VOV4.M’nông: Nar aơ, (1/6) lah nar kon se lam ntur neh. Ndrel đah lam dak, tâm nkuăl Tây Nguyên rơh aơ kŏ geh âk nau kan kơl an kon se. Khay 6 kŏ lah “Khay kơl an kon se”, n’gâng kan ndrel ăp rmôt kan ăp ntŭk hŏ kơl an tât nau pâl ueh, rêh âm bah ăp kon se tâm yan rlu nti, ueh lăng.

            Năm nti bơi lôch, ăp ntŭk rƀŭn rgum tâm n’gor Kon Tum hŏ ntrŭnh ƀư nau nchrăp tâm khay rlu nti năm 2022 ndrel ntơm nau ndơn kon se lăp tâm ăp jrâu kơt: võ thuật, re dak, vẽ rup, nti nau ngơi Anh... Êng ăp jrâu ntĭm nti geh pơk, ăp Ngih văn háo yor rmôt kan mât, ăp kon se hôm săch âk nau êng bah nau râng tâm ăp rmôt mô lah tĭng ăp nau nơm ŭch dâk ƀư êng. Yuh Nguyễn Thị Tuyết Mai, Kruanh jrâu kan ntĭm nti nau kan Đoàn-Hội-đội ndrel nau ntĭm nti nau kan, Ntŭk kan Văn hoá Thể thao Kon se n’gor Kon Tum mbơh, rmôt kan hĭ nchrăp ăp nŭih kon se kơl an râng ăp jrâu ntĭm nti tâm khay rlu nti năm aơ, âk lơn:

            ‘Êng nai nti ntĭm nti bah ntŭk kan aơ dôl ma geh ơm ri hên hôm jă ăp nŭih kơl lăp pah kan nsum, ăp nŭih nai nti kon se ma hŏ geh tă ntĭm nti geh bằng, geh nau blau mpeh ăp nau nti thể thao gay ma pơk ăp jrâu geh nau blau, nau dơi pah kan Đội. Mpeh ntŭk ntu hên gŭ ri Rnâng kan Giám đốc Ntŭk kan hên kŏ uănh kơl an gay ma nchrăp ăp ntil ndơ dŏng ntĭm nti ân ăp kon se, pă ân ăp kon se geh du nau kan săk tam, geh nau nâp”.

Nău nti leo kan Đội

            Mhe rlau, Sở Văn hoá, Thể thao ndrel Pâl n’aih n’gor Kon Tum ƀư nau tâm rông “Kon se tâm nkoch mbơh mpeh săm ƀŭt”, rgum bơi tât 80 kon se tât tă bah ăp ngih săm ƀŭt mầm non, Tiểu học ndrel THCS râng. Ăp kon se nkoch nau blau bah nơm mpeh nau nkoch trêng, mbơh ndrôm săm ƀŭt bah nơm bah rlau 40 nau nkoch ueh. Ntoh ngăn lah ăp nau n’ok n’ơn, nkoch nŭih blau nau kan ueh, nkoch tât Me ndrel Wa Hồ ŭch rŏng. Oh Nguyễn Lê Thảo Ngọc, kon se nti jrâu 5A, ngih săm ƀŭt Tiểu học mrô 1, nkuăl têh Plei Kần, nkuăl Ngọc Hồi, mbơh:

            ‘Gâp mhe nkoch nau nkoch tât nŭih me janh dăng Nguyễn Thị Thứ. Gâp ŭch njoăl nau tât ăp nŭih lah nơm dôl rêh tâm du play neh đăp mpăn. Nau nkoch aơ nkah ân nơm rêh mhâm ƀư ân ueh đah nau roh hoch, khĭt ôm bah ăp rơh mbơ̆, rơh nô hăn lor. Gâp hŏ tă râng rơh tâm rlong aơ ndrel saơ aơ lah du ntŭk pâl ueh ngăn. Mô êng knŭng nau dơm, ma hôm geh âk nau ueh ndrel geh nau khlay kơl an nau rêh hên geh âk nau nsôih gay ntĭm nti đŏng”.

