Ta Tây Nguyên, ndrel ma ăp nau mpoh kthup nkah tât ăp Kđăch Hùng, ăp n’gor ƀư âk nau kan gay ntoh nuih n’hâm ryơk đah neh me, tĭng nuih n’hâm “Ngêt dak nkah gĭt tu” bah rnoi mpôl Việt Nam.

          Ta n’gor Kon Tum n’gâng kan ndrel nŭih ƀon lan tâm aka nkualư bah lam n’gor hŏ ƀư rjăp ăp nar Lễ Giỗ tổ Hùng Vương. Geh tâm 2 nar ntơm 28-29/4, lah lơ 9-10/3 âm lịch, Lễ Giỗ tổ Hùng Cương geh n’gâng kan ndrel nŭih ƀon lan tâm nkuăl Đăk Hà, n’gor Kon Tum ƀư ta Chùa Tháp Kỳ Quang, Thôn 3, xã Đăk Mar. Ndrel ma nau ƀư Lễ geh ƀư ueh đah nau rjăp ngănlah vơt rup ndah, mpoh kthup, leo nkah, play gay ma nkah tât ăp Kđăch Hùng, nau ƀư Hội kŏ geh ƀư đah âk nau kan, kơt: tâm rlong nklâm bánh chưng, tâm têk rse, hao n’gâng mbir, tâm n’ur njroh mprơ...nkoch mbơh ăp nau ŭch rŏng tâm Lễ giổ tổ n’gâng kan ndrel ăp rmôt kan bah nkuăl Đăk Hà, n’gor Kon Tum kŏ pă prăk ân kon se geh nau rêh jêr jŏt geh nau nsôih tâm nau ntĭm nti ndrel pă nklâm ndơ ân rnăk ach o. Yuh Y Kha, tâm ƀon Kon Klốc, Xã Đăk Mar âk năm râng Lễ Giỗ tổ Hùng Vương tâm Tháp Kỳ Quang, mbơh:

          ‘Ngih chùa ndrel ƀon Kon Klốc mro geh nau tâm rgop nsum ndrel tâm kơl ndrăng nơm. Ta aơ, ăp nŭih tĭng chroh Công giáo ndrel Phật giáo mro tâm rnglăp, tâm kơl ndrăng nơm. Tâm rnôk Giỗ tổ Hùng Vương phung hên rhơn nsum ma ngih chùa, kônh wa phung hên ri râng nau tur chĭng, njroh mprơ gay ma vơt năch lăp khâl chùa, râng lễ Giỗ tổ Hùng Vương. Đah kônh wa ta aơ, ngih chùa kŏ mro kơl mpeh nuih n’hâm ndrel drăp ndơ, ngăn lah kônh wa kŏ rgop du gưl n’hâm soan jê̆ bah nơm ân chùa, ngăn lah rnôk râng ăp nau kan tâm rnôk lễ Tết gay ma tâm rgop lơn tay nau tâm rnglăp đah ngih chùa ndrel ƀon Kon Klốc”.Nkhêp geh rnôk dja, n’gor Lâm Đồng khuh n’gôr đah ăp nău kan tâm Pơh lễ pâl nđaih khlay Lâm Đồng năm 2023. Đah nkô̆ “Lâm Đồng - Cao nguyên hùng vĩ”, Pơh lễ pâl nđaih khlay Lâm Đồng ƀư ntơm bah nar 27/4 tât nar 3/5 ta ăp nkuâl, nkual ƀon têh tâm n’gor. Tât đah Pơh lễ pâl nđaih Lâm Đồng tâm ăp nar dja, năch pâl nđaih mbra dơi rlong uănh saơ âk nău kan săk ntơr uĕh kơt: Lễ hội âm nhạc quốc tế; ntŭk pla n’hơ nkoch mbơh văn hóa ăp rnoi nuĭh tâm n’gor; Ntŭk pla ndơ sa “Trău kah Đà Lạt”; Pla n’hơ rup nghệ thuật “Ƀon tơm – kon nuĭh Tây Nguyên - Duyên hải miền Trung”; Bôk nău kan njroh mprơ way ơm tâm ƀon lan n’hanh nchreng an ŭanh uĕh ndơ nsoh way ơm - “Rup uĕh drăp ndơ ơm yău Văn hóa Nam Tây Nguyên”. Rlău ma nê, tâm trôm Pơh lễ nar Lâm Đồng hôm ƀư liên hoan chĭng gong Tây Nguyên “Nău kuăl bri neh têh hvi”, Tâm rlong ncho seh; mpơl tay “Nău way tâm nđăp bah nuĭh K’ho”, “Nsĭt ba n’hao rhe” v.v…

