPT Phan Huy Chú, Hà Nội nsrôih mro jêh ăp nău nti tâm mông nti ta ngih sam ƀŭt du trong ngăch ngăn, gay an mông nar tiăr nti tay, nchrăp an rơh tâm rlong tốt nghiệp THPT mbra ƀư tâm khay 7. Jêh bah rơh tâm rlong tốt nghiệp dơi dŏng gay săch lăp âk ngih sam ƀŭt đại học jêng Nguyễn Đình Dương nsrôih tiăr nti tay rĭng ăp môn gay dơi geh săk rnglăy tâm rlong uĕh ngăn. Oh nti êng n’hanh tiăr nti tay ăp đề tâm rlong tham khảo bah ăp rơh tâm rlong êng yor du đêt ngih sam ƀŭt đại học ƀư gay n’hao dơi lăp ăp ngih sam ƀŭt đại học:

“Oh mĭn joi dŭt âk ăp trong săch nti, đah âk trong ƀư tâm rlong êng êng, ăp môn êng êng. Yơn đah oh, tâm nău jêr ri geh đŏng nău dơh lah mpôl oh dơi n’hao tâm rlong bah ngih sam ƀŭt).

Đah ăp kon hŏk tâm rlong năm aơ, nău nti, tiăr nti tay an rơh tâm rlong tốt nghiệp trung học phổ thông bah ăp oh lơ jêr jŏt, ŏk r’ah rnôk 3 năm nti gưl trung học phổ thông an rlet rlău nar êng mô hŏ tă geh, rnôk nti na nê̆, rnôk nti trực tuyến yor chôt srê Covid-19. Yor nê, gay dơi uănh lah di na nê̆ nău nti bah kon hŏk, bah nĕ geh trong tiăr nti tay tâm di đah tĭng oh, âk ngih sam ƀŭt lĕ an ƀư ăp rơh uănh nđôi uĕh bălu n’ăp ma na nê̆ n’hanh trực tuyến. Du đêt ngih sam ƀŭt đại học hôm ƀư rơh tâm rlong êng gay săch nti jêng ăp ngih sam ƀŭt ƀư tiăr nti tay nău blău ơm tĭng trong rƀŏng bah rơh tâm rlong tốt nghiệp trung học phổ thông an kon hŏk, nkre an ntĭm ăp chuyên đề n’hao gay ntop kơl kon hŏk râng ăp rơh tâm rlong aơ. Wa Huỳnh Thị Hòa Bình, Hiệu trưởng Ngih sam ƀŭt THPT Lạng Giang mrô 1, n’gor Bắc Giang mbơh:

“Năm aơ geh du đêt ngih sam ƀŭt đại học n’gluh an rơh tâm rlong uănh lah nău blău, jêng rlău ma nău tiăr nti tay tâm rlong tĭng ăp môn tâm rgop ăp oh dăn râng, ăp nai ƀọ môn geh ôp uănh ăp ntil nău ôp, uănh lah gĭt blău ơm nău dơi bah du đêt ngih sam ƀŭt, gay ndơ̆ nkô̆ tiărr nti tay an kon hŏk. Ăp rƀŏng đŏng trong đah kon hŏk gay kon hŏk dơi râng ăp rơh tâm rlong, dơi săch uĕh lơn an nău ăp oh jêh tốt nghiệp tât đah ăp ngih sam ƀŭt đại học).

Ta âk ntŭk an nti trực tuyến jŏ jong yor srê Covid-19, ăp ngih sam ƀŭt an kơp uănh tay trong nchrăp nkô̆ nău bôk nău nti ta ngih sam ƀŭt, mông nar tiăr nti tay geh nău rgâl bôk nău tiăr nti tay an tĭng rmôt nuĭh kon hŏk tâm di đah nu nău ngăn. Ndrel đah trong ƀư uănh nđôi, tĭng nuĭh kon hŏk gay geh trong nchrăp tiăr nti tay na nê̆ an tĭng rmôt kon hŏk, du đêt ntŭk mbơh ƀư ntop kơl, tiăr nti tay nai ntĭm jrô 12 gay tiăr nti an kon hok dơi râng âk rơh tâm rlong. Wa Bùi Thị Kim Tuyến, Kruanh N’gâng kan ntĭm nti Hòa Bình an gĭt:

“Ƀư tiăr nti kơt ntop tiăr nti tay an nai tiăr nti tâm rlong rmôt jrô 12, kơt ƀư ăp mpôl nai n’gâng tơm ntop kơl đah nău way kan ntop kơl an nai ta nkual jru ngai. Geh âk nău tâm pleh n’hanh đă nai wă an manh bah nkual dơh tât ntop kơl an ăp nai ta nkual jru ngai gay dơi geh âk săk rnglăy uĕh ngăn”.

Hôm nklăp 3 khay tay kon hŏk jrô 12 mbra lăp rơh tâm rlong tốt nghiệp trung học phổ thông. Aƀaơ, N’gâng kan ntĭm nti lĕ mbơh đề tâm rlong tham khảo rơh tâm rlong tốt nghiệp trung học phổ thông năm 2022. Nău groi nđôi rjăp bah ăp nai, bah ăp ngih sam ƀŭt geh nkô̆ nău dŭt têh đah ăp oh tâm rơh tâm rlong khlay aơ./.

                              Nuĭh rblang: Y Sưng Phê Ja