            Hôm tâm Dak Lak, Đoàn n’gor ƀư Bôk nau kan rnê ăp kon se ƀư ueh “5 nau Wa Hồ ntĭm”. Rơh rlau aơ, ăp nau kan, nau ƀư kơl an kon se bah Dak Lak rgop tâm mir kao ma rbăn nau kan ueh gay ma ndrel ndâk njêng ƀon lan sâm geh. Ntoh ngăn lah nau kan tâm rlong ƀư ueh 5 nau Wa Hồ ntĭm; Tâm rnglăp gay kơl an băl hăn nsu rƀŏng tât nau rêh, ăp nau kan Trần Quốc Toản, tâm kơl băn nơm...ndrel ăp nau kơl an, ngêt dak nkah gĭt tu. Ntơm bah nau kan hŏ ntoh ăp nŭih kon se ntoh lư, geh nau blau. Oh Dương Thị Ngọc Anh, kon se nti jrâu 9, ngih săm ƀŭt PTDN Nội trú Nkuăl M’drak nkoch:

            ‘Gâp rhơn ngăn. Gâp geh gĭt tay âk băl kŏ geh ăp nau nsôih kơt gâp ndrel âk nŭih tĭng 5 nau Wa Hồ ntĭm ueh êng đŏng. Săch tât ri gâp mra lŏ râng ăp nau kan, nau ƀư bah ngih săm ƀŭt, bah jrâu nti, bah nkuăl rgŏ jă lah geh, ndrel gâp mra kơl an ăp băl êng ndrel nsôih kơt gâp”.

Dak Lak mpŏng sĭt khay rlu nti leo pâl rlưn an oh kon se nkual njônh ngai.

             Uănh kơl an tât nau blau bah kon se tâm dâng tâm khay rlu nti. Đoàn n’gor Dak Lak ƀư nau ntĭm nti, nai nau kan đoàn, hội tâm thôn, ƀon, tổ dân phố tâm n’gor. Nê lah ăp nau blau kơt: nau kan kơl rgum nŭih râng rƀŭn, nkoch mbơh mpeh nau kan đoàn, hội bah ăp trang mạng xã hội, ngơi bah năp âk nŭih ndrel ăp nau blau êng bah Bí thư chi đoàn. Yuh Vũ Lê Thanh Ngân, Chi đoàn 5, Phường Tân Thành, nkuăl ƀon têh Buôn Ma Thuột, nkoch:

            ‘Tât aơ tă ƀư rgum rrƀŭn hè ân kon se tâm nkuăl ri gâp mra ƀư kơt tĭng âk nau kan tĭng nau dơi bah nơm tă geh nti. Kơt lah ăp nau blau pah kan tĭng âk nŭih, nau blau ƀư nkoch bri, leo nau pâl âk nŭih ndrel mhâm ƀư gay geh dơi rgum âk nŭih druh ndăm, gâo mra dơi kơt tĭng nti tă bah ăp cán bộ Đoàn xã, phường êng gay ma rhuăt nau tă blau ân săk gâp nơm, mhâm ƀư dơi ƀư du nkô̆ nau rgum rƀŭn ân geh săk tam ngăn”.

            Nô Trần Doãn Tới, Groi Bí thư Đoàn n’gor, Kruanh Hội đồng Đội n’gor mbơh, ăp gưl cán bộ đoàn tâm rgop ngăn đah ăp gưl kan, ăp ngíh ăm ƀŭt tâm nau ndơn kon se rgum rƀŭn tâm nkuăl, n’hao nau săk tam bah mât, njêng ntŭk pâl ueh ân kon se, n’huch dêh ngăn ăp nau tât khuch bah ăp kon se tâm khay rlu nti:

            ‘Tal bôk năp lah ntĭm nti mpeh nau blau ân ăp cán bộ gưl xã. Tal bar n’hao nau kan tâm rgop nsum đah Hội đồng đội xã ndrel Hội đồng đội ăp liên đội tâm nkuăl. Tal pe, nê lah nau kan n’hao nau dơi tâm nau tâm rgop đah ăp ntŭk kan, rmôt kan, n’gâng kan tâm nau ân gĭt kloh nau ƀư ân kon se ndrel tâm nau ƀư Luật kon se năm 2017”.

            Ndrel ma nê, Đoàn n’gor Dak Lak dôl lŏ bonh đă ƀư ân ueh nsum nau kan gay ndâm njêng ntŭk pâl ueh ân kon se, pơk ăp ntŭk rƀŭn rgum ân kon se. Ƀư ăp jrâu ntĭm nti văn hoá tâm khay rlu nti gay rƀŏng tât ân kon se tâm ăp nkuăl jêr jŏt, nkuăl jru ngai gay ma n’hao nau kơl an nau gĭt blau ân kon se jêh âk khay nti trực tuyến./.

            Nŭih rblang: H’Thi