Nar 13/12, ta nkual ƀon têh Buôn Ma Thuột, Tổng cục mât uănh ntŭk tăch ndơ ƀư rƀŭn nchră mbơh tơih trong kan mât uănh ntŭk tăch ndơ tâm rnôk Tết Nguyên đán Quý Mão 2023 ta ăp n’gor Tây Nguyên n’hanh êp Tây Nguyên. Ta rƀŭn nchră, ntoh măt Cục Mât uănh ntŭk tăch ndơ ăp n’gor lĕ uănh lah, tâm nchră mpeh trong kan mât uănh ntŭk tăch ndơ tâm năm 2022 n’hanh nchroh mbơh nu nău ntŭk tăch ndơ bah năp, tâm n’hanh jêh Tết Nguyên đán Quý Mão 2023, ngăn lah ăp nău geh tât ndơ pring xăng, ndoh ndơ rhŏ Tết Nguyên đán, nu nău mplư rlăm, tih tâm nău kan tăch rgâl điện tử.

Wa Trần Hữu Linh Tổng Cục trương Tổng Cục Mât uănh ntŭk tăch ndơ ntoh ngơi ta Rƀŭn nchră.

Ntoh ngơi ta Rƀŭn nchră, wa Trần Hữu Linh, Tổng cục trưởng Tổng cục mât uănh ntŭk tăch ndơ lah rjăp, năm aơ tết Dương lịch n’hanh Nguyên đán tâm êp, nău ŭch rwăt năp ndoh ndơ bah nuĭh ƀon lan hao âk tâm khay êp tât. Yor nê, đă rmôt mât uănh ntŭk tăch ăp n’gor n’hao uănh nđôi ntŭk tăch ndơ, rmal rjăp ăp nău ƀư tih pháp luật mpeh tăch rgâl, uănh khlay groi nđôi, rmal rjăp ăp rmôt kan, êng nuĭh rlăm nău ŭch dŏng âk tâm rơh tết gay n’hao rnoh khlay mô tâm di, ƀư roh đăp mpăn ntŭk tăch ndơ, ngăn lah đah ăp ndơ dơi dŏng âk tâm rơh Tết dương lịch n’hanh Tết Nguyên đán năm 2023.