Ndrel đah ăp nău kan Pơh lễ nar rgum pâl nđaih Lâm Đồng, lễ giỗ tổ Hùng Vương năm aơ ƀư ta Nkual pâl nđaih leng Prenn Đà Lạt. Tĭng wa Nguyễn Thị Bích Ngọc, Groi giám đốc Sở Văn hóa, Thể thao n’hanh pâl nđaih n’gor Lâm Đồng, ăp nău kan ƀư soih uĕh da dê, đăp mpăn rhŏ dŏng uĕh an nău ŭch geh bah nuĭh ƀon lan n’hanh năch pâl nđaih, wa Nguyễn Thị Bích Ngọc, an gĭt:

          “Aƀaơ ăp nău kan ƀư du  rơh ta lĕ rngôch 12 nkuâl, nkual ƀon têh tâm n’gor. Tâm rnôk ƀư Pơh lễ nar rgum pâl nđaih ri nkre ƀư nar kan chính trị bah n’gor đŏng, nê lah giỗ tổ Hùng Vương. Giỗ tổ Hùng Vương năm aơ geh ăp nău kan ntô̆ n’hao ăp rnoh khlay mpeh văn hóa, drăp ndơ ơm yău ta lam n’gor. Gay nkre ntô̆ n’hao, nkre rdâk tay, jêng ndơ geh ƀư ntĭt êng, an năch pâl nđaih rnôk hăn tât nkual ƀon têh Đà Lạt, rnôk tât Lâm Đồng rlong uănh saơ”.

          Râng lễ Giỗ tổ Hùng Vương ta nkuăl ƀon têh Buôn Ma Thuột, n’gor Dak Lak, wa Lê Văn Thông, tâm Phường Thắng Lợi, nkuăl ƀon têh Buôn Ma Thuột, n’gor Dak Lak, mbơh:

          ‘Ƀư lễ Giỗ tổ Hùng Vương ueh nâp ngăn, ăp ntil đŏng. Lah nŭih ƀon lan Việt, gâp rhơn ngăn lah nar Giỗ tổ Hùng Vương geh Ngih dak ƀư, n’gâng kan tâm n’gor ndrel ăp ntŭk n’gâng kan mât chăm ân ueh, ăp ntil ăp nau kan. Nŭih ƀon lan phung hên rhơn ngăn ndrel tâm ban nuih n’hâm, kơl an tâm nau kan “ngêt dak nkah gĭt tu”, mât kơl an Giỗ Tổ kơt aơ”.

Tâm nkuăl Đăk Đoa, rmôt pah kan lŏ mir tâm rơh rlu lễ 30/4 ndrel 1/5, rmôt kan hŏ ƀư ân rmôt ăp nŭih râng ƀư nau kan thể dục thể thao gay ma n’hao nau tâm rgop. Nô A Lưng-cán bộ rmôt nŭih pah kan lŏ mir nkuăl Đăk Đoa, mbơh:

