Ta Gia Lai, 2847 mom ndăm n’gor Gia Lai hăn tahen tâm nar 25/2. Tâm rnoh aơ, geh tât 59% lah nuĭh rnoi đê̆, 479 nuĭh geh săm ƀŭt dăn hăn tahen tĭng êng nơm ŭch, 72 nuĭh geh lôch nti đại học, cao đẳng. Rơh pă dơn tahen geh n’gor Gia Lai ƀư na nê̆ ta 17 ntŭk ta 17 nkuăl, nkuăl têh bâh n’gor.

Hôm ta Dak Lăk, geh 3.026 mom ndăm hăn tahen ta rơh aơ. Nchrăp ntŭk pă dơn tahen ta nkuăl ƀon têh Buôn Hồ, Dak Lak, geh Trung tướng Thái Đại Ngọc, Tư lệnh quân khu 5, Bí thư n’gor ủy Dak Lak Nguyễn Đình Trung ndrel đah nuĭh leo kan ta ntŭk n’hanh âk nuĭh ƀon lan. Ta ntŭk ndơ̆- dơn tahen ta nkuăl têh Buôn Hồ geh 173 mom ndăm, tâm nĕ geh 80 nuĭh nchih săm ƀŭt dăn hăn tĭng êng nơm ŭch.

Hôm ta Dak Nông, ƀư jao dơn tahen ta ăp nkuăl ta n’gor Dak Nông dơi ƀư tâm mông nar têh, ngăn ngên lah nar rgum bah druh ndăm hăn trong tĭng jâng bơ̆ nô. Tă bah nĕ, mât uĕh nuih n’hâm cách mạng, nău ntô̆ n’hao bah rnoi nuĭh n’hanh nău way ơm têh, nsrôih ndâk njêng n’hanh mât njrăng nâp nâl neh dak. Năm 2024, n’gor Dak Nông dơi săch rlău 1.500 druh ndăm, tâm nĕ geh 900 druh ndăm hăn ƀư tahen n’hanh rlău 250 druh ndăm ƀư tahen công an. Ăp druh ndăm ntoh lư bah n’gor Dak Nông hăn tahen rơh aơ ƀư tahen ta ăp ntŭk bah N’gâng kan Công an, Quân đoàn 3 (N’gâng kan mât njrăng bri dak); Trung đoàn bộ binh 994 (n’gâng kan ntĭm rđău Tahen n’gor Dak Nông), n’gâng kan ntĭm rđău tahen n’har bri n’gor n’hanh Công an n’gor Dak nông.

Rơh ndơ̆ dơn tahen năm 2024 geh 10 nkuăl, nkuăl ƀon têh ta n’gor Kon Tum tâm ndrĭh ƀư tâm ôi lơ 25/2 tĭng di nău ntrŭnh, mât đăp mpăn tâm di, na nê̆, đăp mpăn, mpêt nkrem n’hanh ngăn ngên lah nar tâm mâp ƀon lan.

Năm aơ n’gor Kon Tum geh 804 mom ndăm hăn ƀư tĭng nău kan tahen. Nău mbơh bâh n’gâng kan leo kan tahen n’gor Kon Tum an saơ Hội đồng Nghĩa vụ quân sự ăp gâl kan lĕ geh ƀhư tĭng nău kan săch mom ndăm, kuăl jă mom ndăm hăn tahen, dơn ngoăy, tâm ban ăp nău kan, di đah Luật hăn tahen, mât đăp mpăn tâm di na nê̆, kloh rjăp ƀư tơm tâm nău săch mom ndăm hăn tahen. Tâm rnoh 804 nuĭh mom ndăm ta Kon Tum hăn tahen geh tât 26 mom ndăm nchih sƀ dăn hăn êng nơm ŭch, tahen mhe tâm năm deh bâh 18 tât 27 năm deh geh tŏng dăng săk soan, 28 tahen mhe lôch nti trung cấp, cao đẳng n’hanh đại học, 2 tahen mhe lah đảng viên. Ê lor geh hăn tahen ăp tahen mhe n’hanh rnăk vâl geh dơn nău mât uănh, rgŏ jă bâh ăp gâl kan, n’gâng kan tâm ban kơt ăp ntŭk kan, n’gâng kan ta ntŭk.