          ‘Tâm rnôk Giỗ tổ Hùng Vương ndrel nar rklaih, đăp mpăn neh dak, 30/4, Rmôt kan nŭih ƀon lan pah kan lŏ mir ƀư âk nau kan, rhơn ân ăp nŭih tâm rmôt, kŏ gay ma rhơn ân Đại hội ntoh măt rmôt nŭih pah kan lŏ mir bah nkuăl geh nau dơi ueh, ƀư kơt lah ăp nau pâl bóng, hăn pâl n’aih, mêt uănh nsum...Êp nê, âk nŭih hôm geh nau dơi văng sa ueh âk lơn ri ƀư ân rnăk vâl hăn pâl, hăn tât Pleiku, Nha Trang tâm rnôk rlu aơ. Rnăk hên kŏ ndri đŏng, tâm rnôk aơ ri leo ăp kon sau nơm hăn pâl tâm Pleiku, jêh ri Quy Nhơn geh rlu rlau, pâl ueh jêh ăp nar ntĭm nti jêr rganh”.

Âk nar kan văn hóa, ndơ sa, lễ hội uĕh mƀak ƀư nar 30-4 n’hanh 1-5 ta Gia Lai mbra an nuĭh ƀon lan n’hanh năch pâl nđaih geh âk trong sơch gay rlong uănh saơ, dah rŏng pâl rlưn tâm nar rlu jong nar.

Đah rlu jŏ tât 5 nar jêng nuĭh ƀon lan n’hanh năch pâl nđaih geh nău sơch ntŭk pâl rlưn, rlong ŭanh rnôk tât cao nguyên Gia Lai. Lăp nsum đah mông nar mbah rhơn Nar rklaih luh miền nam dơn ngoăy neh dak 30/4 n’hanh Ngày Quốc tết Lao động 1/5, nkual ƀon têh Pleiku đah ăp ntŭk tât uĕh dôl ndăn ngăch nkrơ̆ uĕh tay muh măt nkual ƀon têh hĭng ntơr uĕh gay wơt năch tât đah nkual ƀon têh mpeh dor yôk; Ta ăp trong nkual ƀon têh ta ăp ntŭk nchih yông bok, cờ ƀư an trong nkual ƀon têh lơn ma lơp uĕh khuh n’gôr lơn lôch jŏ năm nuh srê Covid-19. Rlău ma ăp nkual pâl rlưn, ăp nău kan văn hóa - thể thao mbah rhơn nar Lễ têh dơi ƀư lam ăp ntŭk ri ăp ntŭk ntoh lư n’hanh uĕh lăp măt uănh kơt Quảng trường Đại đoàn Kết, Công viên Đồng Xanh, Công viên Diên Hồng hôm way lah nău sơch uĕh dâk bôk năp bah năch pâl nđaih tâm n’hanh bah dih n’gor yor nău âk mpưm nău pâl rlưn bah dih n’hanh ăp ntŭk rhŏ dŏng nkre way ƀư mhe gay rhŏ dŏng an năch dŭt uĕh gay wăch rgum âk năch tât hăn ŭanh pâl. Yuh Siu Hương, tât bah nkuâl Chư Prông nkoch, nkhêp geh Lễ năm aơ, yuh mbra leo lĕ ma rnăk hăn pâl nđaih ta nkual pâl nđaih Biển Hồ yor ta aơ bri dak uĕh măt uănh, nkre geh ntŭk gay rnăk yuh chup rup, rlu rlău.  

Tâm nar lễ 30/4, 1/5 dja gâp leo ăp nuĭh tâm rnăk wâl hăn pâl ta biển Hồ, yor ta biển hồ dŭt uĕh bol ngai đah nkuâl. Gâp ŭch rŏng nhih pah kan mât uănh nkra têh uĕh tay gay nkual pâl rlưn uĕh, ntŭk râng wăr biển Hồ geh nkô̆ khlay lơn ntơm bah nê wăch rgum âk lơn năch hăn uănh pâl tât bah ăp nkuâl, xã. Rnôk hăn pâl 30/4, 1/5 dja, lah gay ăp nuĭh tâm rnăk wâl gĭt Biển Hồ ah ntŭk ta n’gor Gia Lai he.”